Matthew 7

Guarani (Biblia) 2017

← Chapter 6 Jump to: Chapter 8 →

1Jesús jekuaeño oporomboe kuärái: “Pipota’ä kía iñera waerä peré yawe, jayawe pe reta awɨye wi piñera kía re awe.

2Echa’ä ïru wae reta iñerata peré kërái pe reta ïru wae reta re piñera wae rami. Jayawe piñera yawe täta rupi ïru wae re, jukuärái wi jae täta rupi iñerata peré,” jei.

3Jare jei wi chupe reta umbɨjaanga rewe: “Nde neratangätu neï nemae waerä ɨtɨ michi wae neïru jesa pe oï wae re. Erëi ¿maera pa nde nemae’ä ɨwɨra puku nderesa pe oï wae re?” jei chupe reta.

4“Nde ndere: ‘Tëtara, taeki nderesa wi jokua ɨtɨ michi wae,’ ndere. Erëi ¿këraita pa ndepuere ndiyemɨngeta jukuärái nde ime yawe nenoi ɨwɨra puku wae nderesa pe?

5Jukuärái ndiyapo yawe, jayawe ndiyemɨngetaiño ko neï,” jei. “Che tae ndewe, tenonde eki rani ɨwɨra puku wae nderesa wi. Jare jayawe ramo nemae kawita ndepuere waerä ndeki ɨtɨ michi wae neïru jesa wi,” jei Jesús chupe reta umbɨjaanga rewe.

6Jare jei wi chupe reta: “Ime yawe kía uipota’ä uyapɨsaka Tumpa iñee re wae, ¿mbae ra yayapota yande reta? ¿Ñameeta ra mbae ikawiete ye wae yɨmba reta pe? Jare ¿ñameeta ra ita ikawiete wae jare jepɨete wae kuchi reta pe? Ndarau ñamee, echa’ä mbae’ä chupe reta. Kuchi reta upɨ̈roñota jese, jare yɨmba reta ipuereta ou yandesuu. Jukuärái wi jupi’ä ko jekuaeño yamɨmbeu waerä Tumpa iñee kía pe uipota’ä uyapɨsaka jese yawe,” jei chupe reta.

7Jayawe Jesús jei wi chupe reta: “Mbae uata oï pewe yawe, piyerureñoi Tumpa pe jese. Pekañoi chupe jare jae umeeta pewe. Piyerure chupe kía öke pe ueni pɨi oï wae rami, jare jae uipeata pewe,” jei.

8“Echa’ä kía uyerure yawe Tumpa pe mbae re, Tumpa umeeta oï chupe. Jare jae nunga wi kía ueka yawe, uwäeta chupe wi. Jare uyepeata oï chupe wi kía öke pe ueni oï wae. Jukuärái ko peRu Tumpa,” jei.

9“Mase. Nderaɨ mbɨyape ueka ndewe yawe, ndarau nemee chupe ita.

10Jare nderaɨ pira chariki ueka ndewe yawe, ¿nemeeta yerá chupe mboi?” jei.

11“Pe reta, yepe tëi pereko ikawi mbae wae ko, erëi pikuaa ko pemee waerä mbaembae ikawi wae pesambiaɨ reta pe. Jare jukuärái yawe, ¿këraita pa peRu ara pe oï wae umeeta’ä pewe mbaembae ikawi wae peka chupe yawe?” jei chupe reta.

12“Kërái pe reta pipota ïru wae reta uyapo pewe ikawi wae pemaerä, jukuärái wi piyapota ko ikawi wae chupe reta. Echa’ä jukuärái wi jei Moisés jare opaete ïru kuimbae Tumpa iñee arakae umɨmbeu wae reta,” jei Jesús chupe reta.

13Jare Jesús jei wi umbɨjaanga rewe: “Pipota tekowe opa mbae wae penoi yawe, piketa ko öke ipɨraɨ wae rupi,” jei. “Echa’ä öke ipɨwasu wae jae ko Tatawasurenda pe oo wae. Jare tape jokotɨ oo wae, ipɨwasu ko jare yawai’ä ko. Jáeramo jeta wae reta uwata ñonoï jokoropi,” jei.

14“Erëi jokua öke ipɨraɨ wae, jae ko tekowe opa mbae wae pe oo wae. Jare tape jokotɨ oo wae ipɨraɨete ko jare yawái ko. Jare mbowɨño uwäe chupe reta jokua öke,” jei chupe reta.

