1 Kings 14

Guarani 2015 (Ñanderuete Ñe’ẽ Porã 2015)

← Chapter 13 Jump to: Chapter 15 →

1Umi ára umívape Jeroboam ra’y, Abías, ho’a hasy.

2Ha Jeroboam he’i hembirekópe: Epu’ã ko’ág̃a ha emonde ambue ao, ani hag̃ua ndekuaa nde Jeroboam rembirekoha, ha tereho Sílope, upépe oiko pe proféta Ahías, pe he’imava’ekue chéve chetaha ko tetã ruvicharã.

3Ha ejapyhy nde pópe 10 pan, pan he’ẽva, peteĩ eíra ryru, ha tereho hendápe ha’e oikuaauka hag̃ua ndéve mba’épa oikóta ko mitãgui.

4Ha Jeroboam rembireko péicha ojapo; opu’ã ha oho Sílope, ha og̃uahẽ Ahías rógape. Ahías ndohechavéima, hesa iñypytũgui.

5Ha Ñanderuete katu he’íma Ahíaspe: Eikuaa porãke Jeroboam rembireko outaha omba’eporandúvo ndéve imemby hasy katúva rehe, péicha ha péicha eréta ichupe. Ág̃a ha’e oúvo, oúta ambue ñemondepyre reheve.

6Ahías ohendúvo ipy ryapu, ha’e og̃uahẽ mboyve hóga rokẽme, he’i ichupe: Eike nde, Jeroboam rembireko. Mba’érehepa reiko gua’u ambue ramo. Péina areko ndéve marandu ipohýiva.

7Tereho ha ere Jeroboámpe: Péicha he’i Israel Jára: Che voi romopu’ã tetãyguakuéra apytégui, ha romoĩ mburuvichaguasu ramo che retã Israel ári.

8Ha David rógagui aipe’áma pe tetã ruvicha guapyha ha ame’ẽma ndéve, ha nde ndereikói che rembiguái David oiko haguéicha, ha’e ojapova’ekue che rembiapoukapy, ha oiko che rapykuéri ipy’aite guive, ojapo mba’e iporãva che resa renondépe.

9Ne rembiapo ivaieteve nde ypykuéragui, nde reho remomba’eguasu hag̃ua ambue járape ha rejapo ta’ãnga mba’e hykupyrégui chembopochy hag̃ua, ha chéve chemombo nde atukupe gotýo.

10Upévagui, eikuaa porãke, Che aguerúta mba’evai Jeroboam róga ári, ha ahundíta opaite Jeroboam kuimba’e oikóva guive, taha’e tembiguái térã tembiguai’ỹ Israelpýpe, ha aitypeipáta hogaygua ra’ykuérape ojetypeipa háicha tymba repoti.

11Umi Jeroboam rogaygua omanóva távape, jaguakuéra ho’úta; ha umi omanóva ñúme, guyra yvate ovevéva ho’úta, Ñanderuete voi oipotágui péicha.

12Ha nde, epu’ã ha tereho nde rógape, ha nde py oikévo nde rógape ne memby omanóta.

13Ha mayma Israelgua oguerombyasýta ha oñotỹta ichupe, opaite Jeroboam rogayguakuéra apytégui kovamínte oñeñotỹta, ojejohúgui ipype mba’e porãmi Israel Jára renondépe.

14Ha Ñanderuete omopu’ãta ambue Israel ruvicharã, ha péva ohundíta Jeroboam róga, pe ára Ñanderuete oiporavótavape, ha pe ára péva hi’ag̃uietereíma.

15Ñanderuete ombokacháta Israélpe, ku ysyry ombokacha háicha takuára rakãnguéra ha Ha’e oipe’áta Israélpe ko yvy porãitégui, ame’ẽmava’ekue ituvakuérape, ha omosarambíta ichupekuéra Éufratesgui amo gotyove, ojapo ha omomba’eguasúgui hikuái Asera ra’ãngakuéra, ha péicha ombopochy pende Ruete.

16Ha’e oitýta Israélpe, Jeroboam angaipa rupi, ha’e omoangaipágui avei Israelguakuérape.

17Upémaramo Jeroboam rembireko opu’ã ha oho, ha ou Tirsápe, ha oikévo hokẽ pyrũháme omano imemby.

18Ha oñotỹ hikuái, ha mayma Israelgua oguerombyasy, Ñanderuete he’i haguéicha iproféta Ahías juru rupi.

19Ambue Jeroboam rembiapokue, umi ñorãirõ ojapomava’ekue, ha mba’eichaitépa oisãmbyhýra’e ojehaipa Israel retã ruvichakuéra rembiapo kuatiañe’ẽme (Crónicas kuatiañe’ẽme).

20Jeroboam oisãmbyhy 22 áño, ha’e omano rire, ita’ýra Nadab oisãmbyhy hendaguépe.

21Roboam, Salomón ra’y, oisãmbyhy Juda retãme. Roboam oguereko 41 áño oñepyrũ ramo oisãmbyhy, ha 17 áño oisãmbyhy Jerusalénpe, pe táva Ñanderuete oiporavova’ekue opaite Israel tavakuéra apytégui, oñemomba’eguasu hag̃ua héra porãite hogaguasúpe. Isy réra Naama, peteĩ Amongua.

22Ha Judayguakuéra ojapo ivaíva Ñanderuete resa renondépe, hi’angaipakuéra rupi ha’e ombopochyetereive ichupe ituvakuéragui.

23Israelguakuéra omopu’ã avei opaite yvy yvatépe ha yvyra ikuarahy’ã porãvéva guýpe ijára gua’u ha Asera ra’ãngakuéra.

24Ha oĩ avei Sodomaygua rembiapo vaiete Israel retãme ha ojapo hikuái opaichagua tembiapo ahẽva ambue tetãnguéra ojapo háicha, umi tetã umía Ñanderuete ohundiva’ekue Israelguakuéra renondégui.

25Roboam oisãmbyhývo 5 áño tetã ruvicha ramo; Sisac, Egípto retã ruvicha, ojupi Jerusalénpe ha ombopoguy pe távape.

26Ha ogueraha Ñanderuete róga mba’erepyeta, ha tetã ruvicha rógagui avei, ha omondapa, ogueraha avei opaite tete mo’ãha oroguiguáva Salomón ojapoukava’ekue.

27Ha umía rendaguépe tetã ruvicha Roboam ojapouka ambue tete mo’ãha bróncegui, ha ome’ẽ itahachi ruvichakuérape, oñangarekóva tetã ruvicha róga rokẽ rehe.

28Pe tetã ruvicha oike ramo Ñanderuete rógape, umi tahachi oiporu umi tete mo’ãha, ha oho rire oñongatu jevy ikotýpe.

29Ambue Roboam rembiapokue ojapova’ekue guive ojehaipa umi Juda retã ruvichakuéra rembiapokue kuatiañe’ẽme (Crónicas).

30Ha Roboam ha Jeroboam oikove aja oñorãirõ oñondive.

31Ha Roboam omano rire, oñeñotỹ ichupe ituvakuéra ykére, David távape. Isy hérakuri Naama, peteĩ Amongua. Ha hendaguépe oisãmbyhy ita’ýra Abiam.

← Chapter 13 Jump to: Chapter 15 →