1 Kings 4

Guarani 2015 (Ñanderuete Ñe’ẽ Porã 2015)

← Chapter 3 Jump to: Chapter 5 →

1Tetã ruvicha Salomón oisãmbyhy opaite Israelguakuérape.

2Ha ãva hína ipytyvõhára: Azarías, pa’i Sadoc ra’y,

3Elihóref ha Ahías, Sisa ra’ykuéra, ikuatiañe’ẽ haiharakuéra; Josafat, Ahilud ra’y, omomandu’apáva tetã ruvichápe.

4Benaía, Joiada ra’y, isoldádo aty ruvicha ramo; Sadoc ha Abiatar, ipa’ikuéra ramo.

5Azarías, Natan ra’y, opyta mburuvichakuéra ruvicha ramo. Zabud, Natan ra’y, omoirũ tetã ruvichaguasúpe opaite hembiapópe ha hi’angirũ avei;

6Ahisar oiko hogayguakuéra ruvicha ramo; ha Adoniram, Abda ra’y, opyta impuésto cobraha ruvicha ramo.

7Salomón oguereko 12 tríbu mburuvichaguasu omongarúva Salomón ha hogayguakuérape. Peteĩteĩva omoĩva’erã pe tembi’u tetã ruvichápe g̃uarã peteĩ jasy pukukuénte cáda áñope, Israel retãgui.

8Ha péicha herakuéra: Ben Hur, Efrain cérrogui.

9Ben Decar, Macázpe, ipoguýpe opyta Saalbim, Bet-semes ha Elon Bet-hanan peve,

10Ben Hésed Arubótpe, ipoguýpe opyta Soco ha opaite Hefer yvy.

11Ben Abinadab, opaite Dor yvy opyta ipoguýpe, hembireko Tafat, Salomón rajy.

12Baana, Ahilud ra’y, ipoguýpe opyta Taanac, Megído ha Bet-sean, oĩva Saretan ypýpe, Jizreel yvy gotýo, Bet-sean guive Abel-mehola peve, ha Jocmeam mboypýri peve.

13Ben Geber, Ramot Galaad peguápe, kóva poguýpe oĩ Jair ha Manases táva, oĩva Galaad yvýpe, ipoguýpe oĩ avei Argob, Basan yvýpe, 60 táva tuicha, itápia yvate ha oñemboty porãva iñembotyha bronceguiguápe.

14Ahinadab, Iddo ra’y Mahanaim peguápe,

15Ahimaas, Neftalípe, kóva omenda Basemat, Salomón rajy rehe.

16Baana, Husai ra’y, Aser ha Alot yvýpe;

17Josafat, Parua ra’y, Isacar yvýpe;

18Simei, Ela ra’y, Benjamin yvýpe;

19Géber, Uri ra’y, Galaad yvýpe, Sehon yvykuépe, Amorgua retã ruvicha mba’ekue, ha Og, Basan retã ruvicha mba’ekue, ituicha ramojepe ko yvy kóva opytapa ipoguýpente.

20Juda ha Israel retãygua hetaiterei ku yvyku’i yguasu rembe’y peguáicha, ha’ekuéra okaru porã, hoy’u ha ovy’a joa.

21Ha opaite tetãnguéra ysyry Éufrates guive Filisteaygua retã ha Egípto rembe’y peve, ogueru impuésto Salomónpe, ha ha’e oikove aja pukukue oiko hikuái hembiguáirõ.

22Ha Salomón rembi’urã ko’ẽ ko’ẽre oiporu 6.600 lítro trígo ku’i iporãvéva, ha 13.200 lítro ambue trígo ku’i,

23oñekotevẽ 10 tóro ra’yrusu oñemongyra porãva, 20 tóro ra’yrusu okarúva ñúme, 100 ovecha, ha ndojepapái guasu, guasukuña, guasuvira ni guyra oñemongyráva.

24Ha’e oisãmbyhy Éufrates ha Tifsa guive Gáza peve opaite tetãnguérape, ha’e oiko py’aguapýpe umi tetã ijykeregua opytapágui ipoguýpe ha noñemoĩsevéigui hese.

25Upéicha Juda ha Israel oiko pytu’upópe mayma iparral ha hi’ígo yvyra guýpe, Dan guive Beerséba peve, Salomón oikove aja pukukue.

26Salomón oguerekókuri 4.000 kavaju iñorãirõ carrokuérape g̃uarã, ha 12.000 kavaju iñorãirõhára kavaju ariguápe g̃uarã.

27Ha umi mburuvichakuéra ombyaty tetã ruvicha Salomon rembi’urã, ha’ekuéra peteĩteĩva omoĩmba Salomón mesápe g̃uarã, peteĩ jasy pukukue opaite hembi’urã.

28Ha’ekuéra ombyatyva’erã avei cebáda ha kapi’i ikavajukuéra ha hymba omba’apo pohýivape g̃uarã, mamo oĩháme, peteĩ jasy pukukue.

29Ñanderuete ome’ẽ Salomónpe arandu, akãguapy ha akãporã ku yvyku’i yguasu rembe’y peguáicha.

30Salomón arandu ituichave opaite kuarahyresẽ gotyoguágui, ha opaite Egiptoygua arandúgui.

31Salomón iñarandueteve opaite kuimba’ekuéragui: Etan, pe Ezrayguágui, ha Heman; Calcol ha Dardágui, Mahol ra’ykuéra, ha herakuã porãite oñemyasãi ohóvo ambue tetãnguéra rupi.

32Ha’e ohai 3.000 ñe’ẽ arandu ha ipuraheikuéra 1005.

33Ha’e oñe’ẽ opaichagua yvyra rehe, ygary (cédro) Líbano pegua rehe guive pe ygáu osẽva tápia rehe peve. Péicha oñe’ẽ avei opaichagua mymbakuéra, guyrakuéra, mbói ha pirakuéra rehe.

34Ha ohendu hag̃ua Salomón arandu og̃uahẽ hendápe opaite tetãnguéragui, ha opaite tetã yvy ariguápe, oñemoherakuã Salomon arandu.

← Chapter 3 Jump to: Chapter 5 →