Esther 9

Gussi (EBIBILIA ENCHENU) 2020

← Chapter 8 Jump to: Chapter 10 →

1Rituko ria ikomi na gatato ri’omotienyi o ikomi na kabere, noro omotienyi bw’Adari, rigaika. Ase rituko riria ogochika kw’omoruoti kware gocha goikeranigwa, ababisa b’Abayahudi nigo basemeretie ng’a mbababue, korende amang’ana konya aonchokire ng’a Abayahudi mbabue ababisa babo.

2Bono Abayahudi bagasangererekana amo ase emechie yabo yonsi, na ase chingongo chionsi chi’obogambi bw’omoruoti Ahaswero, erinde baite abanto baria barigetie kobasiria. Monto onde tarenge onyarete kobatanga, ekiagera obwoba ase engencho y’abwo konya bwasoire ase abanto bonsi.

3Ase igo abanene bonsi be chingongo chiria, na abagavuna, na abagambi abanene bonsi b’oboruoti, baria baare gokora emeremo y’omoruoti, bagakonya Abayahudi, ekiagera boboete Moredekai.

4Moredekai nigo arenge omonene ase enyomba y’omoruoti, na akamenta koba nokobua, na igo chinkuma chiaye chigasarera ase chingongo chionsi chi’oboruoti boria.

5Ase igo Abayahudi bakabua ababisa babo bonsi, bakabaita na kobasiria nemioro; bagakora buna banchete ase abwo babagechete.

6Agwo ase eburi ya Susa, Abayahudi bagaita abanto amagana atano, bakabasiria.

7Bagaita Parisanidata, na Dalifoni, na Asipata;

8Porata na Adalia, na Aridata;

9Parimasita, na Arisai, na Aridai, na Waisata,

10abamura ikomi b’omobisa oria bw’Abayahudi, Hamani, mosinto o Hamedata. Korende tibakunete ebinto biabo kobisakora.

11Ase rituko erio erio omoruoti akarenterwa omobaro bw’abaitetwe aria Susa, omochie omonene,

12na omoruoti agatebia Esteri eting’ana, “Agwo ase eburi ya Susa, Abayahudi baitire abanto amagana atano, babasiririe, amo nabamura ikomi ba Hamani. Onye ere igo, Inee, ngento ki bakorire ase chinsemo chinde ase chingongo chi’oboruoti bwane? Bono ninki naende oganetie? Nokeegwe. Ntebia ngento ki naende otarakorerwa. Nakerokio nokorerwe.”

13Esteri akamoiraneria, “Omoruoti korarore mbuya, Abayahudi aba bare agwo Susa baegwe ribaga ankio boigo bakore koreng’ana nogochika kwa rero; tiga abamura ba Hamani ikomi batongwe ase chimbambo igoro.”

14Omoruoti agachika ayio akorwe; ogochika okwo gokararigwa agwo Susa, na abamura baria ikomi ba Hamani bagatongwa ase chimbambo igoro.

15Abayahudi abarenge Susa bagasangerereka amo naende, ase rituko ria ikomi na kane, omotienyi bw’Adari, bagaita abanto amagana atato aroro, korende tibakunete ebinto biabo kobisakora.

16Abayahudi bande abarenge ase chingongo chinde chi’obogambi obwo bagasangerereka amo ase okoegera obogima bwabo, ase okwenyorera obotoereru na gwetooria korwa ase ababisa babo. Bagaita abanto chilifu emerongo etano na ebere na isano (75,000), korende tibakuneti ebinto biabo kobisakora.

17Aya nigo akoregete ase rituko ria ikomi na gatato, omotienyi bw’Adari, na ase rituko ria ikomi na kane ri’omotienyi oyio bagatimoka, bakarikora rikaba eri’omoyega na omogoko.

18Abayahudi abarenge Susa, barabwo nigo basangererekanete ase rituko ria ikomi na gatato, na eria ikomi na kane, na ase rituko ria ikomi na gatano bagatimoka bakarikora rikaba eri’omoyega na omogoko.

