Leviticus 20

Chin TBR17 (Tedim Bible Revision 2017)

← Chapter 19 Jump to: Chapter 21 →

1Topa in Moses kiangah,

2“Israel mite kiangah hih bangin gen in: Israel mite khat peuhpeuh hitaleh Israel sunga a peem khual mite hitaleh, a tate khat peuhpeuh Molek pasian tungah a pia mipa kithat dinga, mihonte in suang tawh deng lum ding uh hi.

3Kei mahmah in tua mipa ka maisiat dinga, ama mite lak panin ka hawl khia ding hi; bang hang hiam cih leh amah in a tate Molek tungah pia-in, ka biakbuk ninsakin, ka min siangtho daisak hi.

4Amah in Molek tungah a tate khat a piak ciangin mihonte in tua pa kimuhmawh bawlin amah a thah kei uh leh,

5keimah in tua mipa le ama innkuanpihte maisiatin, amah le Molek biakna ah amah a zuite khempeuh amauʼ mite lak panin ka hawl khia ding hi.

6“Mi khat vankahna le aisan lamah kihei-in tuate thu a dot leh, keimah in tua mipa ka maisiat dinga, ama mite lak panin amah ka hawl khia ding hi.

7Tua ahih ciangin note ki-ap unla siangtho un; bang hang hiam cih leh kei pen Topa na Pasian uh ka hi hi.

8Ka thukhamte zui unla, tuate sem un; note a hong siangthosak Topa pen keimah ka hi hi.

9“Bang hang hiam cih leh a nu ahih kei leh a pa a samsia mi peuhmah kithat ding hi. Amah in a nu ahih kei leh a pa samsia khin a, ama sihna a mahmah ngawh ding ahi hi.

10“Pasal khatpeuh a veengpaʼ zi tawh a mawh leh, tua a khial pa le a khial nu kithat khawm ding hi.

11A paʼ zi tawh a lum khawm mipa in a pa a mindaisak a suak hi. Amau tegel kithat ding hi. Amauʼ sihna amau mah ngawh ding ahi hi.

12Pasal khat a monu tawh a lup khop leh, amau tegel kithat ding hi; amaute in sisan kinai lua mi tawh khialhna a bawl uh ahi hi. Amauʼ sihna amau mah ngawh ding ahi hi.

13Pasal khat in numei khat tawh lup khop bangin pasal dang khat tawh a lup khop leh, amau tegel kihhuaina a gamta khin uh ahih manin amaute kithat dinga, amauʼ sihna amau mah ngawh ding ahi hi.

14Pasal khat in zi nei-in, a ziʼ nu tawh zong a lak thuah leh, tua pen a kilawm lo ahi hi. Note lakah tua bang kilawm lohna a om loh nadingin tua pa le a nutate, mei tawh kihal lum ding hi.

15Pasal khatpeuh ganhing khat tawh a mawh leh amah le a ganhing kithat ding hi.

16Numei khat in ganhing khat naihin tua tawh a mawh leh, note in a numei le a ganhing na that ding uh hi; amauʼ sihna amau mah ngawh ding ahi hi.

17“Pasal khat in ama sanggamnu, ahih kei leh a nuʼ tanu teen pihin a lup khawm uh leh, tua pen a zumhuai hi a, amauʼ mipihteʼ omna panin amaute kihawl khia ding hi. Ama sanggamnu tawh mawh ahih manin tua pa in ama mawhna pua ding hi.

18Pasal khat, nin a nei numei khat tawh lum khawmin a mawh uh leh, amau tegel in siantho nading ngeina palsat uh ahih manin amauʼ mipihte lak panin kihawl khia ding hi.

19“Note pen na nuʼ sanggamnu ahih kei leh na paʼ sanggamnu tawh na mawh kei ding uh hi. Tua pen a nai behte tawh mawhna ahih manin amaute in amauʼ mawhna pua ding uh hi.

20Pasal khat, a paʼ sanggampaʼ zi tawh a lup khop leh, amah in a paʼ sanggampa a mindaisak ahi hi. Amaute in amauʼ khialhna thuak ding uh a, ta nei loin si ding uh hi.

21Pasal khat in a sanggampaʼ zi a lak leh, tua pen nitna hi a, amah in a sanggampa a mindaisak ahi hi. Amaute in ta nei lo ding uh hi.

22“Tua ahih ciangin note in ka thukham khempeuh le ka biakna ngeina kipte khempeuh zui-in, tuate na sem ding uh hi. Tua pen note na ten nadingun kong paipih nading leitang in note hong luakkhiat loh nading ahi hi.

23Noteʼ mai ah keimah in ka paihkhiat minamteʼ ngeinate na zui kei ding uh hi. Amaute in hih nate khempeuh hih uh ahih manin amaute ka kih hi.

24Ahih hangin keimah in note kiangah, ‘Note in amauʼ leitang na luah ding uh hi. Bawngnawi le khuaizu a luanna leitang, na neih dingun note tungah kong pia ding hi,’ kong ci khinzo hi. Kei pen miteʼ kiang panin note a hong khen khia Topa na Pasian uh ka hi hi.

25Tua ahih ciangin note in ganhing a siang le a nin, vasa a siang le a nin khentelna na bawl ding uh hi. Note in nin hi, ci-in na seh dingun keimah in ka tuam koih sa ganhing hitaleh vasa hitaleh leitung a a pai thei khat peuhpeuh tawh hitaleh, note na kininsak kei ding uh hi.

26Note pen keima adingin na siangtho ding uh hi; bang hang hiam cih leh Topa ahi keimah ka siangtho a, note pen keima-aʼ na hih theih nadingun mite kiang panin note kong tuam koih zo hi.

27“Numei ahi a, pasal ahi zongin van a kah a, ai a saan leh kithat dinga, suang tawh amaute kidenglum ding hi. Amauʼ sihna amau mah ngawh ding ahi hi,” a ci hi.

← Chapter 19 Jump to: Chapter 21 →