1 Kings 20

Guarani 2015 (Ñanderuete Ñe’ẽ Porã 2015)

← Chapter 19 Jump to: Chapter 21 →

1Upémaramo Ben-adad, Síria retã ruvicha, ombyatypa isoldadokuéra, ha hendive ambue 32 táva ruvicha, ikavaju ha icárro reheve ojupi ha omongora Samária, ojeity hag̃ua pe táva péva ári.

2Ha Ben-adad omondo hembijokuaikuéra tetã ruvicha Acab rendápe, ha he’iuka ichupe:

3Péicha he’iuka Ben-adad: Nde pláta ha nde óro che mba’e, ne rembirekokuéra, ha nde ra’ykuéra iporãvéva che mba’epa avei.

4Ha Israel retã ruvicha he’iuka jevy Ben-adádpe: Nde ere háicha, tetã ruvicha ha che jára, che voi ne mba’e, ha opaite mba’e aguerekóva guive.

5Ha ou jevy hembijokuaikuéra Acab rendápe ha he’i: Péicha he’iuka Bena-dad ndéve: Che ha’euka ndéve: Nde pláta, nde óro, ne rembirekokuéra ha nde ra’ykuéra reme’ẽva’erã chéve.

6Ko’ẽ ramo ko hóra kóvape, che amondóta ne rendápe che rembiguaikuéra, ha’ekuéra oipyguara hag̃ua nde róga, ha ne rembiguaikuéra róga, ogueraha hag̃ua opaite mba’eporã reguerekóva guive ne retãpýpe.

7Upémaramo tetã ruvicha ohenói opaite karai anciáno hetã meguápe ha he’i ichupekuéra: Pehechakuaápa, ha pehecha mba’éichapa Ben-adad oheka ivaívante; ombou che rendápe che rembireko ha che ra’ykuéra piári, ha che pláta ha che óro rehe, ha che nambotovéi ichupe he’iukavare.

8Ha opaite anciáno ha opaite hetãyguakuéra he’i joa ichupe: Anítei rehendu iñe’ẽ, ha ani rejapo ojeruréva ndéve.

9Upémaramo ha’e he’i umi ñe’ẽ oguerúvape: Pejéta tetã ruvicha, che járape, ajapopaitetaha ne rembiguái he’imava’ekue iñepyrũmbýpe; ha ã mba’e ko’ang̃agua katu ndaikatumo’ãi ajapo. Ha temimondo oho omba’emombe’upa hag̃ua Ben-adádpe.

10Ha Ben-adad he’iuka jevy ichupe: Che tupãnguéra tachehavira ha tachenupãve gueteri che nambotaperéi ramo ko táva kóvape. Ha che soldadokuéra hetaitereígui ndohupitymo’ãi peteĩteĩme ogueraha hag̃ua ko táva yvytimbo jepe ipópe.

11Ha Israel retã ruvicha he’iuka jevy ichupe: Naiporãi peteĩ ñorãirõhára he’i ramo che chepu’akáma che rapicháre, oñorãirõ mboyve.

12Ha oñemombe’u ko ñe’ẽ kóva ichupe, ha’e oka’u jave hína ambue táva ruvichakuéra ndive hóga rymba pireguiguápe: Upérõ Ben-adad he’i isoldádo atykuérape: Pejeity Samária ári.

13Ha péina ápe peteĩ proféta ou Acab, Israel retã ruvicha rendápe, ha he’i ichupe: Péicha he’i Ñanderuete: Rehecha piko ko atyguasu tuichaitéva. Eikuaa porãke, ko aty kóva ko árape amoĩta nde pópe, ojekuaa hag̃ua Cheha pende Ruete, pende Jára.

14Ha Acab oporandu: Máva po rupípa. Ha pe proféta he’i: Péicha he’i Ñanderuete: Nde táva sãmbyhyhára rembiguaikuéra po rupi. Ha Acab oporandu jevy: Mávapa oñepyrũta pe ñorãirõ. Ha ha’e he’i: Nde.

