Matthew 19

Guarani (Biblia) 2017

← Chapter 18 Jump to: Chapter 20 →

1Jare opaete kua jei ma yawe, Jesús jare jemimboe reta ndiwe yuraa ɨwɨ Galilea wi ɨwɨ Judea pe, ɨ wasu Jordán jowaicho pe.

2Jare jeta wae reta yuraa jupie. Jare Jesús umɨnguera imbaerasɨ wae reta jae reta ipɨte pe ñonoï wae.

3Jayawe yuweru wi amokue fariseo reta Jesús oï wae pe uyawɨka waerä tëi chupe iñee rupi umbɨjeko reta waerä. Jayawe upɨrandu reta chupe kuärái: “Tumpa jei wae rupi, ¿ipuereta ra kuimbae omombo jembireko ipotawe mbae re?” jei reta chupe.

4Jayawe Jesús jei chupe reta: “¿Pemɨngeta’ä yerá Tumpa iñeerɨru pe kërái Tumpa uyapo ramo yawe mbaembae, uyapo kuimbae jare kuña?

5Jare Tumpa jei: ‘Kuimbae usɨrɨta tu jare ichɨ wi iko tee waerä jembireko ndiwe. Jare mokui wae uyeyapota pëti ramiño.’ Jukuärái uyekuatía oï,” jei chupe reta.

6“Jayawe che tae pewe, mbaetɨ ma ko ñonoï mokui wae rami. Yureko ma ko pëti ramiño. Jáeramo kuimbae jare kuña Tumpa uyapo pëti ramiño wae, awɨye kiawe tumbɨsɨrɨ reta iyuwi. Jukuärái che jae,” jei Jesús chupe reta.

7Jayawe fariseo reta jei chupe: “Jukuärái yawe, jayawe ¿maera pa Moisés umaeño kuimbae re omombo waerä jembireko? Jae jei kuimbae jaeño tuikuatía rani tupapire yemombo pewa jare tumee jembireko pe. Jayawe ramo ipuere omombo jembireko,” jei reta Jesús pe.

8Jayawe Jesús jei chupe reta: “Moisés umaeño peré pemombo waerä pembireko pe reta pepɨatäta ramo. Erëi jukuärai’ä iko iyɨpɨ wiwe,” jei.

9“Jayawe che tae pewe, ime yawe kía omombo jembireko awasa uyapo mbae rewe, jare wɨreko yawe ambɨe kuña, uyapo ko oï awasa Tumpa jowai,” jei Jesús chupe reta.

10Jayawe Jesús jemimboe reta jei chupe: “Jukuäraita iko yawe kuimbae jembireko ndiwe, jayawe ikawi ko awɨye etei yamenda waerä,” jei reta.

11Jayawe Jesús jei chupe reta: “Mbaetɨ opaete wae ipuere yureko jukuäraiño umenda mbae rewe – jaeño kía reta pe Tumpa umee jukuäraiño yureko waerä wae reta, jae reta ipuere,” jei.

12“Yambɨjaanga. Amokue wae ichɨ wi oa wiwe ipuereta’ä uñemoña. Jáeramo ndarau umenda. Jare amokue wae ndarau umenda, echa’ä ïru wae reta uapiawo ramo. Jare amokue wae umenda’ä ipuere waerä uñeñono tee Tumpa peño uyeyokui waerä,” jei. “Ime yawe kía ikawi oï chupe iko waerä umenda mbae rewe wae, jayawe tuiko jukuäraiño,” jei Jesús jemimboe reta pe.

13Jokua jaɨkue rupi amokue wae reta ueru Jesús pe isambiaɨ reta. Echa’ä uipota reta Jesús oñono waerä ipo jese reta jare uyerure waerä Tumpa pe jese reta. Erëi Jesús jemimboe reta uñeengata jokua sambiaɨ ueru wae reta pe. “Awɨye jekuaeño pembɨawái Jesús,” jei chupe reta.

14Erëi Jesús jei: “Pemaeño sambiaɨ reta re yuweru waerä chekotɨ. Awɨye piyopia reta, echa’ä jaeño kua sambiaɨ rami wae reta oïta Tumpa ndiwe, Tumpa oï ma yawe opaete wae imburuwicha wasurä,” jei chupe reta.

15Jayawe Jesús oñono ipo sambiaɨ reta re jare uyerure Tumpa pe jese reta. Jare jukuärái uyapo yawe, oo ye joko wi.

