1 Kings 22 — Guarani 2015 (Ñanderuete Ñe’ẽ Porã 2015)

1Mbohapy año Síria ha Israel retãnguéra ohasa oñorãirõve’ỹre oñondive.

2Ha ojehu pe áño mbohapyhápe, Josafat, Juda retã ruvicha, oguejy Israel retã ruvicha rendápe.

3Ha Israel retã ruvicha he’i hembiguaikuérape: Ndapeikuaáipa Ramot, Galaad pegua, ñane mba’eha, ha ñande ndajajapói mba’eve jaipe’a jevy hag̃ua Síria retã ruvicha pógui.

4Ha Acab he’i Josafátpe: Rejusépa chendive ñarãirõ hag̃ua Ramot, Galaad peguápe. Ha Josafat he’i Israel retã ruvichápe: Che ningo ndeichagua, ha che retãyguakuéra ne retãyguaichagua avei, ha che kavajukuéra nde kavajukueraichaguánte avei.

5Upérõ Josafat he’i Israel retã ruvichápe: Che ajerure ndéve ko árape, emba’eporandu raẽ Ñanderuetépe.

6Uperire Israel retã ruvicha ombyatyuka umi proféta, ha ombyaty rire 400 kuimba’e, he’i ichupekuéra: Ahátapa ajeitývo Ramot, Galaad pegua ári, térãpa ahejáta. Ha’ekuéra he’i: Ejupi, Ñanderuete voi omoĩta Ramot retã ruvicha nde pópe.

7Josafat katu oporandu (Acábepe): Oime piko gueteri árupi ambue proféta, ha’érupi ikatu ñamba’eporandu porã Ñanderuetépe.

8Israel retã ruvicha he’i Josafátpe: Oime gueteri peteĩ kuimba’e ikatúva omba’eporandu porã Ñanderuetépe, Miquéas, Imla ra’y; che katu ndache’a’éi hese, araka’eve nomombe’úigui chéve mba’eporã, ivaívamante. Ha Josafat he’i: Anítei tetã ruvicha péicha reñe’ẽ.

9Upéramo tetã ruvicha ohenói peteĩ soldádo ruvichápe ha he’i ichupe: Pya’e egueru Miquéas, Imla ra’ýpe.

10Israel retã ruvicha ha Josafat, Juda retã ruvicha, oguapy hikuái iguapyhakuérape ha oñemonde tetã ruvicha aópe, ha oĩ hikuái pe pláza Samária rokẽ ojeikehápe, ha opaite umi proféta omba’emombe’u joa henondepekuéra.

11Ha Sedequías, Quenaana ra’y, ojapo mokõi vaka ratĩ hiérrogui, ha he’i: Ko’ã vaka ratĩme reikutúta Siriayguakuérape rehundipa peve.

12Ha opaite proféta upeichaite oprofetiza avei, ha he’i hikuái: Ejupi Ramot, Galaad peguápe, ha resẽ porãmbáta, Ñanderuete omoĩta ichupekuéra tetã ruvicha pópe.

13Pe ohova’ekue Miquéas renóivo, oñe’ẽ ichupe he’ívo: Péina ápe umi proféta peteĩ ñe’ẽme omoherakuã mba’eporã tetã ruvichápe; eñe’ẽkena nde avei ha’ekuéraicha, emoherakuã avei osẽ porãmbataha.

14Ha Miquéas he’i: Ñanderuete rérape, che ha’emanteva’erã, Ha’e he’íva guive chéve.

15Ha Miquéas og̃uahẽvo tetã ruvicha rendápe, Acab he’i ichupe: Miquéas, rohótapa rojeity Ramot, Galaad pegua ári, térãpa rohejáta. Ha’e he’i ichupe: Ejupi ha oho porãmbáta, ha Ñanderuete omoĩta pe táva péva tetã ruvicha pópe.

16Ha tetã ruvicha he’i ichupe: Araka’e pevépa ha’eva’erã ndéve remombe’u hag̃ua chéve pe añetegua, Ñanderuete rérape.

