Nehemiah 12

Gussi (EBIBILIA ENCHENU) 2020

← Chapter 11 Jump to: Chapter 13 →

1Oyo noro omoroberio bw’abakuani na Abalawi abairanete korwa ase obosomba amo na Serubabeli, mosinto o Sealitieli, na Yesua. Abakuani nabwo aba: Seraya, na Yeremia na Ezara;

2Amaria, na Maluku, na Hatusi;

3Sekania, na Rehumu, na Meremoti;

4Ido, na Ginetoi, na Abiya;

5Miyamini, na Maadia, na Biliga;

6Semaya, na Yoyaribu, na Yedaya;

7Salu, na Amoki, na Hilikia, na Yedaya. Abwo barenge abatang’ani b’abakuani na ab’abamwabo, ase amatuko a Yesua.

8Abalawi nabwo aba: Yesua na Binui, na Kadimieli, na Serebia, na Yuda, na Matania, oyio amo nabanto b’eamate yaye nabwo batenenerete emeremo y’amatera ay’ogoaka ng’a mbuya mono.

9Bakibukia na Uno, abamwabo, bagatenena kororia asebare, ekero barenge gokora emeremo yabo ase Hekalu.

10Yesua akaibora Yoyakimu, na Yoyakimu akaibora Eliasibu, na Eliasibu akaibora Yoyada,

11na Yoyada akaibora Yonathani, na Yonathani akaibora Yadua.

12Ase amatuko a Yoyakimu abateneneri be chiamate chi’abakuani nabwo aba: Meraya ase eamate ya Seraya, na Hanania ase eamate ya Yeremia;

13Mesulamu ase eamate y’Ezara, na Yehohanani ase eamate y’Amaria;

14Yonathani ase eamate ya Maluki, na Yosefu ase eamate ya Sebania;

15Adina ase eamate ya Harimu, na Helikai ase eamate ya Merayoti;

16Zakaria ase eamate ya Ido, na Mesulamu ase eamate ya Ginetoni;

17Sikiri ase eamate y’Abiya, na Pilitai ase eamate ya Miniamini, na eya Moadiya;

18Samua ase eamate ya Biliga, na Yehonathani ase eamate ya Semaya;

19Matenai ase eamate ya Yoyaribu, na Usi ase eamate ya Yedaya;

20Kalai ase eamate ya Salai, na Eberi ase eamate y’Amoki;

21Hasabia ase eamate ya Hilikia, na Netaneli ase eamate ya Yedaya.

22Omoroberio bw’abateneneri be chiamate chi’Abalawi okarikwa ase amatuko ’Eliasibu, na Yoyada, na Yohanani, na Yadua, Boigo oyo bw’abakuani okarikwa ekero Dario arenge omogambi bw’Abaayemi.

23Omoroberio bw’Abalawi abarenge abateneneri be chiamate chiabo okarikwa ase Ebuku y’Amang’ana ’Ebiro goikera ase amatuko a Yohanani, mosinto bw’Eliasibu.

24Oyo noro omoroberio bw’abateneneri b’Abalawi: Hasabia, na Serebia, na Yesua, mosinto o Kadimeli. Abwo amo nabamwabo bande nabwo babegetwe ase ebiombe biateneneretwe korigererania ase ogoitabererania amatera ay’ogotogia na koiraneria ng’a mbuya mono, buna Daudi, omonto o Nyasae, achigete.

25Matania, na Bakibukia, na Obadia, na Mesulamu, na Talimoni, na Akubu, abarendi b’ebiita, nigo barenge korenda ebigachero agwo ase ebiita.

26Abanto abwo nigo barengeo ase amatuko a Yoyakimu, mosinto o Yesua o Yosadaki, na ase amatuko a Nehemia omogavuna, na ay’Ezara, oyorenge omokuani na omworokia bw’amariko.

27Ekero omochie o Yerusalemu orenge gwatananwa na gochenwa, Abalawi bakarentwa Yerusalemu korwa aase ande onsi ase bamenyete, erinde bache ase ogwatananwa okwo bare nomogoko, babe bakoiraneria ng’a mbuya mono namatera, na goakania chisani chikwoga, na amakano ao ao.

28Chiamate ch’abateri chigasangererigwa korwa ase chinsemo chionsi chia Yerusalemu, na korwa ase emechie y’Abanetofa.

29Boigo bagasangererigwa korwa Beti-Giligali na korwa ase orogongo rwa Geba, na Asimaweti, ekiagera abateri abwo konya baagachire emechie yabo goetanana Yerusalemu.

