Nehemiah 9

Gussi (EBIBILIA ENCHENU) 2020

← Chapter 8 Jump to: Chapter 10 →

1Ase rituko ri’emerongo ebere na kane ri’omotienyi oyio, Abaisraeli bonsi bagasangererekana amo, beng’atete na beboyetie chigunia, bageaka ebundo ase emetwe yabo.

2Abaisraeli konya berusananirie korwa ase abamenyi bonsi, na bagatenena koorokia ebibe biabo, amo nogokora okobe gwe chisokoro chiabo.

3Bagatenena kera oyomo aase aye, na Ebuku eria y’Amachiko ’Omonene, Nyasae obo, ekaba egosomwa asebare ase egeka gie chinsa isato, naende bakaba bakoorokia ebibe biabo na komosasima Omonene, Nyasae obo, ase egeka kende gie chinsa isato, ase rituko erio.

4Erio Yesua na Bani, Kadimeli na Sebania, Buni na Serebia, Bani na Kenani, bagatenena igoro y’obotindiaro bwachikeire Abalawi, bagasaba neriogi rinene ase Omonene, Nyasae obo.

5Abalawi aba: Yesua na Kadimieli, Bani na Hasabineya, Serebia na Hodia, Sebania na Petahia, bagatebia abanto, “Tenena motogie Omonene, Nyasae oino, momotogie korwa bono goika kare na kare. Ogotogigwa kobe ase erieta riaye rinene riimokereirie igoro goetania ogosesesenigwa na ogotogigwa gwonsi.”

6“Aye naye Omonene, aye bweka. Naye gwatongete igoro, na igoro ya igoro chionsi, na emeganda yabo yonsi, na ense amo nebinto bionsi bireo, ne chinyancha, na ebinto bionsi bire imeo. Naye obirendete bigendererete kobao; ebitongwa bionsi bia igoro nigo bikogosasima.

7Aye Omonene Nyasae gwachorete Aburamu na okamorusia korwa Uri bw’Abakalidayo, erio okaonchora erieta riaye, okamoroka Ibrahimu.

8Okamorora ng’a nigo arenge nenkoro y’obwegenwa ase obosio bwao, erio ogakora okobwatana kw’ogotianania amo nere ng’a noe ororeria rwaye ense y’Abakanani, ey’Abahiti na Abaamori, ey’Abaperisi, na Abayebusi, na Abagirigasi, na bono gwaikeranirie ring’ana gwakwanete, ekiagera aye nomonyene oboronge.”

9“Aye kwaroche emechando ye chisokoro chiaito aaria Misiri, naende okaigwa okorera kwabo agwo mbarabare ase Enyancha Embariri.

10Ogakora ebikone na amakumia mamincha ya Farao, mamincha y’abasomba baye bonsi na abanto bonsi b’ense yaye, ekiagera nkwamanyete buna abakorerete chisokoro chiaito bobe; boigo erieta riao rikamanyekana, rikaba rinene buna rire goika rero iga.

11Ogaatanana amache ’enyancha ase amasio e chisokoro chiaito, erinde bagaeta ase egati y’enyancha buna ense enyomo; okarimeria abachandi babo ase chindiba, buna rigena rikorutwa ase amache amanene ime.

12Ase omobaso okaraa Abaisraeli ne riire, na ase obotuko ne riire ri’omorero ase okobamorekera enchera baare goetera.

13Aye kwaigwete korwa igoro ase egetunwa gia Sinai, ogakwana nabarabwo korwa igoro, okabachikera emeroberio emeronge na okabaa amachiko ay’ekeene.

14Okaborokereria bakamanya Esabato yao Enchenu, naende okabaa emeroberio na amachiko goetera ase Musa, omosomba oo.”

15“Ekero barenge nenchara, okabarentera endagera korwa igoro, na ekero barenge nerang’o, okabasokeria amache korwa ase egetare, naende okabatebia bagende koira ense eyio konya kwarire eira y’ogotiana ng’a nobayee.

16Korende chisokoro chiaito, barabwo bakaba abaenenu, bagakong’ia ebigoti biabo ase ogotaigwera, bakaanga kobwata amachiko ao.

17Bakaanga koigwera, gose tibarengereretie na koinyora amakumia gwakorete ase egati yabo; bagakong’ia ebigoti, bagachora omoraai abatang’ane koirana gochia Misiri ase obosomba. Korende aye naye Nyasae bw’okwabera, nigo ore omuya, naende omonyene amabera, tori omwango bw’okoba nendamwamu, aye nigo ore nobwanchani obonge botari koera, gose tikwabatigete.

18Barabwo bakeroiseria omogwekano bw’emori korwa ase etahabu enyititoire na kobombwa, bagateba ng’a oyo noro ore Nyasae oino obarusetie korwa ase ense ya Misiri, bagakwana amang’ana ay’okorama okonene.

19Nonya naboigo, ase engencho y’amabera ao amanene tikwabatigete agwo ase erooro. Riire riria riarenge kobaraa ase omobaso tiriaruete asebare; gose riire riria ri’omorero tiriatigete kobamorekera ase enchera barenge goeta ase obotuko.

