Ezra 6

Gussi (EBIBILIA ENCHENU) 2020

← Chapter 5 Jump to: Chapter 7 →

1Omoruoti Dario agachika, na obotuki bogakorwa ase chibuku chiagachire agwo Babeli ase amagachero ay’oboruoti.

2Na agwo Ekibatana, omochie omonene ase orogongo rw’Abamedia, ebuku ekanyorekana erikire amang’ana aya:

3“Ase omwaka bwe ritang’ani bw’okogamba kw’omoruoti Koresi, ere akarua ogochika okwo: Enyomba ya Nyasae ere Yerusalemu, tiga eagachwe naende, na oboroso bwaye bokong’igwe, erinde ebing’wanso bionsi, amo na biria bi’ogosambwa, birentwe aroro na koruegwa. Obotambe bw’enyomba eyio gochia igoro bobe obw’amaboko emerongo etano nomo, na obogare bobe obw’amaboko emerongo etano nomo.

4Amagena aagachwe ase chindwaro isato, na orwaro oromo roagachwe ne chibao. Chibesa chiraakanerwe chirwe ase ekungo y’oboruoti.

5Naende ebikorero bi’enyomba ya Nyasae biroisirie korwa ase chitahabu ne chifeta, biria Nebukadinesaro arusetie korwa ase Hekalu yare Yerusalemu, akabiira Babeli, bionsi biiranigwe bibekwe naende ime ase Hekalu ere Yerusalemu; mobibeke ime ase enyomba ya Nyasae, kera ekemo aase aye.”

6Ase ayio Dario akarika rirube iga: “Bono aye Tatenai, omogavuna bw’orogongo rore bosongo y’orooche rw’Eufarati, na Setari‐Bosenai, na abagavuna bande abwo mokogamba komo agwo ase orogongo rore bosongo y’orooche roria, inwe beera aare kegima.

7Inwe tiga emeremo egokorwa ase enyomba eyio ya Nyasae egenderere; tiga omogavuna bw’Abayahudi, na abagaaka babo bagenderere koagacha naende enyomba ya Nyasae aase yarenge.

8Amo nayio nachikire amang’ana morakorere abagaaka abwo b’Abayahudi ase okoagacha enyomba eyio ya Nyasae naende. Emeremo yonsi nigo eraakanerwe korwa ase chibesa chi’ekungo y’oboruoti, echikorwa ase ebango eria ekorusigwa korwa ase orogongo rore bosongo y’orooche rw’Eufarati; mobe mokobaakana motari gotebana.

9Na kende gionsi abakuani bare agwo Yerusalemu baraganie baegwe. Kera rituko nigo baraegwe chieri chinsae, ne chimingichi gose ching’ondi, chibe ebing’wanso bi’ogosambwa ase Nyasae o igoro. Boigo baegwe engano, na omonyo, na edivai, na amaguta ’amasabibu. Baegwe ebinto ebio, tibamocha kobiegwa.

10Igo mbanyare komoruera Nyasae o igoro ebing’wanso bikomogwenera, na gosabera obogima bwane, inche omoruoti, na obw’abamura baane.

11Boigo nachikire ng’a, monto onde bwensi oraonchore ring’ana eri, omwamba osomorwe korwa ase enyomba yaye, na ere omonyene atongwe ase oro, na enyomba yaye ekorwe ebe etui y’eubi.

12Tiga Nyasae, oyo obekire erieta riaye ribeere aroro, aonchore na koiyeria inse omoruoti onde bwensi, gose abanto, barateeme koonchora ogochika oko, gose gosaria enyomba eye ya Nyasae ere Yerusalemu. Inche Dario narure ogochika okwo, tiga koigwerwe kegima.”

13Bono Tatenai, omogavuna bw’orogongo rore bosongo y’orooche roria, na Setari‐Bosenai, na abarenge kogamba komo, bagakora ase okwerwa amang’ana ayio onsi Dario omoruoti konya achikire.

14Abagaaka b’Abayahudi bakagenderera koagacha na konyora ogosesenigwa goetera ase obobani bwa Hagai na Zakaria bw’ororeria rwa Ido. Igo abanto bagakoora emeremo y’oboagacho obwo buna bachigetwe na Nyasae bw’Abaisraeli, na buna Koresi, na Dario, na Aritasasita, abaruoti b’Abaayemi bachigete.

15Enyomba eria ekaagachwa ekaera ase rituko ria gatato ri’omotienyi okorokwa Adari, ase omwaka o gatano na rimo bw’okogamba kwa Dario, omoruoti.

16Bono Abaisraeli: abakuani, na Abalawi, na abanto bande abwo bairanete korwa ase obosomba, bagakora omoyega omonene bw’omogoko ase ogwatanana enyomba eria ya Nyasae na koyechena.

17Na ase ogwatanana enyomba eye na koyechena, bakarua chieri rigana erimo, ne chimingichi amagana abere, ne chimanwa chimingichi chie ching’ondi amagana ane, chikaba ebing’wanso. Boigo bakarua chigoree ikomi na ibere chikaba ebing’wanso bi’ebibe ase engencho y’Abaisraeli. Echio nigo chiaruetwe koreng’ana nomobaro bw’ebisaku bi’Abaisraeli.

18Boigo bakabeka abakuani ase ebiombe biabo, na Abalawi ase emeremo yabo, ase okomokorera Nyasae agwo Yerusalemu, koreng’ana buna erikire ase ebuku ya Musa.

19Ase rituko ria ikomi na kane ri’omotienyi bwe ritang’ani, abanto baria bairanete korwa ase obosomba bakarenda Epasaka.

20Abakuani na Abalawi konya bechenire; bono bonsi nigo barenge abachenegete. Ase ayio bakanyenya chimanwa chiria chie ching’ondi chi’Epasaka ase engencho y’abwo bonsi bairanete korwa ase obosomba, na ase abakuani bamwabo, na ase barabwo abanyene.

21Chinyama chie chimanwa chiria nigo chiarietwe n’Abaisraeli baria bairanete korwa ase obosomba, boigo na kera omonto bweatananete korwa ase ogosaria kw’abanto b’ebisaku b’ense eria na kobwatana n’Abaisraeli ase ogosasima Omonene, Nyasae bw’Abaisraeli.

22Ase engaki y’amatuko atano na abere bakaba barendete Rituko riria Rinene ri’Emegati etabekiri memera bare nomogoko. Omonene nigo abarenterete omogoko oyio ase okoonchora enkoro y’omoruoti bw’Abaasuri, erinde akabancha akabakonya mono ase emeremo y’enyomba ya Nyasae oyore Nyasae bw’Abaisraeli.

← Chapter 5 Jump to: Chapter 7 →