Revelation 1

Ilonggo (Maayong Balita nga Biblia (2012))

Jump to: Chapter 2 →

1Ini nga libro amo ang nasulat nga mga hitabo nga ginbugna ni Jesu-Cristo. Ginhatag sang Dios ini nga pagpahayag sa iya, agod mapakita niya sa mga alagad sang Dios kon ano ang dapat nga magakahanabo sa labing madali. Gani si Cristo nagpadala sang iya anghel nga may mensahe sa iya alagad nga si Juan,

2kag ginsugid ni Juan ang tanan nga iya nakita. Amo ini ang ginsugid ni Juan nahanungod sang pulong halin sa Dios, kag ang kamatuoran nga ginpahayag ni Jesu-Cristo.

3Malipayon ang nagabasa sini nga libro sa nagatilipon nga mga tumoluo, kag malipayon ang mga nagapamati sang mga pulong nahanungod sa mga magakahanabo subong kag sa palaabuton. Malipayon man ang nagatuman sang nasulat sa sini nga libro! Kay madali na lang ang tion nga ini tanan nga mga butang magakahanabo.

4Ako si Juan, nagasulat sa pito ka mga iglesia sa probinsya sang Asia: Ang pagpakamaayo kag ang paghidait manginyara sa inyo halin sa Dios, nga amo karon, amo man anay, kag amo ang magaabot, kag halin sa pito ka espiritu nga yara sa atubangan sang iya trono,

5kag halin kay Jesu-Cristo, ang matutom nga saksi, ang panganay nga Anak nga ginbanhaw, nga amo man ang nagagahom sa mga hari sang duta. Ginahigugma niya kita, kag paagi sa iya pagkamatay iya kita ginhilway sa aton mga sala,

6kag ginhimo kita nga ginharian sang mga pari sa pag-alagad sa iya Dios kag Amay. Sa kay Jesu-Cristo ang kadungganan kag gahom sa walay katubtoban! Kabay pa.

7Tan-awa, nagapalapit sia nga yara sa mga panganod! Ang tagsatagsa makakita sa iya, lakip ang mga nagbuno sang bangkaw sa iya. Ang tanan nga mga katawhan sang duta magapanalambiton tungod sa iya. Matuod gid ini! Kabay pa.

8Ang Ginoong Dios nga Makagagahom, nga amo karon, amo man anay, kag amo man ang magaabot nagasiling, “Ako amo ang ginsugoran kag ang katapusan.”

9Ako si Juan nga inyo utod, kag subong sumolunod ni Jesus nga aton Hari, nagapakig-ambit sa inyo sa pag-antos, kag sa pagbatas. Gintapok ako sa isla sang Patmos, tungod sang akon pagwali sang pulong sang Dios kag sang kamatuoran nga ginpahayag ni Jesus.

10Sa adlaw sang Ginoo gingamhan ako sang Espiritu, kag nabatian ko ang mabaskog nga tingog nga daw tunog sang trumpeta, nga nagahambal sa likod ko.

11Amo ini ang iya ginsiling, “Isulat ang imo makita, kag ipadala ang libro sa mga iglesia sa sining pito ka mga siudad: Efeso, Smirna, Pergamo, Tiatira, Sardis, Filadelfia, kag Laodicea.”

12Nagliso ako sa pagtan-aw kon sin-o ang nagahambal sa akon. Kag nakita ko ang pito ka mga kandelirohan nga bulawan.

13Sa tunga sang mga kandelirohan may nagatindog nga daw isa ka tawo nga nagabayo sing malaba tubtob sa iya tiil, kag may wagkos nga bulawan sa iya dughan.

14Ang buhok sa iya ulo subong kaputi sang bulbol sang karnero, ukon kinagod nga yelo, kag ang iya mga mata nagasiga pareho sang kalayo,

15ang iya mga tiil nagaidlak subong sang bronsi nga gintunaw sa hornohan kag ginpahining, kag ang iya tingog subong sang daganas sang daku nga busay.

16Ang iya tuo nga kamot nagauyat sang pito ka mga bituon, kag sa iya baba nagagwa ang matalom nga espada nga duha sing sulab. Ang iya guya tama kasanag subong sang udtong adlaw.

17Sang pagkakita ko sa iya, naghapa ako sa iya tiilan kag nanginsubong sang patay nga tawo. Gintandog niya ako sang iya tuo nga kamot kag ginsingganan, “Indi ka magkahadlok! Ako ang ginsugoran kag ang katapusan.

18Ako amo sia nga nagakabuhi! Napatay ako, pero tan-awa, karon nagakabuhi ako sa walay katapusan. May awtoridad ako sa kamatayon kag sa kalibutan sang mga patay.

19Gani isulat ang mga butang nga imo makita, ang mga butang karon, kag ang mga butang nga mahanabo sa ulihi.

20Amo ini ang sekrito nga kahulogan sang pito ka mga bituon nga makita mo sa akon tuo nga kamot, kag sang pito ka mga kandelirohan nga bulawan: ang pito ka bituon amo ang mga anghel sang pito ka mga iglesia, kag ang pito ka mga kandelirohan amo ang pito ka mga iglesia.

Jump to: Chapter 2 →