15“Piyandareko kawi piyé kuri, echa’ä outa oï Tumpa iñee umɨmbeuraanga wae reta. Jae reta ikota pepɨte rupi owecha reta rami, echa’ä uyekuaata reta pewe ikoi wae echa rami. Erëi añetete jae reta ko yawa pochɨ wae rami,” jei.

16“Erëi pe reta pikuaata jae reta ko upurumbɨtawɨ wae reta mbaembae uyapo wae rupi,” jei. “Yaikuaa ñaï ndarau yaipoo uva ɨwopëre jäka wi. Jae ramiño wi ɨwa ndarau yaipoo kapiäti wi,” jei.

17“Pëti temitɨ ikawi wae umee ía ikawi wae. Jae ramiño wi pëti temitɨ ikawi mbae wae umee ía ikawi mbae wae,” jei.

18“Jare pëti temitɨ ía ikawi umee wae ndarau umee ía ikawi mbae wae. Jae ramiño wi pëti temitɨ ía ikawi mbae umee wae ndarau umee ía ikawi wae.

19Jare temitɨ ía ikawi’ä yawe, temitɨ iya uyasɨata jare uapɨta,” jei.

20“Jayawe jukuärái yaikuaa ía rupi temitɨ ikawi wae ra ani ikawi mbae wae ra. Jare jukuärái wi pe reta pikuaata jae reta jeko rupi kía ko jae Tumpa iñee umɨmbeuraanga wae reta,” jei Jesús chupe reta.

21“Jeta wae reta täta rupi jeita chewe, ‘CheYa,’ erëi yurekota’ä opaete jae reta che ndiwe che aï ma yawe opaete wae imburuwicha wasurä jaeño mái pewa. Jaeño cheRu ara pe oï wae jei wae rupi uyapo wae reta yurekota che ndiwe,” jei.

22“Jokua ara uwäe yawe, jeta wae reta jeita tëi chewe: ‘CheYa mii, ore jupi ko nduiko waerä nde ndiwe, echa’ä ore numɨmbeu Tumpa iñee nderee re. Jare nderee re nomoë aña reta uyembɨiya jese wae reta wi. Jare nembaepuere rupi nduyapo jeta mbaembae kuimbae reta ipuere’ä uyapo wae.’ Jukuärái jeita tëi chewe reta.

23Erëi che jaeta chupe reta: ‘Che pukuaa’ä etei ko. Pesɨrɨ chewi, pe pereko kachi wae reta.’ Jukuärái jaeta chupe reta,” jei Jesús.

24“Jayawe ime yawe kía uyapɨsaka kua chiñee re wae jare uyapo kawi kua chiñee wae, jae ko pëti kuimbae iyarakuaa katu wae uyapo jëtarä pëti itape wasu re rami,” jei.

25“Echa’ä jae opa ma jëta uyapo yawe, ama tuicha okɨ, jare ɨ uyembutuicha oo jare uyepete tëta re. Jare ɨwɨtu täta uyepete jese wi. Erëi mbaetɨ jokua tëta uyapara jokua re, echa’ä iwapɨka itape re oï ramo,” jei. “Jukuärái rami ko che jae wae uyapo wae reta iyarakuaa katu ñonoï,” jei.

26“Erëi ime yawe kía uyandu tëi kua chiñee wae jare mbaetɨ uyapo wae, jae ko pëti kuimbae iyarakuaa mbae echa ɨwɨkuïti re jëtarä uyapo wae rami,” jei.

27“Echa’ä jae opa ma jëta uyapo yawe, ama tuicha okɨ, jare ɨ uyembutuicha oo jare uyepete tëta re. Jare ɨwɨtu täta uyepete jese wi. Jare uyapara jokua tëta jare opa uyembái opaetei,” jei. “Jukuärái rami ko chiñee uyandu tëi wae reta erëi uyapo’ä reta,” jei. “Kuaaño ma che jae aï pewe.” Jukuärái jei Jesús jokua jeta uyembatɨ wae reta pe.

28Jare Jesús kua opa ma jei yawe, opaete uyapɨsaka jese wae reta ipɨakañɨ jae oporomboe wae re.

29Echa’ä oporomboe’ä Moisés uikuatía wae re oporomboe wae reta rami. Jae oporomboe imbaepuere rewe.

← Chapter 6 Jump to: Chapter 8 →