1 Samuel 17 — hadiyya

1Filisxee'm manni Soko yakkam Yihuxxi uullanne orina guddo'o. Ixxuwwim Sokko'onnee Aazeeq lambe'ennee yoo Efeesxaamiimaa yakkam beyyonnee gudda'a wiiddanta'a hee'llo'o.

2Saa'oolii Isra'ee'l mannii wixxita'a Eela'i cebbanne guddo'o. Filisxee'm mannam qasseena hundim beyyi beyyo ammadda'a hee'llo'o.

3Filisxee'm manni mat duunanne odim Isra'ee'l mannim mulli duunanne ikka'a ixxuwwi lambe'enne Cebbi hee'ukko.

4Gaat beero'iinsi waaraakkoo Gooliyaada yakkam mat geejji manchi Filisxee'm manni kolliinsi firaa Isra'ee'l mannanne sha'llamukkuuyyi baddisam hee'ukko. Ee manchikim uullichchi sas meetira ihoo qax hee'ukko.

5Ixxim naas xaariinsi baxxamaakkoo ontayyee lamar kilo'oo kee'mmoo o'l eddechcha edde'aa naas xaariinsi baxamaakkoo qoobe'e issaqqaa hee'ukko.

6Lokkonnem naas xaariinsi baxamaakkoo gambaalle'e issaqqaa naas xaariinsi baxamaakkoo bagado gudumonne iyyaa hee'ukko.

7Bagaxxi qaalleenchik geejjoom eddechcha dadoo manni xaaxoohaanni qax hee'ukko; bagaxxi xaaroomim lamar kilo'o ihoo qax hee'ukko. Ixxi agiram mat gaadaanchi iyyaa ixxi illagenne maram hee'ukko.

8Gooliyaadim ki'aa uullaa Isra'ee'l gogotanne «Ee beyyonne orina guddakko'i keen maha ikkakkeenatte? An Filisxeemchona'e! Ki'nnuwwim Saa'ool agidona'e! Iinninne oramoo mat mancho ki'nnuwwi gaadaaniinsi doo'llitakkamaare inninne waaraa uullixxamona.

9Ixxi eese kaa'aa shulas neese ki'nnuwwina agid inkoommo; ihukkaarem an kaa'aa shummaa'lleensi ki'nnuwwi ni agid ikkakkamo.

10Oono'o, an ka'isinne Isra'ee'l gaadaaninne uullixamoommo. Iinninne oramoo mat mancho doo'llitakkamisina iggimminne xa'mmoommo!» yukkuuyyi damfamii sha'llamamii hee'ukko.

11Saa'oolii Isra'ee'l gaadaanii Filisxee'm manni sagara macceessa'a lobakata baddito'o; muggito'ome.

12Daawiit Yihuxxi Beetaliheemanne yoo Efiraatanne hee'oo Issayyi beet hee'ukko. Issayye sadeenti goo'n oos yoohan ihukkuuyyi Saa'ool adil hee'u doollenne umurinne massamaakkoo lommanchi hee'ukko.

13Issayyekim sas lob oos Saa'oolinne maqirem orina gaadda'a hee'llo'o. Ixxuwwim wonii Eeli'aaba, la'mmekim Aminaadaaba saxxekim Shaamaa yakkam keen hee'llo'o.

14Daawiit hundiinsim hoffi beet ihukkuuyyi sasem lob abbaayyuwwim Saa'oolinne maqire gaado matta'a hee'llo'o.

15Daawiit hundi ammanem Saa'ool beyyiinsi daba'llamukkuuyyi anni gereebba allaareena Beetaliheema maram hee'ukko.

16Gooliyaadim Isra'ee'l mannanne sor ayyaamo daraa maaro'oo damfam hee'ukko.

17Mat ayyaamo Issayye Daawiitina «Tommi kilo'i saramaakkoo hamaamaa tommi xeffo'i qorosho'oo amaddaa qaqqissaa mattaa o'l beyyonne yo'i kiyyabbaayyuwwina afise.

18Ka tommem quunqi salalom gaaxxi awwonsaanchina uwwe. Kiyyabbayuwwim hinkid yoda'e ki illinne moo'llaa ixxuwwi xummaato eebe.

19Ixxuwwi, adil Saa'oolii Isra'ee'l mannii hundim Eela'i cebbanne Filisxee'm manninne qasantamuulla» yukko.

20Daawiitim soodaraarom ki'ukko. Ixxi allaaroo gereebba mulli allaaraanchina yabo uwwaa Issayye ijaajukkisanne gudu hurbaata amadaa marukko. Isra'ee'l manni oranteena sagara iimaa'lla'a damfitam ammanenne Daawiit o'l beyyo afukko.

