1 Kings 3

Guarani 2015 (Ñanderuete Ñe’ẽ Porã 2015)

← Chapter 2 Jump to: Chapter 4 →

1Salomon oñemopehẽnguéma faraon, Egiptoygua ruvicha rehe, ha ogueru faraon rajy David távape, omopu’ãmba aja hogarã, Ñanderuete róga ha táva tápia yvate Jerusalén jere rehe.

2Upéramo tetã ruvicha oikuave’ẽ gueteri oikóvo umi yvy ijyvateveha rupi, umi árape ndaipórigui gueteri Ñanderuete rogaguasu Jerusalénpe.

3Salomón ohayhu Ñanderuetépe ha oiko itúva David he’i haguéicha ichupe, oikuave’ẽ ha ohapy mba’e ryakuã porã umi yvy yvateha rupi Ñanderuetépe g̃uarã.

4Ha tetã ruvicha oho jepi Gabaónpe, péva ningo pe yvy yvate oñemotenondevéva, ha upépe Salomón oikuave’ẽ 1000 kuave’ẽmby ojehapypáva pe kuave’ẽmby renda ári.

5Ha Gabaónpe, peteĩ pyharépe, Ñanderuete ojehechauka Salomónpe iképe, ha he’i ichupe: Ejerure reipotáva guive ha Che ame’ẽta ndéve.

6Ha Salomon he’i: Nde reiporiahuvereko tuicha ne rembiguái David, che rúpe, ha’e oikógui añetehápe ne renondépe, teko porãme ha py’a potĩme. Nde reñangareko hese, Nde reiporiahuverekógui ichupe, reme’ẽvo ichupe peteĩ ta’ýra oguapy hag̃ua iguapyhápe, ko árape ojehu háicha.

7Ko’ág̃a, che Jaratee, Nde nemboguapy, ne rembiguáipe tetã ruvicha guapyhápe, che ru David rendaguépe, ha chemitã gueteri, ha ndaikuaái mba’éichapa aisãmbyhy porãva’erã.

8Ha ne rembiguái oiko ne retã nde reiporavova’ekue apytépe, peteĩ tetã ndetuichaitéva ndaikatuvéimava ojepapa hetaitereígui.

9Eme’ẽmína chéve, ne rembiguáipe, akãporã ha akãguapy aikuaa hag̃ua mba’éichapa ambojovakeva’erã hekoitépe ne retãyguakuérape, ha ahechakuaa hag̃ua ivai ha iporãva; mávapa ikatu oisãmbyhy ijehegui reínte ne retã tuichaitévape.

10Ko Salomón mba’ejerure ombohory Ñanderuetépe.

11Ha Ñanderuete he’i ichupe: Rejerurégui ko’ã mba’e ha nderejeruréigui ndejupe g̃uarã reikove puku hag̃ua, ni nderejeruréigui pirapire, ni nderehe ija’e’ỹva rekove rehe rejerurégui ndejupe g̃uarã akãporã ha akãguapy rembojovake porã hag̃uánte,

12upévare ajapóta ne ñe’ẽ, rejerure haguéicha, ame’ẽmbáta ndéve akãporã ha akãguapy rehechakuaa hag̃ua ndaiporiha ndeichagua iñarandúva, ne mboyve ni nde rire.

13Ha ame’ẽta avei ndéve umi mba’e nde rejerure’ỹva’ekue: Pirapire ha verapy. Ha nde rekove pukukue aja ndaiporimo’ãi ambue tetã ruvicha ndeichagua.

14Ha nde reiko ramo che rape rehe ha rejapo ramo che ñe’ẽ ha che rembiapoukapy, nde ru David ojapo haguéicha, che ambopukúta avei nde rekove.

15Ha Salomón opáyvo ha ohechakuaa iképente hague, ou Jerusalénpe, Ñanderuete karameg̃ua oĩháme, ha oikuave’ẽ kuave’ẽmby ojehapypáva ha kuave’ẽmby py’aguapy reheguáva, ha ojapo avei karuguasu mayma hembiguaikuérape g̃uarã.

16Umi árape ou tetã ruvicha rógape mokõi kuña heko vaíva, ha oñemboja hikuái hendápe.

17Ha peteĩva he’i: Che jára, che ha ko kuña roikoroína peteĩ ógape, ha che aju chememby aĩ aja hendive.

18Ha ojehu chememby rire mbohapy ko’ẽ haguépe, ha’e ou imemby avei, ha ore roiko oñondive, avave okaygua noĩri orendive, ore mokõinte.

19Ha peteĩ pyharépe ko kuña memby omano, ha’e oñenógui hi’ári.

20Ha opu’ã pyhare pyte ha ojapyhy che memby che ykéregui, che, ne rembiguái, ake aja, ha omoñeno ijykére, ha imemby re’õngue omoĩ che ykére.

21Ha che apu’ã amokambu hag̃ua ko’ẽju jave, péina omanora’e; ko’ẽmba rire katu ama’ẽ porã hese, ha ahecha ndaha’eiha che memby che agueruva’ekue yvy apére.

22Upévo ambue kuña he’i: Nahániri, che memby pe oikovéva, ha ne memby pe omanóva. Ha ambue kuña he’i: Nahániri, ne memby pe omanóva, ha che memby pe oikovéva. Péicha oñoñe’ẽapi hikuái tetã ruvicha renondépe.

23Upémaramo tetã ruvicha he’i: Kóa he’i, che memby pe oikovéva ha ne memby omanókuri, ha pe ambue katu he’i: Nahániri, ne memby omanókuri, ha che memby pe oikovéva.

24Upévare tetã ruvicha he’i: Pegueru chéve peteĩ kyse puku. Ha ogueru hikuái tetã ruvichápe peteĩ kyse puku.

25Ha upévo tetã ruvicha he’i: Pemboja’o mbyte rupi pe mitã oikovéva, ha peme’ẽ peteĩteĩme imbytere.

26Upévo pe kuña, pe mitã oikovéva sy, oñe’ẽ tetã ruvichápe hi’angapy angekõigui imemby rehe, ha he’i: Che jára eme’ẽnte che rapichápe pe mitã oikovéva, ha ani rejukátei. Ambue kuña katu he’i: Tachemba’e’ỹ ni tanemba’e’ỹ, pemboja’o katu.

27Upémaramo tetã ruvicha he’i jevy: Peme’ẽ amóvape pe mitã oikovéva, ha ani pejukátei, ha’e voi isy.

28Ha opaite Israelgua ohendúvo mba’éichapa tetã ruvicha oporombojovakéra’e, ojekyhyjepa tetã ruvichágui, ipype oĩgui Ñanderuete arandu ombojovake porã hag̃ua hetãyguakuérape.

← Chapter 2 Jump to: Chapter 4 →