Leviticus 18

Chin TBR17 (Tedim Bible Revision 2017)

← Chapter 17 Jump to: Chapter 19 →

1Topa in Moses kiangah,

2“Israel mite tungah hih bangin gen in: Kei pen Topa na Pasian uh ka hi hi.

3Note na teenna uh Egypt gamah amaute a gamtat bangin note na gamta kei ding uh a, note kong paipihna Kanaan gamah zong amaute a gamtat bangin note na gamta kei ding uh hi. Note in amauʼ gamtatnate na zui kei ding uh hi.

4Note in keima biakna ngeina kipte semin ka thukhamte lenin tuate na zui ding uh hi. Kei pen Topa na Pasian uh ka hi hi.

5Tua ahih ciangin note in ka thukhamte le ka biakna ngeina kipte na zui ding uh hi. Tuate a zui mi peuhpeuh nungta ding hi. Kei pen Topa ka hi hi.

6“Note kuamah in na kinaipih na behte uh mawhpih dingin na naih kei ding uh hi. Kei pen Topa ka hi hi.

7Na nu mawhpihna tawh na paʼ tungah maizumna na tun kei ding hi. Amah pen na nu ahih manin na mawhpih kei ding hi.

8Nangmah in na paʼ zi dangte zong na mawhpih kei ding hi. Tua pen na paʼ mindai nading ahi hi.

9Nangmah in na sanggamnu, na paʼ tanu, ahih kei leh na nuʼ tanu, inn-a suak hitaleh gam a suak hitaleh na mawhpih kei ding hi.

10Nangmah in na tapaʼ tanu ahih kei leh na tanuʼ tanu na mawhpih kei ding hi; bang hang hiam cih leh amauʼ mindaina pen nangma mindaina mah ahi hi.

11Na paʼ ziʼ tanu, na paʼ tanu pen na sanggamnu ahih manin na mawhpih kei ding hi.

12Na ni na mawhpih kei ding hi; tua nu pen na paʼ sanggam numei ahi hi.

13Na nuʼ sanggamnu na mawhpih kei ding hi; bang hang hiam cih leh amah pen na nu tawh a kinai beh numei ahi hi.

14Na paʼ sanggampaʼ tungah mindaina na tun kei ding hi; tua pen ama zi na naih kei ding hi, cihnopna ahi hi; tua nu pen nangma innlak nu ahi hi.

15Na monu na mawhpih kei ding hi; tua nu pen na tapaʼ zi ahi hi; amah na mawhpih kei ding hi.

16Na sanggampaʼ zi na mawhpih kei ding hi; tua pen na sanggampaʼ mindai nading ahi hi.

17Na luppih numei khatʼ tanu na mawhpih kei dinga, tua numeiʼ tapaʼ tanu hitaleh tua numeiʼ tanuʼ tanu hitaleh, luppih dingin na la kei ding hi. Amaute pen nangmah tawh a kinai beh numeite ahi uh hi. Tua bang gamtatna pen a siahuai ahi hi.

18Nangmah in a sanggamnu a hingsuan dingin numei khat zi-in na la kei dinga, a sanggamnu a hing laipi-in amah na luppih kei ding hi.

19“Nangmah in numei khat nin a neih laitak, a nit hun sungin luppih dingin na naih kei ding hi.

20Na veengpaʼ zi tawh na lum khawm kei dinga, tua nu tawh na kininsak kei ding hi.

21Nangmah in Molek tungah meihal biakna-a piak dingin na tate khat peuhpeuh na pia kei dinga, tua bangin na Pasianʼ min na daisak kei ding hi; keimah pen Topa ka hi hi.

22Numei khat tawh lup khop bangin pasal khat tawh na lum khawm kei ding hi; tua pen a kihhuai ahi hi.

23Ganhing khatpeuh tawh mawhin tua tawh na kininsak kei dinga, numei khatpeuh in zong ganhing khatpeuh tawh a mawh dingin kipia lo ding hi; tua pen ngeina hi lo hi.

24“Hih nate khatpeuh tawh note kininsak kei un; bang hang hiam cih leh noteʼ mai-a ka paihkhiat minamte in hihte khempeuh tawh amaute kininsak uh hi.

25Leitung a nin suak ahih manin keimah in a leitang gimna pia-in, leitang in ama tunga a teeng mite a lua khia hi.

26Ahih hangin, tualsung mi hitaleh note lakah hong peem khualmi hitaleh, note in keima thukhamte le keima biakna ngeina kipte na zui ding uh a, hih a kihhuai nate khat beek na hih kei ding uh hi;

27(bang hang hiam cih leh noteʼ ma-a a om gam mite in hih a kihhuaite khempeuh gamta uh ahih manin leitang a nin a suak hi;)

28tua bang hikeileh leitang in noteʼ ma-a a om minamte a luakkhiat bangin note in amah na nitsak uh ciangin amah in note hong lua khia ding hi.

29Bang hang hiam cih leh hih a kihhuaite khatpeuh a hihte peuhmah, amauʼ mite lak panin kihawl khia ding hi.

30“Tua ahih ciangin noteʼ ma-a a kizang hih a kihhuai ngeinate khat peuhpeuh na gamtat ngei loh nading uh le tuate tawh nomau na kinitsak loh nadingun kong thuhilhte zui un; kei pen Topa na Pasian uh ka hi hi,” a ci hi.

← Chapter 17 Jump to: Chapter 19 →