17Upémaramo ha’e he’i: Che ahechákuri opaite Israelguakuéra oñemosarambi ramo cerrokuéra rehe, ku ovecha herekua’ỹvaicha, ha Ñanderuete he’i: Ko’ãva ndaijárai, peteĩteĩ toho jevy hógape py’aguapy reheve.

18Ha Israel retã ruvicha he’i Josafátpe: Nda’éi piko ndéve ra’e, ndoprofetizaiha chéve g̃uarã mba’eveichagua mba’e porãva, ivaívamante.

19Upémaramo ha’e he’i: Ehendu Ñanderuete ñe’ẽ: Che ahecha Ñanderuetépe oguapy ramo iguapyha guasúpe, ha opaite yvága rembiguái oĩmba ijypýpe, ijakatúa ha ijasu gotýo.

20Ha Ñanderuete oporandu: Mávapa oipy’ara’ãta Acábepe ojupi hag̃ua Ramot, Galaad peguápe, ha’e ho’a hag̃ua upépe; ha peteĩ yvága rembiguái he’i peteĩ mba’e ha ambue he’i ambue mba’e.

21Ha ipahápe oñemboja peteĩ yvága rembiguái Ñanderuete renondépe, ha he’i: Che aipy’ara’ãta ichupe. Ha Ñanderuete he’i ichupe: Mba’éichapa.

22Ha’e he’i: Che aháta ha oikóta pytu japu ramo opaite iprofetakuéra juru rupi. Ha ha’e he’i: Nde reipy’ara’ãta, ha rehupitýta avei umi mba’e reipotáva, tereho ha ejapo nde ere háicha.

23Upévare Ñanderuete ko’ág̃a omoĩma pytu japu opaite nde proféta jurúpe, Ñanderuete he’ímagui nde hóra paha og̃uahẽtamaha.

24Upémaramo oñemboja Sedequías, Quenaana ra’y, ha oinupã Miquéaspe hova yképe ha he’i: Mamo rupi piko oho chehegui Ñanderuete Pytu Porãitéva oñe’ẽ hag̃ua ndéve.

25Ha Miquéas he’i jevy: Eikuaa porãke nde voi rehecháta upe árape, reike ha resẽ rehóvo peteĩ kotýgui ambue kotýpe rekañy jave.

26Upéramo Israel retã ruvicha he’i: Pejapyhy Miquéaspe, ha pegueraha Amon, pe táva sãmbyhyhára, ha Joas, retã ruvicha ra’y rendápe.

27Ha eréta, péicha he’i tetã ruvicha: Kóvape peity cárcelpe, ha peme’ẽta ichupe michĩmi pan ha ymimi, che aju jevy peve py’aguapýpe.

28Ha Miquéas he’i: Nde reju jevy ramo py’aguapy reheve, Ñanderuete noñe’ẽi che juru rupi. Ha hapykuépe he’i jevy: Pejapysaka porãkena opaite tetãyguakuéra che ha’eva’ekue rehe.

29Acab, Israel retã ruvicha, oho (ojupi) Josafat, Juda retã ruvicha ndive, Ramot, Galaad peguápe.

30Ha Israel retã ruvicha he’i Josafátpe: Che añemonde ambuéta, ha péicha aikéta ñorãirõme, nde katu emonde nde aokuéra. Ha Israel retã ruvicha omonde ao ambue, ha oike ñorãirõme.

31Ha Síria retã ruvicha he’i umi 32 ñorãirõ cárro ruvichápe: Ani peñorãirõ tuicháva ni michĩva ndive, pejeitýnte Israel retã ruvicha ári.

32Ha umi cárro ruvichakuéra ohechávo Josafátpe he’i: Añetehápe péva ningo Israel retã ruvicha ha ou hikuái hendápe ojeity hag̃uáicha hi’ári, ha tetã ruvicha Josafat hatã osapukái.

33Ha ko’ã cárro ruvicha ohechávo ndaha’eiha Israel retã ruvicha, ojei hikuái ijypýgui.

