Nehemiah 1

Gussi (EBIBILIA ENCHENU) 2020

Jump to: Chapter 2 →

1Aya namang’ana a Nehemia, mosinto o Hakalia. Ase omotienyi o Kisilewi, omwaka bw’emerengo ebere, ekero narenge ase eburi agwo Susa, omochie omonene,

2Hanani, oyomo bw’abaminto, agacha amo nabanto bande korwa ase ense y’Abayuda. Nkababoria igoro y’Abayahudi bande batigarete aroro bare moyo, abwo konya batoorekire korwa ase obosomba, naende nkababoria amang’ana igoro ya Yerusalemu.

3Bakang’iraneria, bagantebia, “Abatigari baria batooretigwe korwa ase obosomba bare ase orogongo rwabo, nigo bare ase emechando emenene na ogochaywa okonene Orwaki rwa Yerusalemu rwatagoirwe, na ebiita biaye biasambirwe.”

4Ekero naigwete amang’ana ayio, ngaikaransa inse, nkarera. Ase amatuko atai make nkaba nkobokia amagombo na kweng’ata amo nogosaba ase obosio bwa Nyasae ore igoro,

5ngateba, “Aye Omonene, Nyasae ore igoro, Nyasae Omonene bw’okoirokia, aye bwanchete na korenda okobwatana kwao kw’ogotianania na kobaa obuya abwo bagwanchete na babwatete amachiko ao.

6Ndigererie oigwe ogosaba kwane, inche omosomba oo. Nigo ngosaba ase obosio bwao omobaso na obotuko, ase engencho y’abasomba bao Abaisraeli, na koorokia ebibe intwe Abaisraeli twakorire asore. Ee, ekeene, nonya ninche amo nabanto b’eamate ya tata twakorire ebibe.

7Twakorire ogosaria okobe mono asore, twatigire kobwata amachiko na emeroberio echikire, ebio gwachigete Musa, omosomba oo.

8Bono inyora amang’ana aria gwachigete Musa, omosomba oo, okamotebia: Inwe motabeti abegenwa, goika imbasiarere gochia ase abanto b’ebisaku ebiao.

9Korende komorang’iranere na kobwata amachiko aane, nonya mwaserigwe gochia ase chinsinyo chi’ense, nigo ndabasangererie korwa aase agwo, mbarente aase nachorire kobeka erieta riane ribeereo.

10“Omonene, aba nigo bare abasomba bao na abanto bao. Naye kwababooretie nokobua kwao okonene goetera ase okoboko kwao kore ne chinguru.

11Aye Omonene, igwa ogosaba kwane, inche omosomba oo, amo nogosaba kw’abasomba bao, abwo bare nomogoko ase okoiroka erieta riao. Insesenia inche, omosomba oo, rituko ria rero, inyore ogwancherwa ase obosio bw’omonto oyo.” Ase engaki eyio nigo narenge omobogoria bw’ebinyugwa bi’omoruoti.

Jump to: Chapter 2 →