16Joko wi pëti kuimbae ou Jesús oï wae pe jare jei chupe: “Oporomboe wae, jupi wae ko nde,” jei chupe. “¿Mbae nunga mbae ikawi wae pa ayapota anoi waerä tekowe opa mbae wae?” jei chupe.

17Jayawe Jesús jei chupe: “¿Maera pa ndere chewe jupi wae? Mbaetɨ ko pëti awe jupi wae. Jaeño ko Tumpa jupi wae,” jei. “Erëi ndipota tekowe opa mbae wae nenoi yawe, ndikota ko Tumpa arakae jei wae rupi,” jei chupe.

18Jayawe kuimbae jei chupe: “Opaete mbaembae Tumpa jei wae wi, ¿mbae nunga reta etei pa imeta ko ayapo?” jei chupe. Jayawe Jesús jei chupe: “Awɨye epuruyuka. Awɨye iyapo awasa. Awɨye nemonda. Awɨye ndapu nembɨjeko waerä nderapicha.

19Ipɨu nderu jare ndesɨ wi. Jare eau nderapicha nde ndiyerau rami. Jukuärái jei Tumpa,” jei Jesús chupe.

20Jayawe kuimbae jei Jesús pe: “Che ayawɨ'ä etei pëti awe kua reta. ¿Mbae ye ra uata chewe ayapo waerä?” jei chupe.

21Jayawe Jesús jei chupe: “Ndipota ndiyapo yawe jupi wae, ekua ewaka opaete nembaembae, jare jokua korepoti emee iparawete wae reta pe. Jare jukuärái imeta nenoi mbaembae ikawiete wae ara pe. Joko wi eyu kuri che ndiwe ndiko waerä cheremimboerä,” jei chupe.

22Jayawe kua uyandu yawe, kuimbae oo ye ipɨatɨtɨ rewe. Echa’ä jae ikokatuete ko jare uauete imbaembae opa umee waerä iyuwi.

23Jayawe Jesús jei jemimboe reta pe: “Pëti ara Tumpa ikota opaete wae imburuwicha wasurä jaeño mái pewa. Erëi che tae pewe añetete wae, yawaieteta ko ikokatu wae reta uyekou waerä jokua re jare onoi reta waerä tekowe opa mbae wae,” jei.

24“¿Këraita ra ko pëti camello uasa waerä yuu jesakua mii rupi? Jokua yawái. Erëi che tae pewe, yawaieteta ko pëti ikokatu wae onoi waerä tekowe opa mbae wae,” jei chupe reta.

25Jayawe Jesús jemimboe reta kua uyandu yawe, ipɨakañɨete jare jei reta: “Jukuärái yawe, ¿kía ra ipuereta uyerepɨ awɨye waerä oo Tatawasurenda pe jayawe?” jei reta.

26Jayawe Jesús umae jese reta, jare jei chupe reta: “Ɨwɨ pewa reta jaei ndarau kiawe ipuere uyerepɨ chuwi. Erëitu Tumpa ipuere uyapo chupe reta, echa’ä Tumpa pewarä mbaetɨ mbae yawái,” jei chupe reta.

27Jayawe Pedro jei Jesús pe: “Mase, ore ndueya ma opaetei nduiko waerä nderemimboe retarä. ¿Kërái pa Tumpa umɨñatimata oï orewe kuri jokua re?” jei chupe.

28Jayawe Jesús jei jemimboe reta pe: “Che tae pewe añetete wae, pëti ara Tumpa umbɨpɨauta oï opaete mbaembae. Jare jokua ara che kuimbaerä ayeyapo wae awapɨta chewapɨa mburuwicha wasu pewa re. Jukuärái uyekuaata chembaepuere jembipete wae. Jare pe cheremimboe reta, pewapɨta peï kuri wi doce wapɨa pe piko waerä Israel iñemoñaa reta imburuwicha retarä,” jei chupe reta.

29“Jare ime yawe kía ueya jëta, jare tɨkeɨ reta, jare tɨwɨ reta, jare jindɨ reta, jare tu, jare ichɨ, jare isambiaɨ reta, jare iko reta wi chereko pewa wae, cien wese ye ko uñemɨñatimata chupe, jare onoita imaerä tekowe opa mbae wae,” jei chupe reta.

30“Erëi jeta añawe rupi uyembutuichaka ñonoï wae reta, Tumpa umɨmichita oï reta kuri. Jae ramiño wi jeta añawe rupi usiriwe mbae echa ñonoï wae reta, Tumpa umbutuichata oï reta kuri,” jei chupe reta.

← Chapter 18 Jump to: Chapter 20 →