Esther 3

Gussi (EBIBILIA ENCHENU) 2020

← Chapter 2 Jump to: Chapter 4 →

1Nyuma y’amang’ana ayio, omoruoti Ahaswero agakinia Hamani, mosinto o Hamedata Omoagagi, akamoa obonene kobua abanene bande bonsi abarenge amo nere.

2Omoruoti akarua ogochika ng’a abasomba baye bonsi barenge kobeera ase egeita kiaye batung’ame bosio bwa Hamani ase okomosasima. Bonsi bagakora bo, otatiga Moredekai.

3Erio abasomba bande b’omoruoti abarenge kobeera agwo ase egeita bakaboria Moredekai, “Inee! Nase ki kwangire koigwera ogochika kw’omoruoti?”

4Bakaba bagokwana nere rituko ase rituko ng’a aigwere ogochika koria, korende tabete ogotegerera amang’ana abo. Ere nigo abatebetie ng’a n’Omoyahudi are. Ase ayio abasomba baria bagatebia Hamani, erinde barore gose amang’ana a Moredekai nancherwe.

5Hamani akaba nendamwamu enene mono ekero aroche ng’a Moredekai tarenge gotung’ama ase okomosasima.

6Ekero Hamani amanyete ng’a Moredekai n’Omoyahudi orenge, akarora ng’a tari Moredekai bweka araite, korende aite na Abayahudi bonsi abarenge ase oboruoti bw’Ahaswero, ekiagera barenge ab’egesaku ekemo na Moredekai.

7Ase omwaka o ikomi na kabere bw’okogamba kw’omoruoti Ahaswero, omotienyi bwe ritang’ani okorokwa Nisani, abanto bakaba bagoaka obomera bware korokwa Puri, agwo ase obosio bwa Hamani, igoro ya kera rituko, na kera omotienyi, bagaikera omotienyi o ikomi na kabere okorokwa Adari.

8Erio Hamani agatebia omoruoti Ahaswero, “Mbare aa abanto b’egesaku gete besiarerete, bamenyete ase egati y’abanto be chingongo chionsi chi’oboruoti bwao. Amachiko ’abanto abwo nigo are nogwatananeka korwa ase amachiko ’abanto bande. Barabwo tibari korenda amachiko ao, aye omoruoti. Ase ayio, aye omoruoti, okoremereria koba nabanto aba tigokorenta bitoki binde ebiya asore.

9Aye omoruoti, amang’ana aya karakogwenere, karue ogochika ng’a abanto aba baitwe basirigwe kegima. Onye nabo nindete chifeta chitalanta chilifu ikomi (10,000) ase abanto abwo bagokora emeremo yao, aye omoruoti; ne chifeta echio nigo chirabekwe ase ekungo yao, aye omoruoti.”

10Erio omoruoti akarusia ebonyi yarenge ase ekiara kiaye gi’okoboko, yabwate ekemanyererio kiaye, akayea omobisa oria bw’Abayahudi, Hamani, mosinto o Hamedata, Omoagagi,

11akamotebia, “Chibesa echio gwachieirwe, na abanto kwabaeirwe, okore ande onsi orarore akogwenerete.”

12Ase ayio, ase rituko ria ikomi na gatato, ri’omotienyi bwe ritang’ani, abariki b’omoruoti bakarangerigwa, barike amang’ana ’ogochika koria omoruoti aruete. Amarube akarikwa gochia ase abagambi abanene b’oboruoti, na ase abagavuna, na ase abanene b’abanto be chingongo chionsi ase oboruoti bwaye, ase kera orogongo ase okorikwa kw’engencho y’amariko abo, na ase kera egesaku ase omonwa obo. Amang’ana ayio nigo arigetwe akabekwa erieta ri’omoruoti Ahaswero amo nekemanyererio ki’ebonyi eria yaye.

13Amarube aria akaegwa abanto abaango bakayaminyokia gochia ase chingongo chionsi chiare ase oboruoti boria. Nigo arenge goteba ng’a ase rituko erimo rioka, rituko ria ikomi na gatato ri’omotienyi o ikomi na kabere, noro Adari, Abayahudi bonsi, abanto abake na abagotu, abakungu na abana, baitwe basirigwe pi, na ebinto biabo bisakorwe.

14Amang’ana ’amarube ayio achikirwe airwe isiko ase chingongo chionsi ase obogambi boria korareria abanto bonsi bebeke ang’e goika rituko riria riike.

15Ogochika koria kw’omoruoti kwaroisetigwe agwo ase eburi ya Susa, gokabetereria abanto baria abaango baminyoke gochia ase chingongo chionsi. Erio omoruoti na Hamani bagaikaransa konywa, korende omochie o Susa okaba nogokumia na ogoichana.

← Chapter 2 Jump to: Chapter 4 →