20Aye okabaa Omoika oo omuya koborokereria; tikwabarinete mana baare koria, naende nigo kwabaete amache baare konywa ekero barenge nerang’o.

21Ase engaki y’emiaka emerongo ene bagendererete kobeera ase erooro okabarenda, barabwo tibaremeretwe gento kende, nonya ne chianga chiabo tichiagotete, gose amagoro abo tabimbete.”

22“Okabaa okobua igoro ase amaruoti; okabaatanera chinse ao ao. Bakaira ense ya Sihoni, omoruoti o Hesiboni, na eya Ogi, omoruoti o Basani.

23Okabaa abana abange buna ching’enang’eni chia igoro, na okabarenta ase ense eyio kwarierete chisokoro chiabo eira ng’a ebe eyabo.

24Ase ayio, abana babo bakagenda bakaira ense eyio. Aye okabua Abakanani, abanto b’ense eye, okababeka ase amaboko ’abanto bao, okabaa nabaruoti babo na abanto b’ense eye, erinde babakorere buna banchete.

25Barabwo bakaira emechie yagiteire chindwaki, na ense entenenku, bakaira ne chinyomba chiaichire nebinto ebiya, ne chinsoko chi’amache chiabaachetwe ase ebitare, na emegondo y’emesabibu na ey’emezeituni, na emete emenge y’amatunda. Bakaria, bakaigota na konora, bakaba nomogoko omonene ase obuya bwao obonge.”

26“Nonya naboigo nigo bangete gokoigwera, bagasaria asore, bakaa amachiko ao amagega, bagaita ababani bao, abwo babakurerete bairane gochia asore; ase ayio bagakora okomocha okonge gw’okorama erieta riao.

27Ase ayio okababeka ase amaboko ’ababisa babo, na barabwo bakabachanda. Ekero barenge ase emechando yabo, bakarera asore; aye okabaigwa agwo igoro; na ase engencho y’amabera ao amange, okabaa abatooria abwo bakabatooria korwa ase amaboko ’ababisa babo.

28Ekero konya banyorire obotoereru, bagakora ebibe asore naende; aye ogatiga ababisa babo bakababua na kobagambera. Nonya naboigo, ekero barenge gokoiranera na korera asore, nigo kwarenge kobaigwa korwa agwo igoro, na ase engencho y’amabera ao amange nigo kwabete gokobatooria ase chingaki chinyinge.

29Nigo kwabakurerete bairane babwate amachiko ao, korende ase engencho y’oboenenu bwabo bakaanga koigwera amachiko ao, bagakora ebibe ase emeroberio yao echikire, eyio omonto karayebwate nabe moyo. Bakaenena, bagakong’ia ebigoti tibaigwera.

30Ase emiaka emenge okabaremereria, okabakurera n’Omoika oo goetera ase ababani bao. Nonya naboigo tibaigwerete; erio okababeka ase amaboko ’abanto b’ebisaku ebiao.

31Korende ase engencho y’amabera ao amange, tikwabasiretie gose kobatiga, ekiagera aye Nyasae oito nomuya ore, na omonyene amabera.”

32“Na bono, aye Nyasae oito, nigo ore omonene, na omobui, na oyo bw’okoirokia. Nigo orendete okobwatana kw’ogotianania, na obwanchani bwao boria bogendererete botambe. Tobara buna negento egesinini obokong’u obo bwonsi bwatonyorire. Korwa ase engaki eria abaruoti b’Abaasuri batogamberete goika rero, twabeire togochandeka intwe na abaruoti baito, na abanene baito, na abakuani baito, na ababani baito, ne chisokoro chiaito; ee, abanto bao bonsi.

33Nonya naboigo, aye nigo ore omonyene oboronge ase amang’ana aya onsi abeire agotonyora; aye nigo ore omwegenwa, korende intwe twakorire ayare amabe.

34Abaruoti baito, na abanene baito, na abakuani baito, ne chisokoro chiaito, tibabwatete amachiko ao, gose tibaigwerete ogokurera kwao kwabakurerete.

35Nonya bamenyete ase oboruoti bwabo abanyene, na kwabaeire amaya amange ase ense eria entenenku kwabaete, tibagokorerete gose tibaonchogete korwa ase ogokora kwabo okobe.

36Bono nigo tore abasomba aiga ase ense eye kwaete chisokoro chiaito ng’a barie okwama kwaye na kwegokeria amaya.

37Ase engencho y’ebibe biaito obotenenku bw’ense eye bwairirwe nabaruoti abwo babekirwe gotogambera. Abwo mbabwate okobua igoro ase emebere yaito, na ase chitugo chiaito, batokorere buna banchete, na intwe nigo tore nemechando emenene.”

38Ase engencho y’amang’ana ayio onsi, bono nigo togokora okobwatana gotari koonchoka na tokorike, erinde abanene baito amo n’Abalawi baito, na abakuani baito, babeke ebimanyererio biabo ase korokwo.

← Chapter 8 Jump to: Chapter 10 →