Ezra 5

Gussi (EBIBILIA ENCHENU) 2020

← Chapter 4 Jump to: Chapter 6 →

1Bono ekaba ng’a ase erieta ria Nyasae, oyore Omonene obo, ababani Hagai na Zakaria bw’ororeria rwa Ido mbabanete ase Abayahudi abamenyete ase ense ya Yuda na Yerusalemu.

2Erio Serubabeli, mosinto o Sealitieli, na Yesua, mosinto o Yosadaki, bagachaka koagacha naende enyomba ya Nyasae agwo Yerusalemu, na ababani ba Nyasae mbarengeo amo nabarabwo ase okobakonya.

3Ase engaki eyio Tatenai, omogavuna bw’orogongo orwo rwa bosongo y’orooche rw’Eufarati, na Setari‐Bosenai, na abande babwataine nabwo, bagacha, bakababoria, “Ning’o obaa ribaga mokoagacha enyomba eye na gokoora koagacha orwaki orwo?”

4Naende bakaboria iga, “Abaagachi b’oboagacho obo, naki bakorokwa?”

5Korende eriso ria Nyasae obo nigo riarenge ririgereretie abagaaka b’Abayahudi, na abanto baria tibabatangete goika amang’ana aria amoikere Dario. Nyuma y’ayio bairanerigwe ase rirube igoro y’amang’ana ayio.

6Ase igo Tatenai, omogavuna bw’orogongo orwo rwa bosongo y’orooche rw’Eufarati, na Setari‐Bosenai, na abagavuna bande baare kogamba amo nabarabwo ase orogongo orwo bagatoma rirube ase Dario omoruoti.

7Bakamotomera amang’ana arikire iga: “Ase Dario omoruoti, omorembe bwonsi obe asore!

8“Nigo togokomanyia aye omoruoti ng’a intwe ntwagenda ase orogongo orwo rw’Abayuda, ase enyomba ya Nyasae oyore omonene. Nigo egendererete koagacherwa amagena amanene mono, ne chibao chibekire ase chinyasi. Ekeene, emeremo eye nigo egokorwa ase okwerwa okonene, na nigo esesenirie ase amaboko abo.

9“Agwo ntwakwana nabagaaka baria, tokababoria iga: Ning’o obaa ribaga mokoagacha enyomba eye na gokoora koagacha orwaki oro?

10Naende ntwababoria amarieta abo, erinde tokorikere amarieta ’abatang’ani abwo babo.

11“Amang’ana aya naro batotebia: Intwe nigo tore abasomba ba Nyasae o igoro na ense, na nigo tokoagacha naende enyomba eria omoruoti omonene bw’Abaisraeli aagachete na akayekoora ase emiaka emenge yaetire.

12Korende ekiagera chisokoro chiaito chiagerete Nyasae o igoro akaba nendamwamu, ere akabeka abanto baria ase okoboko kwa Nebukadinesaro Omokalidayo, omoruoti o Babeli, oria osaretie enyomba eye na akaira abanto Babeli.

13Korende ase omwaka bwe ritang’ani bw’okogamba gwa Koresi, omoruoti o Babeli, ere Koresi naruete ogochika ng’a enyomba eye eagachwe naende.

14Na ebikorero bi’enyomba ya Nyasae biaroisirie korwa ase chitahabu ne chifeta, ebio Nebukadinesaro arusetie korwa ase Hekalu yarenge aiga Yerusalemu, akabiira akabibeka ase hekalu yare Babeli. Ebikorero ebio omoruoti Koresi akabirusia ase hekalu ya Babeli, akabia omonto okorokwa Sesibasari oyo abegete koba omogavuna,

15akamotebia ng’a arente ebikorero ebio, abibeke ime ase Hekalu ere aiga Yerusalemu, naende atige enyomba ya Nyasae eagachwe aase yarenge.

16Bono Sesibasari nere ochagete kobeka oboroso bw’enyomba ya Nyasae ere aiga Yerusalemu, na korwa engaki eyio goika rero iga, enyomba eye nigo egendererete koagachwa, teraera.

17“Gaki bono, aye omoruoti, onye amang’ana aya agokogwenera, ochike obotuki bokorwe ase amagachero e chibuku chi’oboruoti bwa Babeli, omanye gose Koresi omoruoti naruete ogochika ng’a enyomba ya Nyasae ere Yerusalemu eagachwe naende. Aye omoruoti ototomere aya orengereretie igoro y’amang’ana aya.”

← Chapter 4 Jump to: Chapter 6 →