Ezra 4

Gussi (EBIBILIA ENCHENU) 2020

← Chapter 3 Jump to: Chapter 5 →

1Bono ekero ababisa b’Abayuda, na ab’Ababenjamin baigwete ng’a abanto baria bairanire korwa ase obosomba naende ng’a nkoagachera bare Omonene, Nyasae bw’Abaisraeli, Hekalu,

2bakagenda ase Serubabeli, na ase abateneneri be chiamate chiabo, bakabatebia, “Tiga tobaagachisie, naintwe nabo togosasima Nyasae oino buna inwe mogokora, na ase chingaki korwa kare gese Esari‐Hadoni, omoruoti bw’Abaasuri, oria otorentete aiga, twabeire tokorwa ebing’wanso ase Nyasae oyo.”

3Korende Serubabeli, na Yesua, na abateneneri bande be chiamate chi’Abaisraeli, bakabakania, bakabatebia, “Inwe timogwenereti motoagachisie enyomba ya Nyasae oito, korende nintwe tweka toraagachere Omonene, Nyasae bw’Abaisraeli, enyomba, buna Koresi, omoruoti bw’Abaayemi atochigete.”

4Erio abanto b’ense eria bagaita Abayuda emioyo, bakaboboyia ng’a tibagenderera koagacha.

5Abanto abwo bakarenta abasemia baare goakanerwa, nabwo bakaba bakorua ogosemia okobe gosaria emeroberio yabo, bakaba bagokora igo korwa amatuko ’okogamba gwa Koresi, omoruoti bw’Abaayemi, goikera ay’okogamba kwa Dario, omoruoti bw’Abaayemi.

6Ase omochakano bw’okogamba kw’Ahaswero, ababisa baria bakarika amang’ana ay’ogosoera abanto bamenyete ase orogongo rw’Abayuda, na ase Yerusalemu.

7Naende ase amatuko ’okogamba kw’Aritasasita, omoruoti bw’Abaayemi, Bisilamu, na Mitiredati, na Tabeeli, na abanto bande babwataine komo, bakarikera Aritasasita rirube ase chinuguta chi’Ekearamaiki na ase omonwa oyio.

8Boigo Rehumu, omosemia omonene, na Simusai omoriki, bakarikera Aritasasita rirube bagosoera Yerusalemu.

9Erio Rehemu, omosemia omonene, na Simusai omoriki, na abande babwataine nabarabwo: abagambi ebina, na abagavuna, na abanene b’oboruoti, na Abaayemi, na Abaereki, na Abababeli, na Abasusa korwa ase ense y’Abaelamu,

10na abanto b’ebisaku binde biria Osinapari, oyorenge omonene naende osikire, arentete, akababeka komenya ase emechie ya Samaria na ase chinsemo chinde chi’orogongo roria, bosongo y’orooche rw’Eufarati, bakarika rirube.

11Aya naro amang’ana e rirube riria riarigetwe: “Ase Aritasasita omoruoti. Intwe abasomba bao aba tomenyete aiga bosongo y’orooche rw’Eufarati, twagokwanirie.

12“Aye omoruoti, bono manya ng’a Abayahudi aba barua asore, bagacha asetore aiga Yerusalemu, bachakire koagacha omochie oria oichire nogosaria na obobe. Nigo bare ang’e gokoora chindwaki chiaye na koroisia amaroso aye.

13Aye omoruoti, manya ng’a onye omochie oyo okoagachwa naende, ne chindwaki chiere koagachwa, rirorio abanto aba tibakorua ebango, gose echogo y’ebinto babwate, gose ebango ye chinchera, na ebitoki bi’omoruoti nigo birakee.

14Na ekiagera intwe tokonyora omonyo oito korwa ase enyomba yao, aye omoruoti, titogwancha korora aye gokorenterwa ogochaywa buna okwo. Ase ayio twatomire amang’ana ayio asore, aye omoruoti,

15erinde obotuki bokorwe ase chibuku aase amang’ana e chisokoro chiao arikire. Nonyore korwa ase amang’ana arigetwe ase chibuku chiria ng’a omochie oyo noyo bw’obobe na ogotaigwera, obeire okorenta emechando ase abaruoti, na ase chingongo chionsi, naende ng’a eburu‐buru na ogosaria nigo biarengeo korwa kare. Ayio agerete omochie oyio ogasarigwa.

16Intwe nigo togokomanyia, aye omoruoti, ng’a omochie oyo oise koagachwa naende, ne chindwaki chiaye chiagachwe chiere, rirorio orogongo rore bosongo y’orooche rw’Eufarati tirokoba orwao.”

17Omoruoti agatoma amairanerio aya: “Ase Rehemu, omosemia omonene, na Simusai omoriki, na ase abanto baria bande babwataine nabarabwo bamenyete Samaria, boigo nase baria barenge ase orogongo rore bosongo y’orooche rw’Eufarati, nabakwanirie.

18“Rirube mwatoma gocha asetore riasomirwe buya asende, nariigure.

19Nachika, na obotuki bogakorwa na amang’ana akanyorekana ng’a omochie oyio korwa kare obeire okorwania abaruoti, na ogotaigwera, na eburu‐buru amo namariomana mbiarenge imeo.

20Abaruoti barenge nokobua babeire bakogambera Yerusalemu na orogongo rwonsi rore bosongo y’orooche rw’Eufarati, na abwo babeire bakorenterwa ebango na echogo y’ebinto na eye chinchera.

21Ase ayio inwe karue ogochika ng’a abanto abwo batangwe batige gokora emeremo, erinde omochie oyio otigwe, toagachwa naende goika ekero inche ndarue ogochika.

22Timobaisa gotebana ase amang’ana aya. Nase ki inche omoruoti ndanyore emechando?”

23Erio ekero rirube ri’omoruoti Aritasasita riasometwe ase Rehumu, na ase Simusai omoriki, na ase abanto abwo babwatanete nabarabwo, barabwo bakagenda Yerusalemu bwango kegima ase Abayahudi, na ase chinguru bakababetereria ng’a tibagenderera koagacha.

24Bono emeremo yare gokorwa ase enyomba ya Nyasae agwo Yerusalemu egasiekwa kegima na ekaba egendererete gosiekwa goika omwaka o kabere bw’okogamba kwa Dario, omoruoti bw’Abaayemi.

← Chapter 3 Jump to: Chapter 5 →