21Filisxee'm gaadaanii Isra'ee'l gaadaanii beyyo ammadda'a bagaxxi miinsanne asi'mmannitam hee'llo'o.

22Daawiitim amadu hurbaata hurbaaxxi egeraanchi beyyonne dissaa o'l beyyo geeraa abbaayyuwwi beyyo afukko. Ixxuwwi xummaatom xa'mmukko.

23Daawiit ixxi abbaayyuwwinne wocukkuuyyim, Gooliyaada yakkam geejji Filisxee'm manchi eraare issam hee'ukkisam illagenne firaa Isra'ee'l mannanne damfukko. Daawiitim ixxi damfoo'isa macceesukko.

24Isra'ee'l mannim Gooliyaada moo'llo'i ammanenne lobakata baddita'a ixxi illagiinsi gibbo'o.

25Isra'ee'l gaadaani xxuwwina'i ixxuwwim «Ka ballina ballina Isra'eela keenoo mancho moo'llakkahinnihe? Adil Saa'ool ka mancho shoo manchina lobakat amaxxa uwweena sagara aagaakko. Ixxi landichchom ee manchina ladiiseenaa ee manchi moollim adilina gibiro gibiroo'n hee'oo'isaa wocaakko» yaqqantam hee'llo'o.

26Daawiitim ixxi gadanonne uullito'i mannina «Ka Filisxee'm mancho shaa Isra'eela ka tuussiisoo sholle'nniinsi gatisoo manchina mah issakkamo? Ihona bagaan ku hee'oo Waa'i gogota keenoo ku ballachchamoo'n yoo Filisxee'm manchi ayyette?» yaa xa'mmukko.

27Ixxuwwim Gooliyaada Shoo manchina issakkam luwwi mada'e ihukkisa kutto'o.

28Daawiitina lob abbaayyi Eeli'aab Daawiit manninne wocoo woshsha macceesukko. Ixxim Daawiitanne lobakata quuqaa «Keyye maha baxxoolla? Ee udma'i uullanne yoo ki hoffi gereebba ayyena uttaa waattaa? An ki bolxoomaa ki woda'n jollaa la'oommo! Kaba at waattittok o'l duuha'a moo'lleenate» yukko.

29Daawiitim «An kaba maha issummo? Xa'mmenam xanoommoyyonnihe?» yaa dabarukko.

30Ee lasage odim mulli manchi kolli daba'llaa ee xa'mmichcham xa'mmukko. Xa'mmamu manni hundim uwwoo dabachchi mat hagar hee'ukko.

31Mat mat manni Daawiit wocoo woshsha macceessa'a hee'llo'i bikkina ee woshsha massitta'a Saa'oolina kutto'o. Saa'oolim Daawiita ixxi beyyo weeshisukko.

32Daawiitim Saa'oolina «Adila! Ka filisxee'm mancho ayyim baddimmi hasisooyyo. An ki awwaadaanchi maraa ee manchinne oramoommo» yukko.

33Saa'oolim Daawiitina «At ixxenne hinkid oranteena xantootto? At gootto'i ooshshichchoyyonnihe? Ihukkaarem ixxi oosoommanniinsim ki'isaa o'l mancho» yukko.

34Daawiitim «Adila! An ki awwaadaanchi iyyanni gereebba allaaraancho. Hobbii gereebba itoo tibbe'nnoo moochchii waaraa wotalla amadoo ammane

35awwonaa maraa aphphisaa amadaa massu wotara an geeraa maraa hooraa ubbuusisam hee'ummo. Oo moochchim i kolli daba'llaa waaroohaare leella'a xagaraa amadaa aphphisaa sham hee'ummo.

36An ki awwaadaanchi hobbaa tibbe'i'nnoo'i moochchaa shaammo; ka hee'oo Waa'i gogotinne uullixamoo ballachchamoo'nnoo Filisxee'm manchom ee'isa issoommo.

37Hobbiinsii tibbe'i'nnoo'i moochchiinsii gatisu Waa'i ka Filisxee'm manchi angiinsim eese gatisookko» yukko. Saa'oolim «Danaamo! Eehannata'i mare; Waa'i kiinninne maqir ihona» yaa dabarukko.

38Saa'oolim ixxi gaqqi o'l eddechcha Daawiitina eddeesukko; naas xaariinsi baxamu horoo'l qoobe'em Daawiit horoorenne issukko.

