Leviticus 24

Chin TBR17 (Tedim Bible Revision 2017)

← Chapter 23 Jump to: Chapter 25 →

1Topa in Moses kiangah,

2“Meivak khat a tawntungin a kivak suak theih nadingin meivak adingin oliv gah a kisuzante panin sathau siangtho nang kiangah hong paipih nading uh Israel mite thu pia in.

3Kikhopna buk sung, thuciamna singkuang dalna puan pua lamah, Aaron in nitak a kipanin zingsang dongin Topaʼ mai ah a tawntungin tua meivak a ngeina bangin koih dinga, tua pen na khang tawntungun ngeina khat hi tawntung ding hi.

4Amah in kham citak meivak khuam tungah meivakte a ngeina bangin Topaʼ mai ah omsak tawntung ding hi.

5“Nangmah in annel la inla, tua panin moh sawm le nih bawlin em in; moh khat ciangin annel lawh nih hi ding hi.

6Nangmah in kham citak sabuai tungah tuate gual nihin na koih dinga, gual khat ah guk om ding hi.

7Phawkna-in Topaʼ tungah mei tawh biakna-in piak dingin anlum tawh a pai khawm theih nadingin nangmah in a gual nihte ah paknamtui siangtho na koih ding hi.

8Sabbath nisimin Aaron in a tawntung thuciamna-in Israel mite tang dingin Topaʼ mai ah a ngeina bangin koih tawntung ding hi.

9Tua pen Topaʼ tungah mei tawh kihal biakna sung panin amah in a tawntung a a ngah ding, a siangtho pen ama kaih ahih manin, Aaron le a suante-aʼ ding hi a, amaute in a siangtho mun khat ah ne ding uh hi,” a ci hi.

10Tu-in Israel numei khatʼ tapa, a pa Egypt mi ahi khat, Israel mite lakah a pai hi. Israel numeiʼ tapa le Israel mi khat giahphual ah kitawng uh a,

11Israel numeiʼ tapa in Min Siangtho gensia-in samsia hi. Amaute in Moses kiangah amah paipih uh hi. Ama nuʼ min pen Shelomith hi a, Dan minam, Dibriʼ tanu ahi hi.

12Topaʼ deihna amaute tungah a kigen mateng amaute in tua mipa khumcip uh hi.

13Topa in Moses kiangah,

14“A samsia mipa pen giahphual pua lamah paipih in. Ama samsiat a za mi khempeuh ama lu tungah amauʼ khut ngasak inla, mihonte khempeuh amah deng lumsak in.

15Tua ciangin Israel mite tungah hih bangin gen in: Ama Pasian a samsia mi peuhmah in ama khialhna thuak ding hi.

16Topaʼ min a gen sia mipa kithat ding hi. Mihonte khempeuh in amah deng lum ding uh hi. Peemta hitaleh tualsung mi hitaleh, Min Siangtho a gensiate kithat ding hi.

17“Mi a that pa kithat ding hi.

18Ganhing a that pa in a ganhing mahin loh ding hi. A thu-in ci lehang nuntakna le nuntakna a kithuk ding ahi hi.

19“Mi khat in a veengte khat a poisak leh, ama hih bangin ama tung mahah kithukkik dinga,

20guh kitan tang ding guh kitan, mittang tang ding mittang, ha tang ding ha kihih dinga, amah in mi khat a poisak bangin amah kipoisak ding hi.

21Ganhing a that pa in loh dinga, mi a that pa kithat ding hi.

22Note in peemta le tualsung mi adingin ngeina a kibang khat na nei ding uh hi; bang hang hiam cih leh kei pen Topa na Pasian uh ka hi hi,” a ci hi.

23Tua ahih ciangin Moses in Israel mite tungah hih thu a gen hi. Amaute in a samsia mipa giahphual pua lamah paipih uh a, suang tawh a deng lum uh hi. Topa in Moses a thupiak bangin Israel mite in a hih uh hi.

← Chapter 23 Jump to: Chapter 25 →