Ezra 3

Gussi (EBIBILIA ENCHENU) 2020

← Chapter 2 Jump to: Chapter 4 →

1Ekero omotienyi o gatano na kabere oigete, na Abaisraeli bamenyete ase emechando yabo, bonsi bagasangererekana ase obomo agwo Yerusalemu.

2Erio Yesua, mosinto o Yosadaki, amo nabakuani bamwabo, na Serubabeli, mosinto o Sealitieli, na abanto bamwabo, bakaimoka koagacha egesasimero kia Nyasae bw’Abaisraeli, bamoruere ebing’wanso bi’ogosambwa ase kerokio, buna arikire ase amachiko a Musa, omonto o Nyasae.

3Bakaagacha egesasimero keria aase aye, erinde bamoruere Omonene ebing’wanso bi’ogosambwa mambia na morogoba, ekiagera nigo bairogete abanto bamenyete ase ense eria.

4Barabwo bakaba bakorenda Rituko Rinene ri’Ebigutu, koreng’ana buna riachigetwe, na kera rituko bakaba bakorua ebing’wanso bi’ogosambwa ase omobaro ochikire o kera rituko.

5Amo nayio bakaba bakorua ebing’wanso bi’ogosambwa bia botambe, na ebi’Omotienyi Omoyia, na ebi’Amatuko ande Amanene aatananetwe ase Omonene, amo nebing’wanso bi’ogwancha, ebio omonto arenge korua ase Omonene.

6Abanto bagachaka korua ebing’wanso bi’ogosambwa ase Omonene ase rituko rie ritang’ani ri’omotienyi o gatano na kabere, korende oboroso bwe Hekalu y’Omonene konya tiborabekwa.

7Abanto bakarua chibesa, bakaa abaagacheri b’amagena, na abasenia be chibao, naende bakarua chindagera, na ebinyugwa, na amaguta ’amazeituni, ase Abasidoni na Abaturo, erinde barente emecharake korwa Lebanoni goetera ase enyancha goika Yopa, koreng’ana buna Koresi, omoruoti bw’Abaayemi abaete ribaga.

8Ase omotienyi o kabere, omwaka o kabere, nyuma abanto kobairanire gocha ase enyomba y’Omonene agwo Yerusalemu, emeremo egachakwa. Serubabeli, mosinto o Sealitieli, na Yesua, mosinto o Yosadaki, bagachaka emeremo amo nabanto bamwabo, na abakuani, na Abalawi, na bonsi abachete Yerusalemu korwa ase obosomba. Abalawi bonsi abarenge nemiaka emerongo ebere na goetania bagachorwa gotenenera emeremo y’enyomba y’Omonene.

9Yesua na abamura baye amo nabamwabo, na Kadimeli na abamura baye, abanto b’ororeria rwa Hodawia, bakaba bagotenenera abakori emeremo b’enyomba ya Nyasae. Barabwo bakaba bagokonywa nabanto b’eamate ya Henadadi na abana babo, abarenge Abalawi.

10Ekero abaagachi bachagete kobeka oboroso bwe Hekalu y’Omonene, abakuani babegete chianga chi’obokuani bagacha nebirombeta, na Abalawi abarenge b’ororeria rw’Asafu babwate chisani chigoakanigwa kwoga, ase okomotogia Omonene, koreng’ana buna Daudi, omoruoti bw’Abaisraeli, achigete.

11Bakaba bagotera na goitabererania, bagotogia Omonene na komoiraneria ng’a mbuya mono, bagoteba, “Omonene nomuya, ekiagera obwanchani bwaye ase Abaisraeli nigo bogendererete goika kare na kare.” Abanto bonsi bagaaka amariogi amanene komotogia Omonene, ekiagera oboroso bw’enyomba y’Omonene konya bwabekirwe.

12Abange ase abakuani, na Abalawi, na abateneneri be chiamate chiabo, baria barenge abagotu, abaroche enyomba eria ye ritang’ani, bono ekero baroche oboroso bw’eyio enyia bwabekirwe, bakarera na koiyeria amariga. Korende abange bagaaka amariogi amanene ay’omogoko.

13Abanto tibanyarete gwatanana amariogi ’omogoko are goakwa korwa ase aria ay’okorera. Nigo baagete amariogi amanene mono akaigweka gochia aare mono.

← Chapter 2 Jump to: Chapter 4 →