Nehemiah 11

Gussi (EBIBILIA ENCHENU) 2020

← Chapter 10 Jump to: Chapter 12 →

1Abatang’ani b’abanto bakamenya Yerusalemu, na abanto bande bagaaka obomera gochora omonto oyomo korwa ase kera ekeombe ki’abanto ikomi, agende komenya Yerusalemu, omochie omochenu, na abanto aba kianda abatigari bagende komenya ase emechie ende.

2Abanto bagasesenia abwo bonsi beruete kogenda komenya Yerusalemu.

3Ase emechie emeke ase ense y’Abayuda, kera omonto bw’Abaisraeli bande bonsi, na abakuani, na Abalawi, na abakori emeremo be Hekalu, na abana b’abasomba ba Sulemani, akamenya ase omwando oye. Aba nabwo abanene be chingongo chi’ense y’Abayuda abamenyete Yerusalemu,

4abande barenge ab’ororeria rwa Yuda, na abande ab’orwa Benjamin. Ab’ororeria rwa Yuda nabwo aba: Ataya, mosinto o Usia, o Zakaria, bw’Amaria, o Sefatia, o Mahalaleli, bw’ororeria rwa Peresi;

5Maaseya, mosinto o Baruku, o Koli-Hose, o Hasaya, bw’Adaya, o Yoyaribu, o Zakaria, bw’ororeria rwa Siloni.

6Abanto bonsi b’ororeria rwa Peresi abamenyete Yerusalemu, nigo barenge amagana ane, na emerongo etano nomo, na batano na batato (468). Bonsi nigo barenge chituoni chi’okorwana esegi.

7Ab’ororeria rwa Benjamin nabwo aba: Salu, mosinto o Mesulamu, o Yoedi, o Pedaya, o Kolaya, o Maaseya, o Itieli, o Yesaia.

8Na nyuma yaye Gabai na Salai. Bonsi nabanto amagana kianda, na emerongo ebere, na batano na batato (928).

9Yoeli, mosinto o Sikiri, nere orenge omoteneneri obo; na Yuda, mosinto o Hasenua, akaba omoteneneri o kabere ase omochie oria.

10Abakuani nabwo aba: Yedaya, mosinto o Yoyaribu, na Yakini;

11Seraya, mosinto o Hilikia, o Mesulamu, o Zadoki, o Merayoti, o Ahitubu, omoteneneri bw’enyomba ya Nyasae,

12na abamwabo abarenge gokora emeremo ase enyomba ya Nyasae, bonsi nabanto amagana atano na atato, na emerongo ebere, na babere (822); Adaya, mosinto o Yerohamu, o Pelalia, bw’Amusi, o Zakaria; o Pasuri, o Malikia,

13na abamwabo, abarenge abateneneri be chiamate, bonsi nabanto amagana abere na emerongo ene, na babere (242); Amasai, mosinto bw’Asareli, bw’Asai, o Mesilemoti, o Imeri,

14na abamwabo, abanto abamanyete gokora emeremo buya, rigana erimo, na emerongo ebere, na batano na batato (128). Omoteneneri obo nere Sabidieli, mosinto o Hagedolimu.

15Abalawi nabwo aba: Semaya, mosinto o Hasubu, bw’Asirikamu, o Hasabia, o Buni.

16Sabetai na Yosabadi, abwo babere nabwo barenge abateneneri b’Abalawi abwo barenge gokora emeremo isiko ase enyomba ya Nyasae;

17Matania, mosinto o Mika o Sabudi bw’ororeria rw’Asafu, oyorenge omoraai bw’amatera ase okoiraneria ng’a mbuya mono amo nogosaba; Bakibukia, nere orenge oyo o kabere ase Matania; Abuda, mosinto o Samua o Galali bw’ororeria rwa Yedutuni.

18Abalawi bonsi abamenyete ase omochie oyio omochenu nigo barenge amagana abere, na emerongo etano na etato, na bane (284).

19Abarendi b’ebiita nabwo aba: Akubu na Talimoni amo nabamwabo, abarenge korenda ase ebiita, bonsi nabanto rigana erimo, na emerongo etano na ebere, na babere (172).

20Abande b’Abaisraeli, na ab’abakuani, na ab’Abalawi, bakaba bamenyete ase emechie yonsi y’Abayuda, kera oyomo ase omwando oye.

21Korende abakori emeremo be Hekalu bakamenya agwo Ofeli. Siha na Gisipa nabwo barenge abateneneri b’abwo.

22Oyorenge omoteneneri bw’Abalawi abamenyete Yerusalemu, nere Usi, mosinto o Bani, o Hasabia, o Matania, o Mika. Usi nigo arenge oyomo bw’ororeria rw’Asafu, abanto abarenge abateneneri b’amatera ase enyomba ya Nyasae.

23Omoruoti nigo aruete ogochika igoro ase abanto b’eamate eyio, buna barenge gokora emeremo y’amatera agwo ase Hekalu, buna yaganeirie rituko ase rituko.

24Omoruoti nigo abegete Petahia, mosinto o Mesesabeli bw’ororeria rwa Sera, mosinto o Yuda, gotenenera abanto ase amang’ana onsi.

25Abayuda bande bakaba bamenyete ase ebichie ang’e namaremo abo. Abande bakamenya Kiriati-Ariba na ase ebichie biaye; abande bakamenya Diboni na ase ebichie biaye, na abande Yekabuseli na ase ebichie biaye;

26abande bakamenya Yesua, na Molada, na Beti-Peleti,

27na Hasani-Suali, na Beeri-Seba, na ase ebichie biaye;

28abande bakamenya Sikilagi, na Mekona na ase ebichie biaye;

29abande bakamenya Eni-Rimoni, na Sora, na Yarimuti;

30Sanoa, na Adulamu na ase ebichie biabo, na Lakisi na amaremo narengeo, na Aseka na ase ebichie biaye. Ase ayio bakaba bakomenya gochakera Beeri-Seba goikera ase Rikura ria Hinomu.

31Abanto b’egesaku kia Benjamin bakaba bakomenya gochakera Geba na kogenderera goikera Mikimasi, na Aiya, na Beteli na ase ebichie biaye;

32Anatoti, na Nobu, na Anania;

33Hasori, na Rama, na Gitaimu;

34Hadidi, na Seboimo na Nebalati;

35Lodi, na Ono, na ase Rikura ri’Abaroisia Ebinto.

36Ebiombe binde bi’Abalawi ebiamenyete ase ense y’Abayuda bikaba bikobarwa amo nabanto ba Benjamin.

← Chapter 10 Jump to: Chapter 12 →