1 Kings 10

Guarani 2015 (Ñanderuete Ñe’ẽ Porã 2015)

← Chapter 9 Jump to: Chapter 11 →

1Peteĩ kuñakarai, Saba retã ruvicha, ohendúvo pe terakuã porã Salomón ohupitýva Ñanderuete réra rupi, ou oha’ã (oprova) hag̃ua ichupe porandu hasýva reheve.

2Ha’e ou Jerusalénpe heta caméllo ha hembiguái ndive, ha ogueru hetaiterei óro ha ita vera iporãva, ha og̃uahẽvo Salomón rendápe oporandu opaite mba’e ombosako’iva’ekue guive ipy’apýpe.

3Ha Salomón ombohovaipaite ichupe oporanduva’ekue guive, ha iporandu apytépe ndaipóri peteĩnte jepe tetã ruvicha ndikatúiva ombohovái.

4Pe kuñakarai, Saba retã ruvicha, ohechávo opaite Salomón arandu, ha hogaguasu omopu’ãmava’ekue,

5imesa rembi’u, imburuvichakuéra koty, hembiguaikuéra resãi, ijao jegua, hembiguái ruvichakuéra, ha umi kuave’ẽmby oikuave’ẽva hikuái Ñanderuete rogaguasúpe, opyta ipy’andýi ha ijurujái.

6Ha he’i tetã ruvichápe: Añete ningo ra’e opaite mba’e che ahendumava’ekue che retãme nde rekove ha ne arandu rehe,

7ha che ndagueroviaséi, upévare aju ahecha hag̃ua che resatee rupi, noñemombe’úi katu chéve mbyterénte jepe ra’e, ituichaiteve ne arandu, nde py’aporã ha ne rerakuã porã ahenduva’ekuégui.

8Ovy’aite ningo ko’ã kuimba’e ha umi ne rembiguái, tapia oikokuaáva ne renondépe, ha ohendukuaáva ne arandu.

9Nde Jára, pende Ruete, toñemomba’eguasu; Ha’e nderayhúgui nemoĩma Israel guapyhaguasúpe; Jahve ohayúgui Israélpe nemoĩma hetã ruvicha ramo, reisãmbyhy hag̃ua hekópe ha rembojovake porã hag̃ua.

10Ha ome’ẽ tetã ruvichápe 4020 kílo óro, ha heta mba’e ryakuã porã ha ita vera iporãva, ha peichagua mba’e ryakuã asyetereíva, ko kuñakarai Saba retã ruvicha ome’ẽ haguéicha tetã ruvicha Salomónpe, araka’eve ndojegueruvéi ichupe g̃uarã.

11Hiram barco guasukuéra ogueru avei óro Ofírgui, hetaiterei yvyra sándalo ha ita vera porãva.

12Ha ko sándalo yvyrágui Salomón ojapouka escaléra Ñanderuete rogaguasúpe ha tetã ruvicha rógape, ha ojapouka avei árpa ha mbarakakuéra umi opurahéivape g̃uarã, araka’eve ndouvéi peichagua sándalo yvyra, ni ndojehechavéi ko ára kóva peve.

13Ha tetã ruvicha Salomón ome’ẽ pe kuñakarai, Saba retã ruvichápe, opaite mba’e ha’e oipotáva ha ojeruréva guive; hi’ári Salomón ome’ẽ avei heta jopói ichupe, upéi ha’e ojevy hetãme hembiguaikuéra ndive.

14Pe óro oñeme’ẽva Salomónpe cáda áñope ohupity 22.311 kílo (impuésto ramo),

15ojepapa’ỹre umi ñemuharaguasu me’ẽmby, umi ñemuhára michĩva me’ẽmby, umi Arábia retã ruvicha ha ambue tetã ruvichakuéra me’ẽmby.

16Salomón ojapouka avei 200 ñorãirõhára rete mo’ãha tuicháva óro oñenupãmbyrégui, ha peteĩteĩ mo’ãha rehe ojeporu 6,7 kílo óro.

17Upéicha avei ojapo 300 tete mo’ãha michĩva óro ñenupãmbyrégui, ha peteĩteĩ rehe ojeporu 3,35 kílo óro, ha tetã ruvicha omoĩmba peteĩ ógape, hérava Líbano ka’aguy róga.

18Salomón ojapouka avei peteĩ tetã ruvicha guapyhaguasu elefánte raĩnguégui ha oñu’ãmba (ombyapeuka) órope.

19Pe tetã ruvicha guapyhaguasu oguereko 6 pyenda ojejupi hag̃ua (escaléra), ha pe guapyhaguasu ijyvatevehápe oguereko peteĩ mba’e apu’a ojeko hag̃ua pe akã, ha pe guapyhaguasu ykére oĩ mokõi jokoha tetã ruvicha omombytu’u hag̃ua ijyvakuéra, ha umía ykére jevy oñemohenda mokõi leõ.

20Ha omohenda avei 12 leõ umi 6 pyenda ojejupiha ári, 6 asu gotýo ha 6 akatúa gotýo, ha mamovete ambue tetã rupi ndojejapoiva’ekue koichagua guapyhaguasu.

21Ha opaite váso tetã ruvicha Salomón oiporúva ojejapo órogui, upéicha avei imba’yrukuéra ojeporúva pe Líbano ka’aguy rógape ojejapo avei óro porãgui, mba’eve ndojejapói plátagui, péva ndojehayhúigui Salomón oisãmbyhyha arakuérape.

22Tetã ruvicha oguereko avei heta barco guasu yguasu pegua ohóva Hiram barco guasu ndive, ha ohasa mbohapy áño ou jevy peve, ha ogueru hikuái: óro, pláta, elefánte raĩngue, ka’i ha pávo real.

23Péicha tetã ruvicha Salomón ohasapa opaite tetã ruvichakuéra yvy ariguápe mba’erepy rerekoha ramo ha arandúpe.

24Opaite tetãyguakuéra oñeha’ã ohecha hag̃ua Salomón rova, ohendu hag̃ua iñarandu, Ñanderuete omoĩva’ekue ipy’apýpe.

25Cáda áñope ojegueru ichupe jopoieta, jeguaka óro ha plátagui, ao, ñorãirõ rembiporu, mba’e ryakuã porã, kavaju ha mburikakuéra.

26Salomón ombyaty ñorãirõ carrokuéra ha soldádo kavaju ariguakuéra, ha’e oguereko 1.400 cárro, ha 12.000 kavaju arigua, ko’ãva omoĩ umi táva ombosako’i haguépe, ha tetã ruvicha ndive, Jerusalen ypýpe.

27Tetã ruvicha Salomón ombyaty heta pláta oñembyaty háicha itakuéra, ha ombyaty cédro róllo ku hígo yvyráicha, oĩva Sefela nũguasúpe.

28Ñemuharakuéra Egíptogui ogueru Salomónpe g̃uarã kavajukuéra ha aorã.

29Salomón tekotevẽ ome’ẽ peteĩ cárro rehe 6,7 kílo pláta ha peteĩ kavaju rehe ome’ẽ 1,67 kílo pláta; ha ichugui Hetgua ha Síria retã ruvichakuéra ojogua jevy.

← Chapter 9 Jump to: Chapter 11 →