Nehemiah 6

Gussi (EBIBILIA ENCHENU) 2020

← Chapter 5 Jump to: Chapter 7 →

1Sanibalati, na Tobia, na Gesemu Omoarabu, amo nababisa bande baito, batebetigwe ng’a naagachire orwaki roria, naende ng’a konya naribirie aase onsi atagoretwe. (Nonya ase engaki eria konya tindabeka ebisieri ase ebiita.)

2Erio Sanibalati na Gesemu bagatoma abanto gocha kondangeria, bagoteba, “Inchuo toumerane aiga ase oyomo bw’emechie ere ase ense omweya ya Ono.” Korende nigo barengereretie gochia gonkorera amabe.

3Erio ngatoma abanto asebare, nkabatebia, “Nigo ngokora emeremo ere emenene mono; tinkonyara gotirimboka gocha agwo. Nase ki ndatige emeremo etenene, ntirimboke gocha asemore?”

4Bagatoma abanto asende chintunda inye, bagokwana amang’ana aria aria, na inche nkaba nkobairaneria amang’ana aria aria konya nabatebirie ritang’ani.

5Naende ase entunda ya gatano, Sanibalati agatoma omosomba oye asende obwate rirube ritamumekeirie

6Nigo riarikire iga: “Abanto b’ebisaku amo na Gesemu batebire ng’a aye amo n’Abayahudi bande nigo moganetie kwanga koigwera; naende ng’a nakio gekogera mokoagacha orwaki; na koreng’ana namang’ana ayio, aye noganetie koba omoruoti obo.

7Tari ayio oka, korende kwabekire ababani bakoraria agwo Yerusalemu ng’a naye omoruoti bw’Abayuda. Na bono omoruoti ngochia gotebigwa are amang’ana ayio; ase ayio inchuo toumerane naye tokwane komo.”

8Erio ngatoma amang’ana gochia asare, nkamoiraneria, “Amang’ana buna ayio tari ay’ekeene, ayio namang’ana ao aye omonyene okorengereria korwa ase enkoro yao na koyaroisia boigo.”

9Abanto baria bonsi nigo baganetie gotwoboyia, bakorengereria ng’a nigo bagochia gotoita emioyo, toborwe chinguru chi’ogokora emeremo eyio, erinde etenene. Korende ngasaba, “Aye Nyasae, ing’a chinguru na oboremu.”

10Rituko erimo nkagenda ase enyomba ya Semaya, mosinto o Delaya o Mehetabeli, oyio osiekeire mwaye. Ere agantebia, “Togende komo ase enyomba ya Nyasae, ase Hekalu eria ime, tosieke ebisieri bie Hekalu, ekiagera abanto abwo ngocha bare kogoita. Nigo barache ase obotuko bwa rero, bagoite bagosirie.”

11Nkamoiraneria, nkamotebia, “Inee! Omonto onga buna inche ningwenerete gotama? Omonto onga buna inche ninyare gotama gochia ase Hekalu ime, ase ogotooria obogima bwane? Tinkonyara kogenda aroro.”

12Inche nkamanya ng’a tari Nyasae omotomete, korende Tobia na Sanibalati bamoete chibesa akwane amang’ana arache konyora inche.

13Semaya nigo aetwe chibesa ng’a anyoboyie, nainche nyancherane nere, na ase enchera eyio nkore ebibe; erio bakwane amang’ana amabe igoro y’erieta riane, na gonchecheria ase ogonchaya.

14“Aye Nyasae one, inyora amang’ana a Tobia na Sanibalati, boigo aya Noadia, omobani oria omokungu, amo nay’ababani bande, abaganetie konyoboyia.”

15Orwaki roria rokaira amatuko emerongo etano, na abere, rokaera ase rituko ria emerongo ebere na gatano ri’omotienyi bw’Elulu.

16Ekero ababisa baito bonsi baigwete ayio, na abanto b’ebisaku bionsi biatoetanaine bayaroche, bakaba nobwoba obonene, bagechaya na gwesookera abanyene, ekiagera nigo bamanyete ng’a emeremo eyio nigo yakoretwe na goikeranigwa ase ogokonywa kwa Nyasae oito.

17Ase amatuko ayio onsi abasike b’Abayuda nigo bagendererete konagotoma amarube amange ase Tobia, nere nabo agendererete kona-gotoma ayande ase okobairaneria.

18Abanto abange b’ense ya Yuda konya babwatanire na Tobia ase ogotianania, ekiagera ere nigo anyuomete omoiseke o Sekania, mosinto bw’Ara; boigo Yehohanani, momura oye, konya onyuomire omoiseke o Mesulamu, mosinto o Berekia.

19Abayahudi abwo nigo barenge gotogia Tobia ase obosio bwane, na abwo nigo barenge komoirera amang’ana aane. Tobia omonyene akaba ogontomera amarube ay’okonyoboyia.

← Chapter 5 Jump to: Chapter 7 →