Ecclesiastes 10

Ewe 2014 (EƲEGBE BIBLIA)

← Chapter 9 Jump to: Chapter 11 →

1Nudzodzoe kuku le ami ʋeʋẽe me, nana be amia ʋẽna kũu. Ale movidzɔdzɔ ʋɛ aɖe kpèna wu nunya kple bubu.

2Nunyala ƒe nugɔmesese kplɔnɛ toa mɔ nyuitɔ dzi; ke bometsila ƒe nugɔmesese kplɔnɛ tranae.

3Ne bometsila le zɔzɔm le mɔ dzi yina la, nunya mele tagbɔ nɛ o; eya ta eɖea eɖokui fiaa amewo katã be bometsila yenye.

4Ne wò dziɖula do dɔmedzoe ɖe ŋuwò la, mègadzo le wò teƒe o, elabe ɖokuiléle kpoo tsia vodada gãwo nu.

5Nu tovo aɖe mekpɔ le ɣea te; enye vodada gã. Ede dziɖula ƒe vodada ɖi ge.

6Wotsɔ bometsila ɖo teƒe kɔkɔ ke, eye kesinɔtɔwo bɔbɔ nɔ teƒe gblɔewo.

7Mekpɔ kluviwo le sɔ dzi; ke fiaviwo le afɔ zɔm abe kluviwo ene.

8Ame sia ame si ɖe do la age dze eme, eye ame si le gli gbãm be yeato eme la, eyae da ɖuna.

9Kpegbãlae kpe sina, eye nakedzelae xɔa abi.

10Ne lãnu tsi kpo, eye womenyre enu o la, ele be woada abɔkame sesĩe; ke nunyae hea dzidzedze vanɛ.

11Ne da ɖu ame vɔ hafi wole gbe sam doe la, ekema viɖe aɖeke mele gbesala ŋu o.

12Nunyala ƒe numenya na wovea enu; ke bometsila ƒe nuyiwo hea tsɔtsrɔ̃ vɛ nɛ.

13Bometsila ƒe numenya dzea egɔme kple bometsinya, eye eƒe nuƒoƒo wua enu kple aɖaʋanya baɖawo sɔŋ.

14Evɔ la, eƒoa nu kpoloe madzudzɔmadzudzɔe. Ame aɖeke menya nu si ava dzɔ o. Ame kae ate ŋu agblɔ nu si etsɔ ahe vɛ?

15Bometsila ƒe dagbadagba nana be ɖeɖi tea eŋu; elabe menya mɔ si wòato ayi du me gɔ̃ hã o.

16Ao! Anyigba, baba na wò ne wò fia nye ŋutsuvi ko, eye wò dumegãwo tsona ɖe nuɖuɖu ŋu le ŋdi!

17Anyigba, woyra wò, ne wò fia nye bubume, eye wò dumegãwo yia kplɔ̃ ŋu le ɣeyiɣi nyuitɔ dzi be yewoaɖu nu akpɔ ŋusẽ, menye be woamu aha o.

18Ðekematsɔleme nana be xɔta nyéna ɖe eme, eye kuviawɔwɔ nana be xɔ ɖuɖua tsi.

19Nukoko tae woɖoa nuɖukplɔ̃ ɖo; wain doa dzidzɔ ɖe agbe ŋu, eye ga nana be ame kpɔa eƒe nu hiahiãwo katã.

20Mègake nu ƒo fi de fia le susu me gɔ̃ hã o. Nenema ke mègaƒo fi de gatɔ le wò xɔdɔme kekeake me o, elabe xevi alo nu dzodzoe aɖe ate ŋu aɖakaka nya la.

← Chapter 9 Jump to: Chapter 11 →