30Abakuani na Abalawi bagechena abanyene, bagache na nabanto bonsi amo nebiita, na orwaki roria.

31Erio nkarenta abanene b’Abayuda igoro ase orwaki, ngachora ebiombe bibere ebinene bikaba bigotaara igoro ase orwaki roria na gotera ogotera gw’okoiraneria ng’a mbuya mono. Ekeombe ekemo kegataara agwo igoro ase orwaki gochia ase ensemo y’okorio goikera ase Egeita ki’Eubi.

32Abanto babwatetie ekeombe ekio nabwo aba: Hosaya, na ekeng’ese ki’abanene b’Abayuda,

33Asaria, na Ezara, na Mesulamu;

34Yuda na Benjamin, na Semaya, na Yeremia.

35Ababwatetie abwo n’Abakuani babwate ebirombeta, na Zakaria, mosinto o Yonathani, o Semaya, o Matania, o Mikaya, o Sakuri bw’Asafu.

36Abande b’eamate ya Zakaria: Semaya na Asareli, Milalai na Gilalai, Maai na Netaneli, Yuda na Hanani. Abwo nigo babwate ebinto biare kobugigwa, ebio Daudi, omonto o Nyasae, achigete. Ezara, omworokia bw’amariko, akaba otang’anete ekeombe ekio.

37Agwo ase Egeita gi’Ensoko kiarenge bosio bwabo bakariina ase ebiriinero gochia ase Omochie o Daudi. Agwo bakariina ase orwaki rwarenge rogoro y’enyomba ya Daudi, gochia ase Egeita ki’Amache, ase ensemo ya moocha.

38Ekeombe kende ki’abateri baria barenge gotera amatera ay’okoiraneria ng’a mbuya mono, bakagenda gochia ensemo y’okobee igoro ase orwaki roria, na inche amo nekeng’ese ki’abanto tokababwatia, tokagenda goetera ase Omorobiri bw’Eriko, gochia ase Orwaki Orogare.

39Naende togaetera Egeita gi’Efraimu, na Egeita Egekoro, na Egeita gie Chinswe, na Omorobiri o Hananeli, na Omorobiri bwe Rigana, goika ase Egeita gie Ching’ondi. Togakoorera orogendo rwaito agwo ase Egeita ki’Abarendi.

40Ase ayio ebiombe bi’abateri abarenge gotera amatera ay’okoiraneria ng’a mbuya mono bigatenena ime ase enyomba ya Nyasae, na inche amo nekeng’ese ki’abanene baria togatenena nabarabwo.

41Eliakimu na Maaseya, Miyamini na Mikaya, Elioenai na Zakaria, na Hanania, abarenge abakuani, bagatenena babwatete ebirombeta.

42Naende mbarengeo Maaseya na Semaya, Eleazari na Usi, Yehohanani na Malikia, Elamu na Eseri. Abateri abwo bagatera, na Yesirahia nere orenge omoraai obo.

43Ase rituko riria bakarua ebing’wanso ebinene, na bagachenga nomogoko omonene mono, ekiagera Nyasae abagogetie. Abakungu amo nabana boigo bagachenga, na omochengo oria orenge Yerusalemu okaigweka gochia aare.

44Ase engaki eria abanto bagachorwa korenda ebinyomba biarenge chikungo aase ebiegwa, na okwama kwe ritang’ani, ne chinsemo chia ikomi, biarenge kogachwa. Abanto abwo nigo barenge gosangereria korwa ase emegondo yonsi y’emechie ebinto biachikire ase amachiko biegwe abakuani na Abalawi, ekiagera emeremo y’abakuani na ey’Abalawi nigo yagogetie Abayuda.

45Abakuani na Abalawi bagakora emeremo ya Nyasae obo, na ey’ogochena. Abateri na abarendi b’ebiita bakaba bagokora emeremo yabo buna Daudi na Sulemani, omomura oye, bachigete.

46Ase amatuko aria a kare, aya Daudi na ay’Asafu, mbarengeo abaraai b’abateri, na abateri nigo barenge gotera amatera ay’ogotogia Nyasae na komoiraneria ng’a mbuya mono.

47Ase amatuko a Serubabeli, na aya Nehemia, Abaisraeli bonsi nigo barenge korua kera rituko ebiegwa biachikeire abateri na abarendi b’ebiita. Boigo naende bakaba bakoa Abalawi ebitari ebi baatananeretwe, na Abalawi barabwo bakaa abanto b’ororeria rwa Haroni ebitari biabo.

← Chapter 11 Jump to: Chapter 13 →