Esther 5

Gussi (EBIBILIA ENCHENU) 2020

← Chapter 4 Jump to: Chapter 6 →

1Ase rituko ria gatato Esteri akabeka chianga chiaye chi’oboting’ana, akagenda agatenena ase egoora ya ime, ase enyomba y’omoruoti erochie enyomba enene y’omoruoti. Omoruoti nigo aikaransete ase ekerogo kiaye ki’oboruoti kerochie gesieri ki’enyomba yaye.

2Ekero omoruoti aroche Esteri eting’ana oteneine ase egoora, Esteri akanyora ogwancherwa asare. Omoruoti akamworotera enyimbo yaye y’oboruoti eroisirie korwa ase etahabu, arenge nero koboko. Erio Esteri akagenda gochia ang’e, agakuna mesia y’enyimbo eria,

3na omoruoti akamoboria, “Eting’ana Esteri, ninki origetie? Intebia eki oganetie; aye nokeegwe, nakeba nonya nekeng’ese ki’oboruoti bwane.”

4Esteri akairaneria, “Koranche omoruoti, ochiche mwane rero, aye amo na Hamani, ase endagera nakoroiseirie aye omoruoti.”

5Omoruoti akarangeria Hamani ache bwango, erinde banyare gokora aya Esteri aganetie. Agwo omoruoti na Hamani bakagenda ase endagera eria Esteri aroisetie.

6Ekero baare konywa edivai, omoruoti akaboria Esteri, “Ninki origetie? Ekio nokeegwe. Ninki oganetie? Nakeba nonya nekeng’ese ki’oboruoti bwane, nokeegwe.”

7Esteri akairaneria, “Ogosaba kwane na okogania kwane noko:

8Onye nanyorire ogwancherwa ase obosio bwao, aye omoruoti, koranche aye amo na Hamani, ankio naende moche mobe abageni baane ase endagera ndache mbaroiserie. Ase ekero ekio nario ndache ngotebie eki nganetie.”

9Ase rituko riria Hamani akarua ase endagera eria, ore nomogoko na omosasoko. Korende ekero aroche Moredekai ase egeita ki’enyomba y’omoruoti, na Moredekai taimogete atenene amworokie amasikani, agaichorwa nekeririanda asare.

10Korende agetanga ase okoremereria, akagenda inka bwoye. Erio akarangeria abasani baye, na Seresi mokaye, bache mwaye.

11Hamani agetogia asebare, agakwana igoro y’obonge bw’obotenenku bwaye, na igoro y’abana baye abange, naende igoro y’obonene bwonsi omoruoti konya amoeire, na buna amokinetie kobua abagambi bonsi, na abasomba bonsi b’omoruoti.

12Naende Hamani akabora, “Esteri eting’ana, moka omoruoti, naroisia endagera, tarangeretie onde otatiga inche bweka amo nomoruoti. Nonya ng’ankio nagatorangeretie, inche amo nomoruoti.

13Korende amang’ana ayio onsi tang’isanegeti ekero nkorora Moredekai, Omoyahudi oria, oikaransete ase egeita ki’omoruoti.”

14Erio Seresi mokaye, na abasani baye bonsi bakamotebia, “Tiga orobambo rore nobotambe bw’amaboko emerongo etano rosimisigwe. Ankio mambia oborie omoruoti ng’a Moredekai atongwe igoro ase orobambo orwo, erinde ogende ase omoyega kore nomogoko.” Ring’ana erio rikagokia Hamani; ere agasimisia orobambo orwo.

← Chapter 4 Jump to: Chapter 6 →