bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Gussi
/
Gussi (EBIBILIA ENCHENU) 2020
/
Esther 1
Esther 1
Gussi (EBIBILIA ENCHENU) 2020
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 2 →
1
Amang’ana aya naro akoregete ase amatuko ’Ahaswero, Ahaswero oyio akaba okogambera chingongo rigana erimo, na emerongo ebere, na isano na ibere (127), gochakera India goikera Etiopia.
2
Ase amatuko aria, ekero Ahaswero omoruoti arenge goikaransa ase ekerogo kiaye ki’oboruoti aaria ase eburi ya Susa, amang’ana aya naro arenge gokoreka:
3
Ase omwaka o gatato bw’okogamba kwaye agakora omoyega omonene ase abanene bonsi amo nabatang’ani abarenge ase obogambi bwaye. Akarangeria abatang’ani b’abarwani esegi b’Abaayemi, na ab’Abamedia, na abanene amo nabagambi be chingongo chiaye.
4
Ase engaki entambe y’amatuko rigana erimo, na emerongo etano na etato (180), omoruoti akaba okworokia abanto abwo obonda na obonene bw’oboruoti bwaye, obwo bw’ogosika okonene.
5
Amatuko ayio kaerire, akaroisia omoyega omonene ase abanto bonsi, abanene na abake, abarenge agwo Susa, omochie omonene. Omoyega oyio okabeera ase eraaro y’egeticha yagiteire, yarenge ase enyomba y’omoruoti, na okagenderera ase amatuko atano na abere.
6
Aase agwo nigo achabeire nobwari obonge: ebitambaa ebirabu na ebiare buru, bionsi biaroisirie korwa ase egatani. Ebitambaa ebio nigo biasungeire ne chingori chindabu ne chimonyinga, chiaroisirie korwa ase egatani engiya. Chingori echio nigo chiasoirie ase chibonyi chie chifeta chiarenge ase chisiiro chi’amagena amarabu akomeka‐meka e rigori rinene. Ebiikaransero biaroisirie korwa ase chitahabu ne chifeta nigo biabekire inse aase atichire namagena akomeka‐meka e rigori rinene, amarabu na amabariri, na ayare buna obonyansi na amamwamu.
7
Ebinyugwa bikabekwa ase ebikombe biaroisirie korwa ase chitahabu; kera egekombe nigo kiaroisetigwe k’obwaye getagwekaini ekende. Edivai ekonyugwa ase enyomba y’omoruoti ekarentwa ase obonge.
8
Omoroberio okabekwa buna ebinyugwa ebio biarenge konyugwa; monto onde tarenge kobetererigwa, ekiagera omoruoti nigo achigete abasomba baye, abatenenerete enyomba yaye, ng’a batige kera omonto anywe ebinyugwa buna aganetie.
9
Ase engaki eyio eyio, Vasti eting’ana, moka omoruoti, nere agakorera abakungu omoyega agwo ase enyomba y’omoruoti Ahaswero.
10
Ase rituko ria gatano na kabere ri’omoyega oyio, omoruoti kanyure edivai akaba nomosasoko ase enkoro yaye. Ase ayio akarangeria Mehumani na Bisita, Haribona na Bigita, Abagita na Setari, na Karikasi, abasomba baye batano na babere abagombaetigwe, abwo barenge komokorera ase enyomba yaye,
11
akabachika barente Vasti eting’ana achiche ase obosio bwaye obegete egutwa y’oboruoti. Vasti nigo arenge omokungu omonyakieni mono; ase igo omoruoti akagania amoorokie ase abanto bonsi na ase abanene barenge agwo, erinde bamorore.
12
Abasomba baria b’omoruoti bakairera Vasti amang’ana ayio, korende ere akaanga koigwera ogochika kw’omoruoti. Ayio akagera omoruoti akaba nendamwamu enene mono yarenge gwoka ime yaye buna omorero.
13
Nigo yarenge engencho y’omoruoti arigie ogosemigwa korwa ase abanto abang’aini bamanyete amachiko, naende bamanyete kogamba ebina. Ase ayio akarangeria abanto abasemia, baria bamanyete ebimanyererio bie chingaki.
14
Abanto anarete koboria botambe nabwo aba: Karisena na Setari, Adimata na Tarisisi, Meresi na Marisena, na Memukani. Aba batano na babere nigo barenge abagambi korwa ase ense y’Ayemi, na eya Media, naende nabwo barenge abanene ase obogambi bwaye.
15
Omoruoti agatebia abanto baria, “Inche omoruoti Ahaswero natoma abasomba baria baane, nabachika barente Vasti eting’ana asende, korende ere bwanga koigwera ogochika okwo. Inee! Ngento ki agwenerete akorerwe kobwatekana nogochika?”
16
Erio Memukani agatebia omoruoti na abanene bonsi, “Vasti eting’ana tari ng’a nomoruoti bweka amocheire, korende omocheire abanene bonsi, na abanto bonsi bare ase chingongo chionsi echio aye omoruoti Ahaswero okogambera.
17
Ogokora oko eting’ana yakorire goise komanyekana ase abakungu bonsi, nigo koragere abakungu bande bachaye abasacha babo, batebe: Omoruoti Ahaswero nachika abasomba baye barente Vasti eting’ana asare, korende Vasti akaanga, tacha ase omoruoti.
18
Rituko ria rero ritaraera, abakungu b’abanene bonsi b’Abaayemi na ab’Abamedia mbabe bakoigwa aya eting’ana yakorire, na igo bagochia koyatebia abanene bonsi ase obogambi, na ogochayana okonene nigo kogochia koba amo nokoengererania okonene.
19
Aye omoruoti koranche orue ogochika kw’oboruoti ng’a Vasti tabaisa kororekana ogocha ase obosio bwao nonya ndinde rionsi, aye omoruoti Ahaswero. Orike ogochika okwo ase amachiko ’Abaayemi na ay’Abamedia arikire, erinde ayio tanyara koonchorwa. Aye omoruoti ochore omokungu omoao ore omuya kobua Vasti, omoe obonene obwo bw’oboruoti.
20
Ekero amang’ana ’ogochika okwo kw’omoruoti arararigwe ase oboruoti obo obonene, abakungu bonsi, abanene na abake, mbabe bagosika abasacha babo.”
21
Ogosemia okwo kwa Memukani gokagokia omoruoti amo nabanene bonsi, na omoruoti agakora buna Memukani atebete.
22
Erio agatoma amarube gochia ase chingongo chionsi chi’obogambi bwaye. Amarube ayio akarikwa ase kera orogongo ase okorikwa kw’engencho y’amariko abo, ase kera egesaku ase omonwa obo, goteba ng’a kera omosacha abe okogamba ase enka yaye, naende abe ogokwana nabanto baye ase omonwa bw’egesaku kiaye.
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 2 →
All chapters:
1
2
3
4
5
6
7
8
9
10