1 Chronicles 21

Dagbani Bible (Naawuni Kundi Kasi)

← Chapter 20 Jump to: Chapter 22 →

1Ka Sintani daa ti yiɣisi lu Izraɛlnim’ zuɣu, m-piɛli Dauda ni o kali Izraɛlnima.

2Di saha ka Dauda daa yɛli Jɔab mini Sapashin’ kpamba, “Chamiya ti kali Izraɛlnim’ zaa, zaŋ Bɛrishiiba hal ti kpa Dan, ka labina ti yɛli ma di ni nyɛ shɛm, ka m baŋ bɛ kalinli.”

3Amaa ka Jɔab daa yɛli, “Yawɛ ni chɛ ka niriba maa galisi pahi ʒiibukɔbiga zuɣu, ka bɛ zaa ni nyɛla n dan’ naa tɔbbihi. Ka bɔzuɣu ka n dan’ naa lan bɔr’ ni o niŋ dimbɔŋɔ yaha? Bɔzuɣu ka n dan’ naa bɔri ni o bo taali ti Izraɛlnima?”

4Amaa ka naa yɛligu maa daa zani, ka chɛ Jɔab dini maa. Di saha ka Jɔab daa yiɣisi chaŋ gili Izraɛl tiŋgbɔŋ ni zaa n-kali niriba maa, ka labi Jɛrusalɛm na

5nti yɛli Dauda niriba maa kalinli ni nyɛ shɛm. Izraɛl tiŋgban’ ni dɔbba bɛn daa naan tooi chaŋ tɔbu tuhibu kalinli daa nyɛla tuhi’ tuhili ni tuhi’ kɔbiga. Ka Juda tiŋgban’ ni mi dɔbba bɛn daa naan tooi chaŋ tɔbu kalinli daa nyɛla ninvuɣ’ tuhi’ kɔbisinahi ni tuhi’ pisopɔin.

6Amaa Jɔab daa bi kali Lɛvi zuliya mini Bɛnjamin zuliya bɛna, dama naa zaligu maa daa bi niŋ o nyaɣisim.

7Ka Naawuni suhu daa bi paligi bɛ ni niŋ shɛm maa zuɣu, ka o daa darigi Izraɛlnim’ tibili.

8Ka Dauda daa yɛli Naawuni, “N tum alahichi pam n ni tum tuun’ shɛli ŋɔ zuɣu. Amaa pumpɔŋɔ n suhir’ a mi, chɛl’ mani ŋun nyɛ a dabili ŋɔ taali, dama n tum jɛrilim pam.”

9Ka Yawɛ daa yɛli Gaad ŋun daa nyɛ Dauda daanab’ la,

10“Cham’ ti yɛli Dauda ni man’ Yawɛ yɛliya: Bin diba ata ka n zal’ a ni a pii di ni zaɣ’ yini, ka n niŋ li ti a.”

11Ka Gaad daa kana ti yɛli Dauda, “Yawɛ ni yɛli shɛm bɔŋɔ, piim’ a ni bɔri shɛli.

12A lee bɔri ni kum n-lu a tiŋgbɔŋ ŋɔ ni yuma ata bee a bɔr’ ni a dimnim’ zaŋ takɔbi kar’ a kpɛhi yɔɣu n-dol’ a chira ata bee a bɔri ni Yawɛ zaŋ takɔbi lu yi zuɣu n-tahi alɔbo a tiŋgbɔŋ ŋɔ ni na daba ata, ka chɛ ka o malaika gili Izraɛl tiŋgbɔŋ ni zaa n-ku niriba? Pumpɔŋɔ piim’ a ni bɔr’ shɛli, ka n labi ti yɛli ŋun tim ma na maa.”

13Di saha ka Dauda daa yɛli Gaad, “Yɛl’ titali paai ma, chɛ ka n kpɛla Yawɛ nuu ni, dama o nambɔzɔbo galisiya pam, amaa di chɛ ka n kpe ninsal’ nuu ni.”

14Di saha ka Yawɛ daa chɛ ka alɔbo lu Izraɛl tiŋgbɔŋ’ ni, ka Izraɛlnim’ ninvuɣ’ tuhi’ pisopɔin daa kpi.

15Ka Naawuni daa chɛ ka malaika chaŋ Jɛrusalɛm ti yɛn wurim li, amaa o ni daa ti yɛn wurim li saha shɛli maa, ka Yawɛ daa nya lala, ka taɣ’ o tɛha zaŋ chaŋ o ni daa yɛn niŋ zaɣ’ biɛ’ shɛli maa polo, ka yɛli malaika so ŋun yɛn wurim li maa, “Di saɣiya; chɛl’ li.” Yawɛ malaika maa daa ʒiɛla Aruna ŋun daa nyɛ Jɛbusi nir’ la kabɔɣili shee.

