Song of Solomon 7

Chuvash (CHB) (БИБЛИ) 2009

← Chapter 6 Jump to: Chapter 8 →

1«Ҫаврӑнса пӑхсамччӗ, Суламита! ҫаврӑн-ха, ҫаврӑн, ҫаврӑн — эпир сан ҫине пӑхса илер». Сирӗн мӗншӗн Суламита ҫине пӑхмалла-ха, вӑл Манаимри вӑйӑ карти-им?

2Ах, ятлӑ-сумлӑ пике, мӗн тери чипер сантали сырнӑ сан урусем! Ӑста ӳнерҫӗ алли тунӑ мӑя пек санӑн чӑмӑркка пӗҫҫӳсем;

3хырӑму — ҫавра алтӑр, техӗмлӗ эрех унта нихӑҫан иксӗлмест; санӑн вару — тулӑ кӑшӑлӗ, кӑшӑлӗ тавра лили лартса тухнӑ;

4икӗ чӗччӳ — икӗ путек, ту качакин йӗкӗрешӗ;

5мӑю — сӑлан шӑмминчен тунӑ юпа; куҫусем — Батраббим хапхи ҫумӗнчи Есевон кӳллисем; сӑмсу — Дамаск енне пӑхакан Ливан пашниех;

6пуҫу Кармил тӑвӗ евӗр мӑнаҫлӑ, ҫӳҫӳ йӗпкӗн хӗрлӗ; кӑтрусен илемӗ патшана пӑхӑнтарнӑ.

7Мӗнле эс илемлӗ, мӗнле илӗртӳллӗ, ытарайми чечен эс, савниҫӗм-пикеҫӗм!

8Пӗвӳ пальма евӗрлӗ санӑн, икӗ кӑкӑру — икӗ иҫӗм сапакӗ.

9Шухӑшларӑм вара: туратран турата ҫакланса улӑхасчӗ манӑн пальма ҫине; кӑкӑру пулӗ иҫӗм сапаки вырӑнне, панулми шӑршиллӗ пулӗ сывлан сывлӑшу;

10туту-ҫӑвару — чи тутлӑ эрех. Манӑн эрехӗм — тусӑм валли, ӑшӗ хыпнисене вӑл киленӗҫ кӳрет.

11Эпӗ — тусӑмӑн, вӑл та маншӑн тӗмсӗлет.

12Килсем, савнӑ каччӑм, тухар уй-хире, кӗрер ялсене;

13ир-ирех каяр иҫӗм пахчине, курар-ха: иҫӗм турачӗ папкаланнӑ-ши, чечеке ларнӑ-ши, нар улмийӗн йывӑҫӗ ҫеҫкеленнӗ-ши; унтах сана ҫупӑрлайӑп, ачашлӑп.

14Мандрагора та акӑ ырӑ шӑршӑ сарать, пирӗн алӑк умӗнчех тӗрлӗрен паха ҫимӗҫ — малтанхине те, хальтерех татнине те сан валли эп упрарӑм, юратнӑ каччӑм, савнийӗм!

← Chapter 6 Jump to: Chapter 8 →