1 Chronicles 10

Dagbani Bible (Naawuni Kundi Kasi)

← Chapter 9 Jump to: Chapter 11 →

1Filistianim’ mini Izraɛlnim’ daa ti tuhiri tɔbu, ka Izraɛlnim’ daa ŋmaligi guui ka chɛ Filistianima. Ka Filistianim’ maa daa doli ti ku ba Gilibɔa Zoli zuɣu.

2Ka Filistianim’ maa daa kari doli Naa Sool min’ o bidibisi nti ku Jɔnatan mini Abinadab ni Malikishua.

3Ka tɔb’ maa daa kpaɣi mii Sool, ka peentɔriba daa to o piɛm ti o daŋa.

4Di saha ka Sool daa yɛli ŋun ʒir’ o tɔbutuhiri’ nɛma, “Ŋoom’ a takɔbi na n-kuhi ku ma, di so ka bɛn bi gundi ŋɔ ti kana ti zaŋ ma diɛm.” Amaa ka dabiɛm daa gbaag’ o neen’ ʒira maa ka o bi saɣi ku o. Di saha ka Sool daa zaŋ omaŋmaŋ’ takɔbi zali n-lu di zuɣu.

5O neen’ ʒira maa ni daa nya ka Sool kpi maa, ka o gba lu o takɔbi zuɣu kpi.

6Sool min’ o bidibis’ ata ni o neen’ ʒira ni o yiŋnim’ zaa ni daa laɣim kpi shɛm m-bala.

7Ka Izraɛlnim’ bɛn daa be vinvamli ni ni daa wum ni Izraɛlnim’ ŋmaligimi guui, ka Sool min’ o bidibisi kpi, ka bɛ daa yi bɛ tinsi ni zo. Ka Filistianim’ maa daa chaŋ ti be di ni.

8Ka biɛɣu daa neei, ka Filistianim’ maa daa chaŋ ni bɛ ti yeei kpiimba maa situra, ka nya Sool min’ o bidibis’ ata maa ni do Gilibɔa Zoli zuɣu.

9Ka bɛ daa ŋmaai Sool zuɣu, ka yeeg’ o tɔbutuhiri’ nɛma, ka bahi bihi ni bɛ gili Filistia tiŋgbɔŋ maa ni zaa m-moli lahibali suŋ maa ti bɛ buɣa mini bɛ niriba zaa.

10Ka bɛ daa zaŋ o tɔb’ nɛma maa ti niŋ bɛ buɣ’ shɛli jɛmbu duu, ka daa zaŋ o zuɣu maa ti yili bɛ buɣili Dagɔn jɛmbu duu puuni.

11Amaa ka Jabɛshigiliadnim’ zaa daa wum Filistianim’ maa ni niŋ Sool shɛm maa zaa,

12ka bɛ dɔbba bɛn zaa daa mali suhukpeeni daa yiɣisi chaŋ ti zaŋ Sool min’ o bihi maa niŋgbuna maa chaŋ Jabɛshi nti zaŋ ba sɔɣi Jabɛshi oki tia gbini, ka daa lo noli daba ayopɔin.

13Sool ni daa bi ʒe Yawɛ yim ka kpi shɛm m-bala. O daa bi ʒe Yawɛ yim ka bi doli Yawɛ zaligu, ka daa lan chaŋ ti buɣi baɣa m-bɔr’ sɔŋsim.

14O daa bi bo sɔŋsim maa Yawɛ sani, dinzuɣu ka Yawɛ daa ku o, ka zaŋ o nam maa ti Jɛsi bia Dauda.

← Chapter 9 Jump to: Chapter 11 →