Ezra 9

Gussi (EBIBILIA ENCHENU) 2020

← Chapter 8 Jump to: Chapter 10 →

1Nyuma y’amang’ana ayio onsi kaerire, abatang’ani bagacha asende, bagantebia, “Abaisraeli, amo n’abakuani, na Abalawi, tibeatananeti korwa ase abanto abamenyete ase chinse echio. Nigo bagokora okogechia okwo Abakanani, na Abahiti, na Abaperisi, na Abayebusi, na Abaamoni, na Abamoabu, na Abamisiri, na Abaamori bagokora.

2Barabwo banyuomire abaiseke b’abanto abwo, naende banyuomeirie abamura babo abaiseke b’abanto abwo. Bono egesaku eke egechenu giochoganire nabanto be chinse echi. Abagambi na abatang’ani b’abanto nabwo bare abe ritang’ani ase ogokora okwo kw’ogotegenwa.”

3Ekero naigwete amang’ana ayio, nigo natandorete chianga chiane na eganchwa yane, ngasunyora etukia yane, ne chinderu chiane, erio ngaikaransa ngaichana.

4Abanto bonsi abaigusetwe ase engencho y’amang’ana aria Nyasae bw’Abaisraeli akwanete igoro y’ogotegenwa kw’abanto baria bairanete korwa ase obosomba, bagasangererekana asende agwo ase naikaransete ing’ichanete goika engaki y’okoruegwa gw’ekeng’wanso kia mogoroba.

5Na ekero engaki y’okoruegwa gw’ekeng’wanso kia mogoroba yaigete, nkaimoka korwa aase aria naikaransete inyekeetie, imbegete chianga na omwambaro one otandogete, erio ngatung’ama inse nkaumama, nkarambora amaboko aane gochia ase Omonene, Nyasae one,

6ngasaba, “Aye Nyasae one, nabeire nobosooku, na obosio bwane bwabeire nomoichano; tinkonyara gokorigereria aye Nyasae one. Ebibe biaito biabuchire gotoetania goika igoro, na okomocha gwaito gwaikire agwo igoro.

7Korwa amatuko e chisokoro chiaito goika rero iga twabeire tore nokomocha okonene, na ase engencho y’ebibe biaito intwe, na abaruoti baito, twabeire tokobekwa ase amaboko ’abaruoti be chinse, na goitwa nemioro, na gwoswa, naende togasakorwa na twabeire tokonyora obosooku, buna ere goika rero iga.

8Omonene Nyasae oito ase engaki enke kwaorokirie obuya bw’amabera asetore, gwatotigire abatigari abatwatoorekire; gwatonyoreire obotamero ime y’Aase ao Aachenu. Nigo kwamorekeire amaiso aito ase engaki, erinde totimoke na tobe abayia ase obosibwa bwaito.

9Intwe nigo tore abasibwa; nonya naboigo, aye Nyasae oito toratotiga ase obosibwa bwaito. Aye gwatoorokeirie obwanchani bwao bogendererete botambe, na kwagerire twanyorire ogwancherwa ase abaruoti b’Abaayemi. Barabwo batoeire ribaga koagacha naende enyomba yao, eria yatagoretwe, aye Nyasae oito, na twaeirwe eburi egotokengera aiga ase ense y’Abayuda na ase Yerusalemu.

10“Na bono, aye Nyasae oito, ninki toranyare gokwana nyuma y’amang’ana aya onsi? Intwe twatigire kobwata amachiko ao,

11ayio gwachigete goetera ase abasomba bao ababani ogateba: Ense eria mogochia koira ebe eyaino nigo ere eyetachenegeti, ekiagera abanto b’aroro bayekorire yabeire enyaka ase okoyeichoria nogokora kwabo gw’okogechia korwa ensinyo eyemo goika eyende.

12Ase ayio, timobaisa gosokia abaiseke baino ase abamura babo, gose timobaisa kobarigeria omorembe gose ogosesenigwa. Mobe abakong’u na morie amaya ay’ense eye na moyetigere abana baino ebe omwando obo kogenderera botambe.

13Na bono nonya amang’ana aya onsi aikire gotonyora ase engencho y’ogokora gwaito okobe, na okomocha gwaito okonene, twarorire ng’a aye, Nyasae oito, totoeti egesusuro buna ebibe biaito bigwenerete, korende gwatotigeire abatigari buna aba iga.

14Inee! Ntosarie naende amachiko ao na tonyuomerane nabanto aba bagokora okogechia oko? Inee! Igo aye tokoba nendamwamu asetore na otosirie kegima, erinde abatigari tibanyorekana, gose monto onde atooreke?

15Aye Omonene, Nyasae bw’Abaisraeli, nigo ore omonyene oboronge, korende gwatotigairie intwe tore abake boka abatwatoorekire, buna tore aiga rero. Rora, nigo tore aa ase obosio bwao tokoorokia okomocha gwaito, na monto tari oranyare gotenena ase obosio bwao ase engencho y’okomocha buna oko.”

← Chapter 8 Jump to: Chapter 10 →