1 Kings 19

Guarani 2015 (Ñanderuete Ñe’ẽ Porã 2015)

← Chapter 18 Jump to: Chapter 20 →

1Acab omombe’u Jezabélpe opaite mba’e Elías ojapova’ekue ha mba’éichapa ojuka kyse pukúpe opaite Baal profetakuérape.

2Upémaramo Jezabel omondo Elías rendápe peteĩ hembiguái ha he’iuka ichupe: Che jarakuéra tachehavira ha tachenupãve, ko’ẽramo che, ko hóra kóvape, ndajapóirõ nderehe nde rejapo haguéicha Baal profetakuéra rehe.

3Elías katu ohechávo pe jehasa asyrã, pe pelígro, opu’ã ha oho osalva hag̃ua hekove, ha ou Beersébape, oĩva Juda retãme, ha upépe oheja hembiguáipe.

4Ha oike desiérto rehe peteĩ ára pukukue, ha oguapy peteĩ enébro yvyra guýpe; upépe ha’e omanose ha he’i: Iporãma, che Ruete, ehekýina chehegui che rekove, ndachereko porãvéi ningo che rukuéragui.

5Upérõ ojeity pe enébro yvyra guýpe ha oke; uperire peteĩ yvága rembiguái opoko hese, ha he’i ichupe: Epu’ã, ekaru.

6Upémaramo ha’e oma’ẽ, ha péina iñakãngyta gotýo oĩ pan ojyvahína tatapỹi hendýva ári, ha peteĩ y ryru, ha okaru ha hoy’u rire oñeno jevy oke hag̃ua.

7Ha Ñanderuete yvága rembiguái opoko jevy hese, ha he’i: Epu’ã ha ekaru, ipuku gueteri ne raperã.

8Upérõ Elías opu’ã, okaru, hoy’u ha imbareteve ohóvo ko’ã tembi’u rupi, oguata 40 ára ha 40 pyhare Horeb, Ñanderuete cérro peve.

9Ha upépe oike peteĩ itakuaguasúpe, ha upépe ohasa pe pyhare. Ha Ñanderuete oñe’ẽ hendive, he’ívo: Elías mba’éiko rejapo ko’ápe.

10Ha Elías he’i: Che cherakate’ỹeterei che Ruete, pe yvága atykuéra Jára rehe; Israel ñemoñarenguéra opoi haguére ndehegui, oitypa hikuái ne kuave’ẽmby renda, ha kyse pukúpe ojuka nde profetakuérape, ha che añoite cheremby, ha chereka hikuái chejuka hag̃ua avei.

11Ñanderuete he’i ichupe: Esẽ okápe ha eñembo’y pe cérrope nde Jára renondépe. Ha péina ápe Ñanderuete ombou peteĩ yvytu atãiterei ombotiríva cerrokuéra, ha ojokáva itaguasukuéra, ha ohasa Elías henonderãme, Ñanderuete katu noĩri yvytúpe. Ha pe yvytu rapykuéri ou yvyryrýi, Ñanderuete katu noĩri pe yvyryrýi apytépe.

12Ha pe yvyryrýi rapykuéri katu ou tata; Ñanderuete katu noĩri tata rendy mbytépe ha pe tata rapykuéri ou peteĩ yvytu kangymíva.

13Ha péva ohendúvo, Elías omo’ã hova ijahojápe, ha osẽ ha oñemoĩ pe itakuaguasu rokẽme. Ha péina ápe ou ichupe peteĩ ñe’ẽ he’íva: Elías mba’éiko rejapo ko’ápe.

14Ha ha’e ombohovái: Cherakate’ỹeterei che Ruete, pe yvága atykuéra Jára rehe; Israel ñemoñarenguéra opoi haguére ndehegui, oitypa hikuái ne kuave’ẽmby renda, kyse pukúpe ojuka nde profetakuérape, ha che añoite cheremby, ha chereka hikuái chejuka hag̃ua avei.

15Ha Ñanderuete he’i ichupe: Tereho, ejevy nde rapykuere rehe, Damásco desiérto rupi, ha reg̃uahẽta Hazaél rendápe emona hese acéite, Síria retã ruvicha ramo.

16Jehu, Nimsi ra’ýre remonáta avei acéite Israel retã ruvicharã ramo ha Eliséo, Safat ra’ýpe, peteĩ Abel-meholayguáre, remonáta avei acéite proféta ramo ne rendaguépe.

17Ha pe okañýva Hazael kyse pukúgui, Jehu ojukáta; ha pe okañýva Jehu kyse pukúgui, Eliséo ojukáta.

18Ha Che aheja hemby hag̃ua 7000 Israelgua noñesũiva’ekue Baal renondépe, ha ijurukuéra nohetũiva’ekue ichupe.

19Elías ohóvo upégui ojohu Eliséo, Safat ra’y rehe, oyvymbóvo (oara) jave ikokue yvy, 12 júnta guéi reheve, ambue 11 júnta omba’apóva henonderãme ha Eliséo omba’apo pe júnta 12-ha ndive hapykuéri. Ha Elías ohasávo henonde gotýo oity ijahoja hi’ári.

20Upéramo oheja igueikuéra, ha ou ñaniháme Elías rapykuéri, ha he’i: Ehejamína taha tahetũ che ru ha che sýpe, ha upéi taha nde rapykuéri. Ha Elía he’i ichupe: Tereho ha aníke nderesarái ko che ajapóvagui nderehe.

21Ha ojevývo ojapyhy igueikuéra ha ojuka, ha hembiporu yvymbovohakuépe (arádope) ombichy so’o, ha ome’ẽ iñirũnguérape ho’u hag̃ua. Upéi opu’ã ha oho Elías rapykuéri ha oiko hembiguái ramo.

← Chapter 18 Jump to: Chapter 20 →