1 Chronicles 24

Dagbani Bible (Naawuni Kundi Kasi)

← Chapter 23 Jump to: Chapter 25 →

1Bɛ ni daa piri Aduna bidibisi shɛm m-bɔŋɔ: Aduna bidibisi n-daa nyɛ: Nadab mini Abihu ni Ɛliɛza ni Itama.

2Amaa Nadab mini Abihu daa na bi dɔɣi bihi, ka daa lan daŋ bɛ ba kpibu, ka Ɛliɛza mini Itama daa nyɛ maligumaaniba.

3Ka Ɛliɛza bia Zadok mini Itama bia Ahimɛlɛk daa sɔŋ Dauda ka o piripiri Aduna bidibisi maa kaman bɛ talahi tuma ni nyɛ shɛm.

4Ɛliɛza bidibisi ni daa nyɛ kpamba gari Itama bidibisi zuɣu ka bɛ daa piri ba la ʒiibupinaayɔbu zuɣu kaman bɛ dɔɣirikpamba ni daa nyɛ shɛm, ka daa piri Itama bidibisi mi ʒiibunii zuɣu.

5Bɛ daa pihila kuɣa sɔŋ lihi nya pɔi ka naanyi piri ba. Bɛ daa niŋla bɛ zaa lala, dama luɣ’ kasi shee tumtumdiba bɛn daa tumdi Naawuni tuma daa be Ɛliɛza mini Itama bidibisi maa zaa ni.

6Di saha ka Nɛtanɛl ŋun daa nyɛ Lɛvi nir’ la bia Shɛmaya ŋun daa nyɛ gbansabiri la daa sabi di zaa naa mini nabihi ni Zadok ŋun daa nyɛ maligumaana la ni Ahimɛlɛk ŋun daa nyɛ Abiata bia la nti pahi maligumaaniba ni Lɛvinima ni bɛ ni daa pii Ɛliɛza daŋ ni mini Itama daŋ ni ninvuɣ’ shɛb’ la zaa ninni.

7Bɛ ni daa pihi kuɣa sɔŋ lihi nya maa, tuuli dini daa gbaala Jɛhoyarib, ka din pah’ ayi gbaai Jɛdaya,

8ka din pah’ ata gbaai Harim, ka din pah’ anahi gbaai Siɔrim,

9ka din pah’ anu gbaai Malikija, ka din pah’ ayɔbu gbaai Mijamin,

10ka din pah’ ayopɔin gbaai Hakɔz, ka din pah’ anii gbaai Abija,

11ka din pah’ awɛi gbaai Jɛshua, ka din pahi pia gbaai Shɛkania.

12Ka din pahi piniyini gbaai Ɛliashib, ka din pahi pinaayi gbaai Jakim,

13ka din pahi pinaata gbaai Hupa, ka din pahi pinaanahi gbaai Jɛshɛbiab,

14ka din pahi pinaanu gbaai Biliga, ka din pahi pinaayɔbu gbaai Imɛr,

15ka din pahi pinaayopɔin gbaai Hɛzir, ka din pahi pisaayika gbaai Hapizɛz,

16ka din pahi pisiyinika gbaai Pɛtahia, ka din pahi pisi gbaai Jɛhɛzikɛl,

17ka din pahi pisiniyini gbaai Jachin, ka din pahi pisinaayi gbaai Gamul,

18ka din pahi pisinaata gbaai Dɛlaiya, ka din pahi pisinaanahi gbaai Maazia.

19Bɛmbɔŋɔnima n-daa yi chani Yawɛ jɛmbu duu bɛ jɛma saha nti tumdi bɛ tuma kaman Yawɛ ŋun nyɛ Izraɛlnim’ Naawuni ŋɔ ni daa chɛ ka bɛ yab’ Aduna zali ba shɛm la.

20Lɛvinim’ bɛn daa kpalim’ yuya m-bɔŋɔ: Amiram bidibisi ni, Shubaɛl n-daa nyɛ kpɛma, Shubaɛl bidibisi ni, Jɛdɛiya n-daa nyɛ kpɛma.

21Rɛhabia daŋ ni, ŋun’ Rɛhabia bidibisi ni, Ishia n-daa nyɛ kpɛma.

22Izar daŋ ni Shɛlomɔt n-daa nyɛ kpɛma, Shɛlomɔt bidibisi ni, Jahat n-daa nyɛ kpɛma.

23Hiburɔn bidibisi ni, Jɛria n-daa nyɛ kpɛma n-zaŋ Amaria pa, ŋun pah’ ata n-daa nyɛ Jahaziɛl, ŋun pah’ anahi n-daa nyɛ Jɛkamiam,

24Uziɛl bidibisi ni, Maika n-daa nyɛ kpɛma, Maika bidibisi ni, Shamir n-daa nyɛ kpɛma.

25Maika mabia Ishia bidibisi ni, Zakaria n-daa nyɛ kpɛma.

26Mɛrari bidibisi ni, Mahili mini Mushi ni Jaazia n-daa nyɛ kpamba Mɛrari daŋ ni.

27Jaazia bidibisi n-daa nyɛ: Shɔham mini Zakur ni Ibiri.

28Mahili bidibisi ni Ɛliɛza ŋun daa bi dɔɣi bidibiga la n-daa nyɛ kpɛma.

29Kish daŋ ni, Kish bia Jɛramiil n-daa nyɛ kpɛma.

30Mushi bidibisi n-daa nyɛ: Mahili mini Ɛda ni Jɛrimɔt. Bɛmbɔŋɔ n-daa nyɛ Lɛvi zuliya maa n-doli bɛ yaannim’ dunoya ni daa nyɛ shɛm.

31Bɛna n-daa lan nyɛ bɛ daŋ ni kpamba, ka sokam min’ o tizo daa pihi kuɣu sɔŋ lihi nya jɛmbu duu tuma maa kaman bɛ mabihi Aduna bihi la gba ni daa niŋ shɛm Dauda mini Zadok ni Ahimɛlɛk ni bɛ daŋ ni kpamba ni maligumaaniba ni Lɛvinim’ zaa ninni la.

← Chapter 23 Jump to: Chapter 25 →