39Daawiitim Saa'ool bisa'a o'l eddechchi hanenne lade'aa mareena ki'ukko. Ihukkaarem eehido'i eddechcha illageen edde'aa la'oobee'i bikkina Saa'oolina «Kido'i eddechcha losumbee'i bikkina ka'isa ihaa mareena xanoommoyyo» yukko. Ee bikkina Daawiit hundam sheelatukko.

40Ee lasage ixxi bicco amadaa quunqammi ki'nnekam onto daajjiinsi doo'llaa allaaraa'n gonoonanne issaa lasonne yambarasha anganne amadaa ee Filisxee'm manchi kolli hincukko.

41Filisxeemchi Gooliyaad o'l mu'uta iyyaancho illageen higisaa Daawiit kolli hincukkuuyyi marukko.

42Gooliyaadim Daawiita xuxxaa moo'aa mishisoo gootto'i beetichchi ihu bikkina gadukko.

43Ee bikkina Gooliyaad Daawiitina ku bicco amaddaa waattittok eese wishichcho labissaatennihe?» yukko. Ixxi waa'i summinnem qangukko.

44Ixxim «Kid waare! Ki maara iima'n ammarinaa uulli moochchinaa uwwoommo» yukko.

45Daawiitim «At bisa'aa bagaxxi qaphphanaa amaddaa iina waattaatto; an ihukkaarem at sha'llantoo Isra'ee'l gogoxxi Moollanni ihu hundam xanoo Waa'i summinne keesenne waaraammo.

46Kaballa Waa'i keese i anganne ubbuusookko. Anim keese kaa'aa ki horoore muroommo. Filisxee'm gaadaa'nnekam maara ammarinaa moochchinaa hurbaat issaa uwwoommo. Ee lasage heer uullanne yoo manni hundim Isra'eelina Waa'i yoohan ihukkisa la'ookko.

47Ka beyyonne yoo manni hundim Waa'i manna gatiseena bisa'i te'im bagad hasisoobee'an ihukkisa la'ookko. Ku or Waa'an ihu bikkina ki'nnuwwa ni anganne higisaa uwwookko» yukko.

48Gooliyaadim qaseena Daawiit kolli hincukko. Daawiitim ee Filisxee'm manchi Gooliyaadinne oramoo o'l beyyo gerukkuuyyi marukko.

49Ixxi angam gonoonanne aagisaa mat kina fissaa yambarishinne Gooliyaadanne huushukko. Oo kinim miine huruuraa horoorenne aagu bikkina Gooliyaad qubbaa illillaachcha ubukko.

50Ee bikkina Daawiit bisa'a amadoo'nnim Gooliyaada yambarishinnee kininnee aphphisaa shimminne kaa'ukko.

51Ixxi ubu kolli geeraa maraa ixxi hanenne uullaa Gooliyaad bisa'a seejjiinsi fissaa horoore murukko. Filisxee'm mannim ixxuwwi gitanni gaadaanchi lehukkisa moo'llo'i ammanenne utta'a gibbo'o.

52Ee lasage Isra'ee'llekii Yihuxxi mannii sagara fissita'a damfitu'uuyyi Gaatannee Eeqiroonannee yoo ooxxi gooc afeebe'e ixxuwwa hollansito'o. Filisxee'm manni leeshshim Gaatanne, Eqiroonannee Sha'iraayima marakkam googonnee ubukko.

53Isra'ee'l mannim ixxuwwa hollansita'a daba'llita'a lasonne Filisxee'm manni wiiddanta'a hee'llo'i beyyo boggo'o.

54Daawiitim Gooliyaadika horoore muraa amadaa Yerusaaleema waarukko. Ihukkaarem Gooliyaadika o'l mu'uta Daawiit ixxi gaqqi dukkaananne dissukko.

55Daawiit Goliyaada qaseena maru ammane Saa'ool moo'aa ixxi gaaxxi awwonsaanchi Abaaneera «Ku beet ayyane?» yaa xa'mmukko. Abaaneerim «Adila, ki angi la'ona! Ku beet ayyanda'e kabad afeebe'em la'ummoyyo» yukko.

56Saa'oolim «Mattaa ku beet ayyanda'e qoossitaa la'e» yaa ijaajukko.

57Ee bikkina Daawiit Gooliyaada shaa gaadaa'n kolli daba'llu ammanenne Abaaneer taqeebalaa Saa'ool beyyo hincaa'ukko. Ee ammane Daawiit Gooliyaad horoore amadukkisam hee'ukko.

58Saa'oolim «Kaa woraadichcho at ayyi beeto?» yaa xa'mmukko. Daawiitim «Beetaliheemanne hee'oo ki awwaadaanchi Issayyi beeto» yaa dabarukko.