16Ka Dauda daa kpuɣ’ o zuɣu lihi nya ka Yawɛ malaika maa ʒiɛla tiŋgbani mini zuɣusaa sunsuuni, ka ŋooi takɔbi gbib’ o nuu ni n-teeg’ o nuu maa tiri Jɛrusalɛm. Di saha ka Dauda min’ o kpamba daa chibi kpalansi ye n-lu n-zaŋ bɛ nina kpa tiŋa.

17Ka Dauda daa yɛli Naawuni, “Mani n-zali ni bɛ kalimi niriba maa. Mani n-tum alahichi ka niŋ zaɣ’ biɛɣu maa; ka bɔ ka niriba bɛn ka taali ŋɔ mi lee niŋ? Yawɛ ŋun nyɛ n Naawuni ŋɔ, n suhir’ a, chɛ ka alɔbo ŋɔ kul dila m mini n daŋ niriba kɔŋko; amaa di chɛ ka di di a niriba ŋɔ.”

18Di saha ka Yawɛ malaika maa daa yɛli Gaad ni o yɛlim’ Dauda ni o cham’ ti me sara maligu bimbini zali Yawɛ Aruna ŋun nyɛ Jɛbusi nir’ la kabɔɣili ni.

19Dinzuɣu ka Dauda daa chaŋ ni o ti niŋ Yawɛ ni daa chɛ ka Gaad yɛl’ o ni o niŋ shɛm maa.

20Aruna daa bela o kabɔɣili maa ni buri alikama, ka daa ti ŋmaligi lihi nya malaika maa, ka o bidibis’ anahi bɛn daa be o sani daa zo n-sɔɣi.

21Dauda ni daa chani Aruna sani ka Aruna nya o, o daa yila kabɔɣili maa ni chaŋ ti damd’ o tiŋa n-lu o sizuura,

22Ka Dauda daa yɛli Aruna, “Zaŋm’ a kabɔɣili ŋɔ palo ŋɔ ti ma ka m me sara maligu bimbini ti Yawɛ, kɔhimi li ti ma kaman di daa ni nyɛ shɛm din ni chɛ ka alɔbo ŋɔ miligi ka chɛ niriba maa.”

23Di saha ka Aruna daa yɛli Dauda, “N dana naa, zaŋm’ li niŋ a ni nya ka shɛli viɛl’ a sani, ka lan yɛli, nyama, n zaŋ naɣila’ kɔra ŋɔ ti a ni a zaŋ ba mali bɛ ni zaŋdi sara shɛli nyɔri buɣim la, ka zaŋ kaburi dari ŋɔ mali buɣim, ka zaŋ alikama ŋɔ gba mali sara. N zaŋ di zaa ti a.”

24Amaa ka Dauda daa yɛli Aruna, “Aai, n ni da li mi kaman di daa ni kul nyɛ shɛm. N ku zaŋ binshɛli din nyɛ a dini ti Yawɛ bee n-zaŋ n ni bi da binshɛli m-mali sara shɛli bɛ ni zaŋdi nyɔri buɣim la.”

25Di saha ka Dauda daa yo Aruna salima laɣibaligu kɔbisiyɔbu o kabɔɣili maa zuɣu.

26Ka Dauda daa me sara maligu bimbini ti Yawɛ nimaani, ka mali bɛ ni zaŋdi sara shɛli nyɔri buɣim la mini suhudoo sara, ka daa suhi Yawɛ, ka o deeg’ o suhigu ka chɛ ka buɣim yi zuɣusaa na ti taai bɛ ni zaŋdi sara shɛli nyɔri buɣim maa.

27Di saha ka Yawɛ daa yɛli malaika maa ka o labis’ o takɔbi maa su di tɔɣu ni.

28Dauda ni daa nya ka Naawuni deeg’ o suhigu Aruna Jɛbusi nir’ maa kabɔɣili maa ni maa, ka o daa mali sara nimaani.

29Dama Musa ni daa mali Yawɛ biɛhigu shee du’ shɛli tiŋgban’ nɛli ni la mini sara maligu bimbin’ shɛli zuɣu bɛ ni daa nyɔri sara maligunim’ la daa bela jɛmbu shee din be Gibiɔn la di saha maa.

30Amaa Dauda daa naan ku tooi chaŋ nimaani ni o ti bɔhi Naawuni shɛli yɛla, dama o daa zɔrila Yawɛ malaika la takɔbi la dabiɛm.

← Chapter 20 Jump to: Chapter 22 →