Nehemiah 2

Gussi (EBIBILIA ENCHENU) 2020

← Chapter 1 Jump to: Chapter 3 →

1Ase rituko erimo, ase omotienyi o Nisani, omwaka bw’emerongo ebere bw’okogamba kw’Aritasasita, edivai ekarentwa asare, na inche nkayeimokia, nkamoyea. Inche konya tinana koba nomoichano ase obosio bwaye ase engaki ende yonsi.

2Ase ayio omoruoti akamboria, “Nase ki okororekana kore nomoichano iga, naye tori omorwaire? Ekio tikeri egento ekeao otatiga obororo bore ase enkoro yao.” Ekero akwanete igo, nkaba nobwoba obonene mono,

3nkamoiraneria, “Aye omoruoti ochie kare! Inki keragere tindorekana inde nomoichano ekero omochie oria, aase chimbeera ohie chisokoro chiane chire, ogendererete koba ritombe, na ebiita biaye biasarigwe nomorero?”

4Erio omoruoti akamboria, “Ngento ki oganetie okorerwe?” Inche nkagenderera gosaba Nyasae o igoro.

5Erio ngatebia omoruoti, “Onye yakogweneire aye omoruoti, na inche, omosomba oo, nanyora ogwancherwa ase obosio bwao, ong’e ribaga ngende ase ense y’Abayuda, ase omochie oria ase chisokoro chiane chiatindegetwe, erinde nyoagache naende.”

6Ekero eting’ana mokaye yaikaransete agwo, omoruoti akamboria, “Nengaki eng’ana naki oganetie kogenda, naende indi orairane?” Ekero naroche ng’a omoruoti bwanchire kong’a ribaga, nkamotebia engaki eisaine.

7Naende ngatebia omoruoti, “Onye kwanyancheire, indikere amarube ng’irere abagambi b’orogongo rore bosongo y’orooche rw’Eufarati, erinde bang’e ribaga ng’eteo ngende ase ense y’Abayuda.

8Naende orike rirube rinde ase Asafu, omorendi bwe rinani ri’omoruoti, erinde ang’e emete ngochia koroiseria emetobwa y’ebiita bi’eburi ere ase Hekalu, na ey’okoagachera orwaki rw’omochie, boigo ney’okoagachera enyomba yane ase nkomenya.” Omoruoti agankorera ayio onsi namoboretie, ekiagera okoboko okuya kwa Nyasae one nigo kwarenge amo nainche.

9Erio omoruoti agatoma amo nainche abarwani esegi, na abariini chibarasi, akang’a rirube nkairera abagambi abarenge bosongo y’orooche roria, nkabaria.

10Korende ekero Sanibalati korwa Beti-Horoni, na Tobia, omonene bw’orogongo rw’Abaamoni, baigwete ng’a omonto gete ochire gokorera Abaisraeli amaya, bakagechigwa bakaba nekeririanda ekenene mono.

11Ase igo ngacha Yerusalemu, nkabeerao ase engaki y’amatuko atato.

12Erio nkaimoka botuko amo nabanto bande bake. Tinatebetie monto onde amang’ana Nyasae konya abekire ime ase enkoro yane, ayio narenge gochia gokorera Yerusalemu. N’giti ende yonsi tiyarenge nainche otatiga eria nariinete ekero nachete.

13Ase obotuko obwo ngaetera ase Egeita kie Rikura, gochia ase Ensoko y’Enchoka, ngaika ase Egeita ki’Eubi, nkarata chindwaki chia Yerusalemu, echio chiatagoretwe, na ebiita biaye biria biasaretigwe nomorero.

14Naende ngaeta gochia ase Egeita gi’Ensoko na ase Ritibo ri’Omoruoti, korende aase akabora ase eng’iti eria nariinete egoetera.

15Ase obotuko obwo nkagenda ase rikura, nkarata orwaki, erio nkairanera aase naeterete, ase Egeita kie Rikura, erio nkairana gochia aase narenge.

16Abanene b’ensemo eria tibamanyete ase nagendete, gose eki narenge gokora, ekiagera konya tindatebia Abayahudi gento, gose abakuani, gose abanto basikire, gose abanene, gose abanto bande bonsi abaare gocha gokora emeremo.

17Korende bono nkabatebia, “Mwarorire emechando yatonyorire aa: Yerusalemu otagoirwe, na ebiita biaye biasambirwe. Inchuo toagache naende orwaki rwa Yerusalemu, erinde titobaisa kogenderera koba nobosooku bw’ogochaywa.”

18Naende nkabatebia ng’a okoboko kwa Nyasae one nigo kwarenge amo nainche gonkorera amaya, boigo nkabatebia amang’ana ’Aritasasita omoruoti antebetie. Barabwo bakabora, “Tochake koagacha omochie naende.” Ase ayio bakabekana chinguru gokora emeremo eyio emiya.

19Korende ekero Sanibalati korwa Beti-Horoni, na Tobia, omonene bw’orogongo rw’Abaamoni, na Gesemu Omoarabu, baigwete amang’ana ayio, bagatosekerera na gotochecheria, bakaboria, “Ngento ki eke mogokora? Nigo mogochia kwanga timoigwera omoruoti?”

20Erio nkairaneria, nkabatebia, “Nyasae o igoro natosesenie togenderere ase obuya; ase ayio intwe, abasomba baye, nkoagacha tore omochie oyo naende; korende inwe timobwati egetari kende gionsi aiga, gose timobwati oboronge gose okoinyorwa konde gwonsi ase Yerusalemu.”

← Chapter 1 Jump to: Chapter 3 →