Esther 8

Gussi (EBIBILIA ENCHENU) 2020

← Chapter 7 Jump to: Chapter 9 →

1Ase rituko riria omoruoti Ahaswero akaa Esteri eting’ana enyomba ya Hamani, omobisa oria bw’Abayahudi. Moredekai akanyora ribaga gosoa ase omoruoti, ekiagera Esteri konya otebirie omoruoti igoro y’obomwabo bare nere.

2Bono omoruoti akarusia ebonyi eria arusetie ase Hamani, akayea Moredekai, na Esteri akabeka Moredekai atenenere enyomba eria yarenge eya Hamani.

3Erio Esteri agakwana naende nomoruoti, agatung’ama inse ase amagoro aye, akamosorora mono ase ogoitekia amariga ng’a asarie omoroberio bw’ogosiria Abayahudi, oria Hamani Omoagagi aruete.

4Omoruoti akaimokia enyimbo eria y’etahabu, akayiorotera Esteri. Esteri akaimoka, agatenena ase obosio bw’omoruoti,

5akabora, “Aye omoruoti, onye kwarorire ng’a mbuya, na onye inche nanyorire ogwancherwa asore, ne ring’ana eri korirarorekane asore ng’a nerironge, aye omoruoti, naende inche ninkogokie, koranche amarube arikwe gochia ase chinsemo chionsi otange amang’ana aria Hamani, mosinto o Hamedata Omoagagi, achikire igoro y’Abayahudi ng’a aba bonsi bare ase chingongo chionsi chi’obogambi bwao basirigwe.

6Naki ndakore ndemererie ndore amabe ayio akobachera abaminto? Gose naki ndakore ndemererie ndore abanto b’egesaku kiane bagosirigwa.”

7Omoruoti Ahaswero agatebia Esteri eting’ana na Moredekai Omoyahudi, “Rora, naeire Esteri enyomba ya Hamani, na Hamani otongirwe igoro ase orobambo roria, ekiagera arigetie goita Abayahudi.

8Gaki inwe rika rirube ase Abayahudi, moribeke erieta riane, inche omoruoti, morike buna morarore, moribeke ekemanyererio ki’ebonyi yane, ekiagera rirube rinde rionsi ririkire na kobekwa erieta ri’omoruoti amo nekemanyererio ki’ebonyi yaye, onde tari orarionchore.”

9Abariki b’omoruoti bakarangerigwa agwo ase omotienyi o gatato, noro omotienyi o Siwani, rituko ri’emerongo ebere na gatato, na buna Moredekai achigete, amarube akarikwa gochia ase Abayahudi, na gochia ase abagambi abanene b’oboruoti na abagavuna, na abanene bonsi be chingongo chionsi korwa India goika Etiopia, chingongo rigana erimo, na emerongo ebere, na isano na ibere (127). Amarube ayio akarikwa ase kera orogongo ase okorikwa kw’engencho y’amariko abo, na ase kera egesaku ase omonwa obo na ase Abayahudi ase enchera yabo y’okorika ase omonwa obo.

10Amang’ana ayio nigo arigetwe na kobekwa erieta ri’omoruoti Ahaswero, na akabekwa ekemanyererio ki’ebonyi yaye. Erio amarube ayio akairwa nabariini be chibarasi chiare kominyoka bwango chiarwete ase obweri bwe chibarasi chi’omoruoti.

11Amarube ayio agatebereria ng’a omoruoti orure ribaga ase Abayahudi ba kera omochie bache amo, erinde beegerere abanyene. Baegwe ribaga boigo goita abarwani bande bonsi ba kera egesaku bare gocha kobarwania, baite nabana babo na abakungu babo; boigo basakore chinibo chiabo.

12Ayio akoreke ase rituko erimo ase chingongo chionsi chi’omoruoti Ahaswero, ne rituko erio nigo rirabe eria ikomi na gatato ri’omotienyi o ikomi na kabere okorokwa Adari.

13Nigo arikire ng’a ase kera orogongo ogochika okwo kw’omoruoti korarigwe maiso marore ase abanto bonsi ng’a, Abayahudi bebeke ang’e ase rituko erio erio korusia egesiomba ase ababisa babo.

14Ase ogochika okwo kw’omoruoti abatomwa bakariina chibarasi chi’omoruoti chiare kominyoka bwango. Ogochika koria gokararigwa boigo agwo Susa, omochie oria omonene bw’eburi.

15Moredekai akarua ase omoruoti, obegete chianga chi’oboruoti chire nekieni kere buru na ekerabu, obegete egutwa enene y’etahabu na egetambaa gi’okwambara ki’egatani engiya kere monyinga, na abanto b’omochie o Susa bagaaka eriogi, bagochenga.

16Abayahudi bakaba noborabu na omogoko, amo nomochengo na ogosikwa.

17Ase kera orogongo na omochie, aande onsi ogochika kw’omoruoti kwararetigwe, Abayahudi bakaba nomogoko na omochengo, bagakora omoyega na bakaba ne Rituko Rinene. Abanto abange b’ebisaku binde bagekora koba Abayahudi ase okwoboa Abayahudi.

← Chapter 7 Jump to: Chapter 9 →