Esther 2

Gussi (EBIBILIA ENCHENU) 2020

← Chapter 1 Jump to: Chapter 3 →

1Nyuma y’amang’ana ayio, ekero endamwamu y’omoruoti Ahaswero yakendire, akaba okorengereria igoro ya Vasti, buna akorete, naende buna ogochika kwaruetwe igoro yaye.

2Erio abasomba abarenge gokorera omoruoti bakamotebia, “Tiga abaiseke abekungi abanyabieni barigigwe barentwe asore, aye omoruoti.

3Aye omoruoti, chika abanene bare ase chingongo chionsi chi’obogambi bwao basangererie abaiseke abekungi abare abanyabieni, babarente ase enyomba y’abakungu ere agwo ase eburi ya Susa. Barabwo babekwe inse y’oborendi bwa Hegai, omokoreri oria ogombaetigwe, oyio otenenerete abakungu bamenyete ase enyomba yao. Abaiseke abwo baegwe amaguta abo bakweaka.

4Omoiseke oria orakogokie aye omoruoti, otige abe eting’ana ribaga ria Vasti.” Ogosemia okwo gokagwenera omoruoti, ere agakora buna asemetigwe.

5Agwo ase eburi ya Susa, narengeo Omoyahudi oyomo ore korokwa Moredekai, mosinto o Yairi, o Simei, o Kisi, bw’ororeria rwa Benjamin.

6Ekero Nebukadinesaro, omoruoti o Babel, achete Yerusalemu, agoosa Yekonia, omoruoti bw’Abayuda, akamoira ase obosomba amo nabanto bande, na Moredekai nigo arenge oyomo bw’abwo.

7Moredekai natugete omoiseke oyomo, omwana o ise moke. Omoiseke oyio nigo arenge korokwa Hadasa, na erieta rinde n’Esteri. Nigo abwate omobere omuya, naende nigo arenge omonyakieni mono. Ekero abaibori baye bonsi bakwete, Moredekai akaba okomotuga buna omwana oye.

8Ekero ogochika koria okoyia kw’omoruoti kwararetigwe, na abaiseke basangereretigwe agwo ase eburi ya Susa, bakabekwa inse y’oborendi bwa Hegai, oyorenge omorendi bw’abakungu ase enyomba y’omoruoti; Esteri nigo arenge oyomo bw’abwo.

9Omoiseke oria akagokia Hegai mono, akanyora ogwancherwa nere. Ase obwango obwo Hegai akamoa amaguta akweaka erinde arorekane ore omonyakieni, na akamoa endagera yamogwenerete. Boigo akaa Esteri abaiseke batano na babere abachoretwe asare korwa ase enyomba y’omoruoti bakaba bakomokorera. Hegai akaira Esteri amo nabakoreri baria baye bamenye aase aagiya mono ase enyomba eria y’abakungu.

10Bono Moredekai konya osemirie Esteri, omokanirie ng’a tabaisa kwemanyekania ase abanto b’ense eria amenyete ng’a ngesaku ki are, gose noyo bw’enyomba ki.

11Kera rituko Moredekai nigo abete okona‐gotaara ase eraaro, bosio bw’enyomba y’abakungu baria, erinde amanye buna Esteri agendererete komenya agwo, na igoro y’obogima bwaye.

12Kera oyomo ase abaiseke abwo nigo abete okweroisia omobere oye ase engaki y’emetienyi ikomi na ebere. Ase engaki y’emetienyi etano nomo emetang’ani nigo baare koba bakweaka amaguta a manemane, na emetienyi etano nomo ende babe bakweaka amaguta ande agotioka buya ase okweroisia emebere yabo. Erio ekero engaki yaigete; kera omoiseke oyomo oyomo akaba okorentwa ase omoruoti Ahaswero.

13Ekero omoiseke arenge gochia ase obosio bw’omoruoti, nigo arenge koegwa korwa ase enyomba y’abaiseke baria egento kende gionsi arenge kogania koira.

14Nigo arenge kogenda ase omoruoti chingaki chia mogoroba, erio ase rituko ria kabere mambia oirana gochia ase enyomba ende y’abakungu inse y’oborendi bwa Saasigasi, oyorenge omoteneneri bw’abakungu ba sere‐sere b’omoruoti. Tarenge koirana gochia ase omoruoti eria kabere, otatiga onye omoruoti ogogetigwe nere, naende aba okomorangeria ase ogwatora erieta riaye.

15Ekero engaki y’okogenda ase omoruoti yaigete ase Esteri, oyio orenge omoiseke bw’Abihaili, ise moke Moredekai, oyio omotugete buna omwana oye, taboretie gento kende akoirana otatiga ebi Hegai, omosomba bw’omoruoti, oria otenererete abaiseke baria, amosemetie. Bono Esteri nigo agwenerete abanto bonsi baare komorora.

16Ase ayio, omwaka o gatano na kabere bw’okogamba kw’omoruoti Ahaswero, omotienyi o ikomi okorokwa Tebeti, Esteri akarentwa ase omoruoti, agwo ase enyomba yaye y’oboruoti.

17Omoruoti akaba ogwancha Esteri kobua abakungu bande bonsi. Esteri akamogwenera akanyora obuya kobua abaiseke bande bonsi abekungi. Omoruoti akamobekera egutwa y’oboruoti ase omotwe oye, akamobeka akaba eting’ana ribaga ria Vasti.

18Omoruoti agakorera Esteri omoyega omonene bw’amasikani, akarangeria abanene bonsi b’obogambi na abasomba baye aroro. Boigo akarareria abanto bakeanerigwe ebango ase ense yaye, naende akarua ebiegwa ebinge buna omoruoti agwenerete akore.

19Ekero abaiseke abekungi basangererekanete engaki ya kabere, Moredekai akaba ogoikaransa ase egeita ki’omoruoti.

20Esteri konya taramanyia abanto b’ense eria ng’a ngesaku ki are, gose noyo bw’enyomba ki. Moredekai nigo amosemetie igo, na Esteri akamoigwera buna konya abeire okomoigwera ekero akinetigwe nere.

21Ase engaki eyio Moredekai arenge kobeera agwo ase egeita ki’enyomba y’oboruoti, abasomba babere b’omoruoti, Bigitani, na Teresi, abwo barenge korenda ase egesieri ki’enyomba, bakaba nendamwamu ase omoruoti, bakarigia enchera y’okomoita.

22Moredekai akamanya ayio, akayatebia Esteri eting’ana, nere akayatebia omoruoti ribaga ria Moredekai.

23Obotuki bogakorwa, na amang’ana akanyorekana ng’a namaene arenge; abanto baria babere bakabwatwa, bagatongwa ase chimbambo igoro. Amang’ana ayio akarikerwa ase obosio bw’omoruoti ase Ebuku y’amang’ana arenge gokoreka.

← Chapter 1 Jump to: Chapter 3 →