Nehemiah 8

Gussi (EBIBILIA ENCHENU) 2020

← Chapter 7 Jump to: Chapter 9 →

1Ase engaki eyio abanto bonsi bakabwatana buna omonto oyomo, bagasangererekana ase eraaro agwo bosio bw’Egeita ki’Amache, bagatebia Ezara, oria orenge omworokia bw’amachiko, arente Ebuku y’Amachiko, a Musa, ayio Omonene aruete ase Abaisraeli.

2Ase rituko rie ritang’ani, ri’omotienyi o gatano na kabere, Ezara omokuani akarenta Ebuku eyio y’Amachiko ase omoganda bwonsi, abasacha na abakungu, abwo bonsi barenge konyara komanya aya baigwete.

3Agatenena bosio bw’Egeita ki’Amache, origereretie eraaro eria, na korwa mambia chuni goika mobaso gati akaba ogosomera abasacha na abakungu, na abwo bonsi barenge konyara komanya engencho y’amang’ana ayio. Abanto bonsi bagategerera koigwa ayarenge ase Ebuku eyio y’Amachiko.

4Ezara, omworokia bw’amachiko, nigo atenenete igoro ase obotindiaro bwe chibao bwaroisetigwe ase emeremo eyio. Abatenenete ase ensemo yaye y’okorio nabwo aba: Matitia na Sema, Anaya na Uria, Hilikia na Maaseya. Na abatenenete ensemo yaye y’okobee, nabwo aba: Pedaya na Mishaeli, Malikia na Hasumu, Hasibadana na Zakaria, na Mesulamu.

5Ezara agatenena agwo igoro goetania abanto bonsi na akamaanora ebuku ase amasio abo. Ekero ayemaanorete, abanto bonsi bagatenena.

6Ezara agatogia Omonene Nyasae ore omonene. Abanto bonsi bakarambora amaboko abo gochia igoro, bagateba, “Amina! Amina!” Erio bagatung’ama bakaumama, bagasasima Omonene.

7Erio abanto bagatenena, kera oyomo aase aye, na Yesua na Bani, Serebia na Yamini, Akubu na Sabetai, Hodia na Maaseya, Kelita na Asaria, Yosabadi na Hanani, na Pelaya, amo n’Abalawi bande bakorokereria abanto amachiko.

8Abalawi abwo bagasoma buya mono amachiko a Nyasae korwa ase Ebuku eria. Naende bakaorokia engencho y’amang’ana ayio, erinde abanto bayaigwe na koyamanya.

9Ekero abanto baigwete amang’ana ayio agosomwa, bagasambeka chinkoro chiabo, bakarera. Nehemia oyorenge omogambi obo, na Ezara, omokuani na omworokia bw’amachiko, na Abalawi abwo borokereretie abanto bonsi, bagatebia abanto, “Rituko eri ria rero nerichenu ase Omonene, Nyasae oino; ase ayio timobaisa korera, gose kobokia amagombo.”

10Erio Nehemia agatebia abanto, “Genda ase chinka chiaino, morie ebinoru biaino, monywe edivai enyansu, naende mobaatanere chindagera chiaino abwo batabwati, ekiagera rituko eri nerichenu ase Omonene oito. Timobaisa koba nomoichano, ekiagera omogoko bw’Omonene noro chinguru chiaino.”

11Abalawi bagaeta ase egati y’abanto, bakabakiria, bagoteba, “Kabe nobotoereru, ekiagera rituko eri nerichenu, timobaisa koba nomoichano.”

12Erio abanto bonsi bakagenda ase chinka chiabo, bakaba bakoria na konywa, bagaatanera chindagera chiabo baria batabwate, bakaba nomogoko, ekiagera konya bamanyire buya engencho y’amang’ana ayio bateberetigwe.

13Rituko ria kabere, abateneneri be chiamate chiabo chionsi amo nabakuani na Abalawi, bagacha ase Ezara, omworokia bw’amariko, erinde beorokererie amang’ana ’amachiko aria.

14Bakanyora amang’ana arikire ase amachiko ayio Omonene aruete ase Abaisraeli goetera ase Musa, ng’a Abaisraeli goika bamenye ase ebigutu ase Rituko Rinene ri’omotienyi o gatano na kabere,

15naende ng’a ase engaki eyio goika bararie ase emechie yabo yonsi, na ase Yerusalemu, batebie abanto bagende ase ebigoro barente chinsagia chi’emezeituni, ere ase emegondo na eyere ase orosana, na echi’emeadasi, na echi’emekendo, na echi’emete ende ere namato amange, erio baagachere ebigutu buna erikire.

16Abanto bakarenta chinsagia echio, erio kera omonto akaagacha ekegutu igoro ase ekerama ki’enyomba yaye, gose ase ekeooreri kiaye, na ase chiraaro chi’enyomba ya Nyasae, na ase eraaro bosio bw’Egeita ki’Amache, na ase ey’Egeita ki’Efraimu.

17Omoganda bwonsi bw’abanto bairanete korwa ase obosomba bakaagacha ebigutu bamenye imeo, ekiagera korwa ase engaki ya Yoshua, mosinto o Nuni, goika ase engaki eyio, Abaisraeli konya tibana gokora bo. Na bono bakaba nomogoko omonene.

18Kera rituko, korwa erie ritang’ani goikera eri’omoerio, Ezara akaba okobasomera Ebuku eria yarikire amachiko a Nyasae. Abanto bakagenderera korenda Amatuko aria Amanene ase engaki y’amatuko atano na abere, na ase rituko ria gatano na gatato bakaba nomosangererekano omonene bw’ogosasima, buna yachikire.

← Chapter 7 Jump to: Chapter 9 →