Ezra 7

Gussi (EBIBILIA ENCHENU) 2020

← Chapter 6 Jump to: Chapter 8 →

1Nyuma y’amang’ana aria kaerire ase engaki y’okogamba kw’Aritasasita, omoruoti bw’ense y’Ayemi, narengeo omonto okorokwa Ezara, mosinto o Seraya, bw’Asaria, o Hilikia,

2o Salumu, o Zadoki, bw’Ahitubu,

3bw’Amaria, bw’Asaria, o Merayoti,

4o Seraya, o Usi, o Buki,

5bw’Abisua, o Finehasi, bw’Eleazari, o Haroni, omokuani omonene.

6Ezara oyio akarua Babeli. Ere nigo arenge omworokia bw’amariko; nigo orokereretigwe na omanyete mono amachiko a Musa, ayio Omonene, Nyasae bw’Abaisraeli, aruete; na ekiagera okoboko kw’Omonene, Nyasae oye, kwarenge amo nere, omoruoti akamoa gento kende gionsi aboretie.

7Ase omwaka o gatano na kabere bw’okogamba kw’Aritasasita omoruoti, abande b’Abaisraeli, na abakuani, na Abalawi, na abateri, na abarendi b’ebiita, na abakori emeremo be Hekalu, bakagenda Yerusalemu.

8Bono ase omwaka o gatano na kabere, omotienyi o gatano, bw’okogamba kw’omoruoti oria, Ezara agaika Yerusalemu.

9Nigo achagete orogendo rwaye korwa Babeli ase rituko rie ritang’ani ri’omotienyi bwe ritang’ani, na agaika Yerusalemu rituko rie ritang’ani ri’omotienyi o gatano, ekiagera okoboko kwa Nyasae oye kwarenge amo nere ase okomokonya.

10Ezara konya orure enkoro yaye kweorokereria amachiko ’Omonene na koyakora, naende nigo arenge kworokereria Abaisraeli emeroberio yaye, na okogamba kwaye kwa boronge.

11Amang’ana aya naro arikire ase rirube riria omoruoti Aritasasita aete Ezara, omokuani na omworokia bw’amariko, oyo bworokereretigwe na omanyete mono amachiko ’Omonene na emeroberio yaye echikire ase Abaisraeli:

12“Inche Aritasasita, omoruoti bw’abaruoti, ngokorikera inde aye Ezara omokuani, aye kwegerete amachiko a Nyasae o igoro. Amakwania amo nayakobwatia ayio.

13“Nachikire ng’a monto onde bwensi bw’Abaisraeli, gose oyo bw’abakuani babo, gose oyo bw’Abalawi, oyomenyete ase oboruoti bwane, karanche kogenda Yerusalemu amo naye, tiga agende.

14“Inche omoruoti, amo nabasemia baane batano na babere, twagotomire ogende komanya amang’ana ’ense y’Abayuda, na aya Yerusalemu, kobwatekana namachiko a Nyasae oo, ayio obwate ase okoboko kwao.

15Naende oire chifeta ne chitahabu chiria inche omoruoti, na abasemia baane, twarure nogwancha ase Nyasae bw’Abaisraeli, oyio obomenyo bwaye bore Yerusalemu.

16Boigo oire chifeta ne chitahabu chionsi, echio oranyore korwa ase ense yonsi ya Babeli, oire nokoruegwa kw’ogwancha okwo abanto na abakuani bararue ase enyomba ya Nyasae obo ere Yerusalemu.

17“Obe omwegenwa, na ase chibesa echio ogore chieri, ne chimingichi, ne chimanwa chie ching’ondi, na okoruegwa kw’endagera, na okw’ebinyugwa bikoruegwa amo nebing’wanso ebio. Orue ebinto ebio ase egesasimero ki’enyomba ya Nyasae oo ere agwo Yerusalemu.

18Emeremo ende yonsi aye amo nabanto bamino morarore ere buya, chibesa chiratigare mochiyekorere, korende mokore igo kobwatekana nogwancha kwa Nyasae oino.

19Ebikorero ebio kwaeirwe gokorera emeremo ase enyomba ya Nyasae oo, obiire bionsi, obibeke ase obosio bwa Nyasae agwo Yerusalemu.

20Ebinto binde bionsi biganeirie ase enyomba ya Nyasae oo, ebio ogwenerete korenta aroro, obigore ne chibesa chikorwa ase ekungo y’omoruoti.

21“Naende inche omoruoti Aritasasita narure ogochika ase abagachi bonsi be chikungo bare ase orogongo rore bosongo y’orooche rw’Eufarati ng’a, gento kende gionsi Ezara omokuani oyo bwegerete amachiko a Nyasae o igoro araganie korwa asemore, mogekorere ase oboronge.

22Momoe goikera chifeta chitalanta rigana erimo (100), na engano ebitonga elifu eyemo (1,000), na edivai chilita chilifu isato, na amagana atano na rimo (3,600), na amaguta ’amazeituni chilita chilifu isato, na amagana atano na rimo (3,600), na momoe omonyo otari na kerengo.

23Gento kende gionsi Nyasae o igoro arachike ng’a gekorwe, ekio gekorwe boronge ase engencho y’enyomba ya Nyasae o igoro, erinde endamwamu ya Nyasae tebaisa koba igoro y’oboruoti bwane, na abamura baane.

24Naende nigo tokobamanyia ng’a timobaisa kobeka ebango gose ogochoga ase onde bwensi bw’abakuani, gose Abalawi, gose abateri, gose abarendi b’ebiita, gose abakori emeremo be Hekalu, gose abakori emeremo bande b’enyomba ya Nyasae.

25“Bono aye Ezara kwaeirwe obong’aini na Nyasae oo. Obokorere emeremo ase ogochora abagambi ebina na abamanyi b’amachiko, erinde babe bakogamba ebina bi’abanto bonsi ase orogongo rore bosongo y’orooche rw’Eufarati, aba bonsi bamanyete amachiko a Nyasae oo; na abatayamanyeti oborokererie bayamanye.

26Monto onde bwensi oraange koigwera amachiko a Nyasae oo, na ay’omoruoti, oyio anacherwe ekina kia boronge, kebe eki’ogokwa, gose eki’ogoserigwa, gose kourwa ebinto biaye, gose asibwe.”

27Omonene, Nyasae bwe chisokoro chiaito, atogigwe, oria obegete ring’ana eri ime ase enkoro y’omoruoti, oyobwanchire gokora enyomba y’Omonene ere Yerusalemu ebe ensiani mono.

28Ere Omonene oorokirie asende obwanchani bwaye botari koera ase obosio bw’omoruoti, na ase abasemia baye, na abanene bonsi bare gokonya omoruoti bare nokobua. Inche nkaba noboremu, ekiagera okoboko kw’Omonene, Nyasae one, kwarenge amo nainche, na igo ngasangereria abatang’ani b’Abaisraeli batiire amo nainche.

← Chapter 6 Jump to: Chapter 8 →