34Ha peteĩ kuimba’e opoi reimínte ihu’y iguyrapágui ha ojapi Israel retã ruvichápe isoldádo pyti’a mo’ãha ha ijopyha pa’ũme, ha upévagui Acab he’i icárro mboguatahárape: Ejere, ha cherenohẽ ko’águi, ajejapíma.

35Ha pe ñorãirõ ipohyive ohóvo pe árape, upévare tetã ruvicha Acab oñembo’yhína Siriayguakuéra renondépe icárrope, ha ka’aruetévo katu omano; ha huguy osyry pe cárro ryepýre.

36Pe kuarahy oikévo osẽ peteĩ ñe’ẽnduka, he’íva: Peteĩteĩva toho itavakuérape ha itríbu yvýpe,

37omanómagui tetã ruvicha, ha hetekue ojegueru Samáriape, ha oñeñotỹ upépe.

38Ha ojejohéi icárro Samária ykuápe, umi kuña reko vaíva ojahuhápe ha upépe jaguakuéra oheréi huguy, Ñanderuete he’i haguéicha.

39Ha ambue Acab rembiapokue ojapova’ekue guive, ha pe óga elefánte rãingueguigua ha tavakuéra ha’e omopu’ãva’ekue ojehaipa Israel retã ruvichakuéra rembiapokue kuatiañe’ẽme (Crónicas).

40Ha Acab omano rire, ita’ýra Ocozías oisãmbyhy hendaguépe.

41Acab oisãmbyhývo irundy (4) áño tetã ruvicha ramo, Josafat, Asa ra’y, oñepyrũ oisãmbyhy Juda retãme.

42Josafat oñepyrũvo oisãmbyhy oguerekóma 35 áño, ha oisãmbyhy Jerusalénpe 25 áño. Isy réra Azuba, Silhi rajy.

43Ha’e oiko opaite itúva Asa rape rehe, opia’ỹre ichugui, ojapóvo mba’e iporãva Ñanderuete resa renondépe.

44Upeichavéramo jepe, ndojepe’ái umi ñemomba’eguasu yvy yvatépe; tetãyguakuéra oikuave’ẽgui ha ohapýgui gueteri mba’e hyakuã porã upérupi.

45Ha Josafat oiko jekupytýpe Israel retã ruvicha ndive.

46Ambue Josafat rembiapokue, ipy’aguasúva rembiapo, ha iñorãirõnguéra ojapova’ekue ojehaipa umi Juda retã ruvichakuéra rembiapokue kuatiañe’ẽme.

47Oitypei avei tetãpýgui umi Sodomayguápe (kuimba’e oñenóva kuimba’e ndive), hembyva’ekue gueteri itúva Asa oikove ramoguare áragui.

48Upejave Edómpe ndaipóri tetã ruvicha, ho’águi Judayguakuéra poguýpe.

49Josafat ojapova’ekue avei barco guasu umi Tarsis peguáicha, oho hag̃ua Ofírpe óro rekávo, nog̃uahẽi katu hikuái oñembyaipágui Ezión-géberpe.

50Upémaramo Ocozías, Acab ra’y, he’i Josafátpe: Ehejána che rembiguaikuéra toho nde barco guasukuérape. Ha Josafat ndoipotái.

51Ha Josafat omano rire, oñeñotỹ ichupe, itúva David távape, ha Joram, ita’ýra oisãmbyhy hendaguépe.

52Ocozías, Acab ra’y, oñepyrũ oisãmbyhy Israélpe, Samária táva guive; Josafat, Juda retã ruvicha, oisãmbyhýma ramo 17 áño Juda retãme, Ocozías oisãmbyhýnte mokõi áño.

53Ha ojapo mba’e ivaíva Ñanderuete resa renondépe, ha oiko itúva ha isy rape rehe, ha Jeroboam, Nebat ra’y rape rehe, ha omoangaipa avei Israelguakuérape.

54Ha oiko Baal rembiguái ramo, ha omomba’eguasu ichupe, upéicha ombopochy Israel Járape, itúva ojapo hagueichaite.