Ezra 1

Gussi (EBIBILIA ENCHENU) 2020

Jump to: Chapter 2 →

1Ase omwaka bwe ritang’ani bw’okogamba gwa Koresi, omoruoti bw’Abaayemi, Omonene agaikerania ayakwanete goetera ase Yeremia. Agaseegeta na koberora omoika bw’omoruoti oria, akamosukia arike ring’ana na koriraria ase chinsemo chionsi chi’oboruoti bwaye, ogoteba:

2“Amang’ana aya naro inche Koresi, omoruoti bw’Abaayemi, ngoteba: Omonene, Nyasae o igoro, ong’eire amaruoti onsi are ase ense. Ere onchikire imoaagachere enyomba aaria Yerusalemu, omochie ore ase ense y’Abayuda.

3Onde bwensi ore ase egati yaino, ore bw’abanto baye, tiga atiire gochia Yerusalemu, aaria ase ense y’Abayuda, erinde aagache enyomba y’Omonene, Nyasae bw’Abaisraeli, na Nyasae oye abe amo nere. Ere nere Nyasae omenyete Yerusalemu.

4Aande onsi onde obo atigarete ore omomenyi, abanto b’aase agwo bamokonye chifeta, ne chitahabu, na ebinto binde, ne chitugo, amo nebiegwa bi’ogwancha ase enyomba ya Nyasae aaria Yerusalemu.”

5Erio abateneneri be chiamate chi’Abayuda na Ababenjamin amo nabakuani na Abalawi, kera omonto oyo Nyasae akunire omoika oye ng’a atiire, erinde aagache naende enyomba y’Omonene aaria Yerusalemu, bakebeka ang’e.

6Abanto bonsi abamenyete amo nabarabwo bakabakonya ase okobaa ebikorero bie chifeta, na ebie chitahabu na ebinto binde, ne chitugo, na ebinto bie rigori rinene, amo nebinto baruete ase ogwancha.

7Boigo omoruoti Koresi akairania ebikorero bi’enyomba y’Omonene, biria Nebukadinesaro arusetie Yerusalemu na akabigacha ase enyomba ye chinyasae chiaye.

8Ebikorero ebio Koresi, omoruoti bw’Abaayemi, akabia Mitiredati, omoteneneri bwe chikungo. Mitiredati akabibara, akabia Sesibasari, omogambi bw’Abayuda.

9Oyo noro omobaro bw’ebinto ebio: Chisani chiroisirie korwa ase chitahabu, emerongo etato (30), ne chisani chiroisirie korwa ase chifeta, elifu eyemo (1,000), na ebitaabo bi’ogosambera ubani, emerongo ebere na kianda (29);

10chibakuri chiroisirie korwa ase chitahabu, emerongo etato (30), na echiroisirie korwa ase chifeta, amagana ane, na ikomi (410), naende ebikorero binde, elifu eyemo (1,000).

11Ebikorero bionsi biaroisirie korwa ase chitahabu ne chifeta nigo biarenge chilifu isano, na amagana ane (5,400). Ebio bionsi Sesibasari akabiira Yerusalemu; ekero abanto baria barenge ase obosomba baruete Babeli, bakagenda Yerusalemu.

Jump to: Chapter 2 →