19Ase igo Abayahudi, abamenyete ase emechie emeke etagiteire, nigo barenge korenda rituko ria ikomi na kane ri’omotienyi bw’Adari koba rituko ri’omogoko na eri’omoyega, Rituko Rinene, bagatomerana ebiegwa bi’endagera engiya baroisetie.

20Moredekai akarika amang’ana ayio, na agatoma amarube ase Abayahudi bonsi abarenge ang’e na aare ase chingongo chionsi chi’oboruoti bw’Ahaswero,

21akabatebia ng’a barende rituko ria ikomi na kane, na eria ikomi na gatano, ase omotienyi bw’Adari, omwaka ase omwaka, abe Amatuko Amanene.

22Amatuko ayio naro Abayahudi barabe bakoinyora buna banyorete obotoereru na ogotooreka korwa ase ababisa babo, na buna omotienyi oyio emechando yabo yaonchoretwe ekaba omogoko, na omoichano obo okaba omochengo. Ase ayio babe bagokora amatuko ayio abe ay’omoyega na ay’omogoko, amatuko ay’ogotomerana ebiegwa bi’endagera babe bakoroisia naende bae abataka ebiegwa.

23Ase igo Abayahudi bagancha kwenaria gokora buna bachagete, na buna Moredekai abarikerete bakore.

24Hamani Omoagagi mosinto o Hamedata, omobisa bw’Abayahudi bonsi, konya orobeirie igoro y’Abayahudi ng’a abasirie, na konya oakire obomera bokorokwa Puri ase okoumokera Abayahudi mobosokano na kobasiria.

25Korende ekero omoruoti atebetigwe amang’ana ayio, akarua ogochika ase amarube ng’a omoroberio oria Hamani akorete mamincha y’Abayahudi omoiraneire ere omonyene, na ere na abamura baye bagatongwa ase chimbambo igoro.

26Amang’ana ayio akagera Amatuko ayio Amanene arendwe, ayio akorokwa Purimu kobwatekana nerieta ri’obomera boria bokorokwa Puri. Ase engencho y’amang’ana onsi ay’amarube ayio, na ase aria baroche abanyene, na ayio onsi abanyorete,

27Abayahudi bagachika ase barabwo abanyene, na ase chinderia chiabo, na ase abande bonsi babwatanete nabarabwo ng’a babe bakorenda amatuko ayio abere kera omwaka, naende bayabwate koreng’ana buna bachikire, ne chingaki chichikire.

28Amatuko ayio abe akoinyorwa na kobwatwa ebiaare ase ebiaare, ase kera eamate na ase kera orogongo, na kera omochie. Amatuko ayio a Purimu tabaisa gotigwa korendwa ase egati y’Abayahudi, gose ekeinyorio ki’amatuko ayio tikemocha koba ase chinderia chiabo.

29Erio eting’ana Esteri, omosubati bw’Abihaili, na Moredekai, Omoyahudi oria, bakarika rirube ri’ogokong’ia amang’ana e rirube riria ria kabere igoro y’okorenda Purimu.

30Amarube arenge namang’ana ’omorembe, naende ay’engencho enene, agatomwa ase Abayahudi bonsi barenge ase chingongo chionsi rigana erimo, na emerongo ebere, na isano na ibere, ase oboruoti bw’Ahaswero.

31Amarube ayio akababetereria ng’a amatuko a Purimu arendwe ase engaki eria echikire, buna Moredekai Omoyahudi oria, na Esteri eting’ana, bachigete Abayahudi. Boigo arendwe buna barabwo abanyene bachigete na bagachikera abanto be chinderia chiabo ase amang’ana ’okweng’ata na okorua.

32Ogochika okwo gw’Esteri eting’ana kogakong’ia amang’ana a Purimu, na ayio akarikwa ase ebuku.

← Chapter 8 Jump to: Chapter 10 →