15Upémaramo ha’e oipapa umi táva sãmbyhyhára rembiguái, ha ojohu 232. Upéi oipapa opaite hetãyguakuérape Israel ñemoñarenguéra apytégui oĩva hendive, ha ojohu 7.000 kuimba’e.

16Ha osẽ hikuái pe asaje mbytépe. Ha Ben-adab oka’uhína hóga rymba pirekueguiguápe, ha hendive avei umi 32 táva ruvicha ouva’ekue oipytyvõ hag̃ua ichupe.

17Ha umi táva sãmbyhyhára rembiguaikuéra raẽ osẽ. Ha Ben-adad omoĩkuri ma’ẽhára omomarandupa hag̃ua ichupe, ha umíva he’i ichupe: Samáriagui osẽ kuimba’ekuéra.

18Upérõ ha’e he’i: Oime ramo osẽ ojerure hag̃ua py’aguapy térã oñorãirõ hag̃ua, peapresa ichupekuéra hekove reheve.

19Umía rire osẽ avei umi tetã ruvicha rembiguaikuéra Samáriagui, ha hapykuéri pe soldádo aty.

20Oñeha’ãmba hikuái ojuka hag̃ua umi oúva ha oñemoĩva guive hese, ha umi Siriaygua okañy, ha Israelguakuéra omuña ichupekuéra. Ha Síria retã ruvicha Ben-adad okañy avei ikavaju ári, mbovymi iñirũ kavaju arigua ndive.

21Ha Israel retã ruvicha osẽ avei ha oikutu umi kavaju ariguápe, ha umi cárro peguápe, ha sarambi ojapo Siriayguakuéra apytépe.

22Upéi pe proféta og̃uahẽ jevy tetã ruvicha Acab rendápe ha he’i ichupe: Tereho, eñemombarete, ha ema’ẽ porãke ne rembiaporã rehe, peteĩ áño haguépe, Síria retã ruvicha ou jevýtagui ojeity hag̃ua ndeári.

23Ha Síria retã ruvicha rembiguaikuéra he’i huvichápe: Israelguakuéra ipu’aka ñanderehe ijarakuéra cérro rerekuágui, upévaguinte ipu’aka ñanderehe, ñañorãirõ jave hendivekuéra ñúme ñambopoguýne ichupekuéra.

24Péicha ejapo: Eipe’a umi 32 táva ruvicha icárgogui, ha hendaguépe emoĩ mburuvichánte.

25Ha embyaty jevy peteĩ soldádo atyguasu ha emoĩ pe soldádo atyguasu oñehundimava’ekue rendaguépe, upéicha avei kavaju kavaju rehe, cárro cárro rehe, ha upéi ejeity hi’arikuéra ñúme, ha rehecháta ñandepu’akáta hesekuéra. Ha tetã ruvicha Ben-adad iñe’ẽrendu opaite mba’épe ha ojapopa oje’éva guive ichupe.

26Ohasa rire peteĩ áño, Ben-adad ombyaty jevy Síria soldadokuérape, ha ou Afécpe oñorãirõ hag̃ua Israelguakuéra ndive.

27Israel ñemoñarenguéra oñembyaty avei ha ojapyhy hikuái hembi’urã ha oho ojejohu hag̃ua hendivekuéra, ha Israel soldádo aty ha’ete mokõi kavara aty mimi Síria soldádo aty ndetuicháva renondépe.

28Upémaramo Ñanderuete remimbou ou Israel retã ruvichápe, ha he’i ichupe: Péicha Ñanderuete he’iuka: Siriayguakuéra he’i haguére, Ñanderuete cerrokuéra Járante, ha ndaha’éi ñu Jára, Che ame’ẽ jevýta nde pópe ko atyguasuetépe, peikuaa hag̃ua Cheha pende Ruete.

29Siéte ára pukukue pepyta ojováre ha pe ára 7-hápe oikóta pe ñorãirõ, ha Israel ñemoñarenguéra ojuka peteĩ árape 100.000 kuimba’e yvy rupiguápe.

