Song of Solomon 6

Chuvash (CHB) (БИБЛИ) 2009

← Chapter 5 Jump to: Chapter 7 →

1«Хитререн те хитре пикемӗр, ӑҫта кайса кӗчӗ санӑн савнӑ каччу? ӑҫта ҫухалчӗ санӑн савнӑ каччу? ӑна эпир санпала пӗрле шырӑпӑр».

2Манӑн савнӑ каччӑм хӑй пахчине, чечек пахчине, тухса кайрӗ: вӑл унта кӗтӳ кӗтсе ҫӳрет, лили чечекӗ пуҫтарать.

3Савнӑ тусӑмҫӑм — манӑн, эпӗ те — унӑн; вӑл лили чечекӗ хушшинче кӗтӳ кӗтсе ҫӳрет.

4Савниҫӗм-пикеҫӗм, эсӗ Фирца пекех илемлӗ, Иерусалим пекех кӑмӑллӑ, элем ҫӗкленӗ ҫӗнтерейми ҫар евӗрлӗ эсӗ.

5Ан тинкер эс мана, ан пӑлхат чунӑма.

6Галаад тӑвӗ ҫинчен анакан качака кӗтӗвне асилтерчӗ ҫӳҫӳ; шӑлусене — шывран ҫуса кӑларнӑ сурӑх кӗтӗвӗ тейӗн, хӗсӗрри унта ҫук, кашнийӗ — йӗкӗреш путекпе;

7питӳ — икӗ нар улмиех, ун тавра явӑнаҫҫӗ ҫӳҫ кӑтрисем.

8Патшанӑн — утмӑл арӑм, сакӑрвунӑ ҫум-арӑм, хӗрӗсенӗн шучӗ те ҫук;

9анчах вӑл ҫеҫ — кӑвакарчӑнӑм, тасаран тасаскерӗм, пӗртен-пӗррескерӗм; амӑшӗ те ӑна, пӗртен-пӗр пикине, ытларах юратса ҫитӗнтернӗ. Хӗрсем курчӗҫ те ӑна — пуринчен мала хучӗҫ, патша арӑмӗсемпе ҫум-арӑмӗсем те мухтарӗҫ ӑна.

10Кам-ши вӑл, шурӑмпуҫ ялтравӗ евӗрскер, уйӑх пек чиперскер, хӗвел ҫутийӗ евӗрскер, элем ҫӗкленӗ ҫӗнтерейми ҫар евӗрскер?

11Айлӑм ешӗллӗхне курмашкӑн, иҫӗм аврисем папка ҫурман-ши, нар улми йывӑҫӗсем ҫеҫкене ларман-ши тесе мӑйӑр пахчине эпӗ антӑм.

12Ӗнтӗ хам та пӗлместӗп — халӑхӑмӑн чаплӑ ҫыннисен кӳмисем еннелле мӗншӗн ӑнтӑлчӗ-ши ман чунӑм?

← Chapter 5 Jump to: Chapter 7 →