1 Samuel 6

hadiyya

← Chapter 5 Jump to: Chapter 7 →

1Waa'i Hidi'l Saga'l Saaxin Filisxee'm uullanne lamar agana afuuraa lasge

2Filisxee'm minaadab ixxuwwi qeessuwwaa kiiraanoo weeshsha'a «Hidi'l Saga'l Saaxina maha issimmi niina e'llookko? Hee'u beyyonne dabarimmina hinkid issinaa asse'nnoomda'e niina bilaato kullehe» yito'o.

3Ixxuwwim «Isra'ee'l Waa'ika Hidi'l Saga'l Saaxina dabattakka'a asse'llakkeena hassakkolas ki'nnuwwi hawwoddakko'i hawwojjina guzumo'i ihoo luwwa eddakka'a asse'immi hasisookko. Waa'i Hidi'l Saga'l Saaxin matem guzumo'im exxoo'n marimmi hasisooyyo. Eehid issitakkolas ki'nnuwwi jabbiinsi fayye'llakamo ixxi ki'nnuwwa qoxxaallisa guzumo'u mashka'am laqqakkamo» yito'o.

4Filisxee'm minaadabim «Ni bi'ishshi bikkina guzumo'i ihoo'isina hinkido'i luwwa endaa asse'nno? yita'a xa'mmito'o. Ixxuwwim «Ee dashshi kobi'llanne baxanto'oo onti worqi gawje'ee filisxee'm adilluwwi xigonne odim dabayya kobi'llanne baxamu onti worqi gawje'ee ihimmi hasisookko. Mashka'oomim ki'nnuwwannee ki'nnuwwi adilluwwannee asse'amu booban mato» yito'o.

5Ki'nnuwwi uulla bi'isimmina asse'anto'i dabayyannee dashshannee kobi'llissakka'a baxxakka'a kitim ihoo'isina hincaa'imminne Isra'ee'l Waa'ina lomba uwwimmi hasisookko. Eekka issitakkolas ayyi la'ukko ki'nnuwwa, ki'nnuwwi waa'uwwaa ki'nnuwwi uullaa guzumo'oo boobana egedeena xanookko.

6Gibxi uulli adilii Gibxi uulli mannii issito'isa mahina ki'nuwwi wodano duudissakamuulla? Isra'ee'l minaadab Gibxi uulla fatakita'a fitto'ok Waa'i Gibxi uulli manna qoxxaallisa guzumo'aa lasageyyonnihe?

7Ee bikkina haareechchi Faraxxi gaarre'ee gaanjaqqi issamubee'i lam siichcham laroo gudissehe. Ee lamem laronnem gaanjaqqa issitakka'a faraxxi gaarre'ika ludo ee gaanjaqqanne kallehe; ee la'l wo'llooma mine daballehe.

8Ee lasage Waa'ika Hidi'l Saga'l Saaxina massitakka'a ee faraxxi gaarre'enne dissehe. Ki'nnuwwi bi'ishshi bikkina guzumo'i ihoo'isina ixxenne maqire asse'llakkeena baxxakko'i annanni annanni worqa Saaxinanne issitakka'a Waa'i Hidi'l Saga'l Saaxi'n gadanonne dissehe; ee faraxxi gaarre'em ixxi gaginnem marona googo amadiissakka'a fataki'llehe.

9Ee lasage maroo kollo moo'llehe. Marookkokim Beetisheemeesh beero'i kollonne ihulas ka u'nnisoo boobana neesenne fatakukkok Isra'ee'l Waa'i ihukkisa moo'isookko. Ihukkaarem ee kollonne marubeelas oo booban niina waarukkok dangonnette bagaan Waa'i asse'ubee'an ihukkisa lanqoommo» yito'o.

10Ixxuwwim ee kuramukkisa issito'o; lamem larom massita'a oo faraxxi gaarre'i karamu gaanjaqqanne qaashsho'o; ee la'l wo'llam orodonne aagissa'a gooca xuffo'o.

11Hidi'l Saga'l Saaxinam massita'a dabayyi kobi'llannee dashshi kobi'llannee baxamu worqi wo'mmu saaxininne maqirem faraxxi gaarre'enne dissito'o.

12Oo larim googo fatakitoo'nnii makki kollonnee qeddi kollonnee daba'llitoo'nnii xabbita'a Beetisheemeesh kollonne matto'o. Mattu'uuyyim «Humbaa» yita'a muuntam hee'llo'o. Ontem Filisxee'm adilluwwim Beetisheemeesh gabal afeebe'e awwonta'a geegeesso'o.

13Ee ammane Beetisheemeesh manni cebbi woronne arasa muttam hee'llo'o. Ixxuwwim xabbita'a moo'llo'i ammanenne Hidi'l Saga'l Saaxina moo'llo'o; eekka moo'llo'i bikkina lobakata liiranto'o.

14Oo faraxxi gaarre'im Beetisheemeeshanne hee'oo Iyyaas uullanne waaraa geejji ki'n gadano afaa uullukko. Oo minaadabim ee faraxxi gaarre'ika haqqa anto'o; ee larom dutta'a Waa'ina shokkoo kitim issita'a hincaa'llo'o.

15Leewi'i mannim Waa'ika Hidi'l Saga'l Saaxinaa ixxenne maqire hee'u worqi wo'mmaakkoo Saaxinaa ki'issa'a ee lob ki'n hanenne dissito'o. Oo Beetisheemeesh mannim shokkiisakka'a hincaa'akkam kitimaa mulli kitimaa hundam Waa'ina hincaa'llo'o.

16Filisxee'm ontem adilluwwim ka hundam moo'llu'uuyyi hossa'a ee ballam Eeqiroo'n beero'o daba'llito'o.

17Filisxee'm manni ixxuwwi hawwojji bikkina hincoo kitim ihoo'isina Waa'ina asse'llo'i dashshi kobi'llanne baxamu onitem worqi gawje'uwwim Ashdooda, Gaaza, Asqaloona, Gaataa Eeqiroonaa yakkam ixxuwwi beero'uwwi summinne asse'amaakkoohan hee'ukko.

18Oo worqi dabayyi xigim ontem Filisxee'm adilluwwi gassitam girbamaakkoo beero'uwwaa ee beero'uwwi hegeegguwwaa ixxuwwi bikkoohan hee'ukko. Beetisheemeeshanne hee'u Iyyaas uullanne Hidi'l Saga'l Saaxina dissakko'i oo lob kin kaballi afeebe'e naqaash ihaa siidamookko.

19Beetisheemeesh manni Hidi'l Saga'l Saaxi'nneka woro moo'llo'i bikkina Waa'i quuqaa ixxuwwiinsi lamarayyi mancho shukko. Waa'im eehaa'n manna guullu bikkina Beetisheemeesh manni kichche'lla'a wi'llito'o.

20Beetisheemeesh manni «Ka keesammi Waa'i illagenne ayyi uulleena xanookko? Ku Hidi'l Saga'l Saaxindu ka beyyiinsi firaa ayyi beyyo marookko?» yito'o.

21Ee lasage Qiriyaat Yi'aariimanne hee'llam manni beyyo asse'amaano asse'lla'a «Filisxee'm manni Hidi'l Saga'l Saaxina ni beyyo eebbo'ookko. Waattakka'a massehe» yito'o.

← Chapter 5 Jump to: Chapter 7 →