30Ha umi hembýva okañymba pe táva Afécpe, ha pe táva tápia ho’a umi 27.000 kuimba’e hembyva’ekue ári. Ha Ben-adad okañy avei pe táva pévape, ha okañy peteĩ kotýgui ambue kotýpe.

31Upémaramo hembiguaikuéra he’i ichupe: Ore rohendu Israel retã ruvicha rogaygua ipy’a porãha. Ñañemonde ramo ao vosakuépe, ñañemosã ñande ajúragui, ñasẽ Israel retã ruvicha renondépe ha jahecha sapy’a reípa ndosalvái mba’e nde rekove.

32Oñemonde hikuái ao vosakuépe ha oñemosã ijajurakuéragui ha ou hikuái Israel retã ruvicha renondépe, ha he’i ichupe: Ne rembiguái Ben-adad he’i: Ajerure ndéve oikove hag̃ua che ánga. Ha ha’e he’i jevy: Ha’e oikove ramo gueteri, ha’e che ryvy.

33Ben-adad rembiguaikuéra ohendúvo ko’ã mba’e ha ohechávo Acab ipy’a porã hendive pya’e he’i hikuái: Nde ryvy Ben-adad oikove. Ha ha’e he’i: Tapeho ha pegueru, upérõ ojegueru Ben-adádpe Acab rendápe, ha ha’e ohupi ichupe peteĩ cárrope.

34Ha Ben-adad he’i Acábpe: Umi táva che ru oipe’amava’ekue pendehegui, che ame’ẽmba jevýta ndéve, ha remopu’ã ñemuha róga Damáscope ne mba’erã ramo; che ru ojapo haguéicha Samáriape. Upérõ Acab omosãso Be-nadádpe ha oñembopy’apeteĩ hendive.

35Ko’ã mba’e rire, peteĩ proféta remimbo’e he’i iñirũme, Ñanderuete ñe’ẽ oipota nde chekutu ko’ág̃a. Iñirũ katu ndoikutuséi ichupe.

36Upérõ ha’e he’i ichupe: Nderejapóigui Ñanderuete rembipota, péina ág̃a resẽvo ko’águi peteĩ leõ ndejukáta. Ha ojeívo hendágui ojejohu peteĩ leõ ndive, ha pe leõ ojuka ichupe.

37Upéi pe proféta remimbo’e ojejohu ambue iñirũ ndive, ha he’i ichupe: Chekutu ko’ág̃a, ha iñirũ oinupã vai ha ombohasy ichupe.

38Upérõ pe proféta remimbo’e oho ha oñemoĩ tapére tetã ruvicha renonderãme, ha oñemonde ambue, ha oñu’ã avei hesakuéra.

39Ha tetã ruvicha ohasávo, ha’e oñe’ẽ tetã ruvichápe, ha he’i: Ne rembiguái osẽ oñorãirõ hag̃ua pe ñorãirõ mbyte rupi, ha oñemboja cherehe peteĩ soldádo ha ogueru peteĩ hese ija’e’ỹva ho’ava’ekue ipópe ha he’i chéve: Eñangareko ko kuimba’e rehe, peichahágui okañy ramo, nde rekove remoĩta hekove rendaguépe, térã rehepyme’ẽva’erã hese 33,5 kílo pláta (óro morotĩ).

40Ha ne rembiguái omba’apo aja peteĩ mba’épe, pe kuimba’e okañy. Upémaramo tetã ruvicha he’i ichupe: Nde voi reñembojovakéma.

41Upérõ pe proféta oipe’a hesa mo’ãha, ha tetã ruvicha oikuaáma ha’eha peteĩ proféta.

42Ha ha’e he’i, péicha Ñanderuete he’iuka ndéve: Repoígui nde pógui pe kuimba’e Che amaldecima va’ekue, upévare reme’ẽta nde rekove hekove rehe, ha ne retã hetã rehe.

43Ha tetã ruvicha oho hógape oĩva Samáriape, mba’embyasy ha pire vai reheve.

← Chapter 19 Jump to: Chapter 21 →