Revelation 11

Ilonggo (Maayong Balita nga Biblia (2012))

← Chapter 10 Jump to: Chapter 12 →

1Dayon ginhatagan ako sing inugtakos nga kahoy kaangay sang sungkod, kag ginsingganan, “Lakat ka kag taksa ang templo sang Dios kag ang altar, kag isipa ang mga nagasimba sa templo,

2pero indi pagtaksa ang tilipunan sa gwa sang templo tungod kay ginhatag ini sa mga pagano nga magatasak sang Balaan nga Siudad sa sulod sang kwarentay dos ka bulan.

3Ipadala ko ang akon duha ka mga saksi nga nagabayo sing sako, kag iwali nila ang pulong sang Dios sa sulod sang 1,260 ka adlaw.”

4Ang duha ka mga saksi amo ang duha ka mga kahoy nga olivo kag ang duha ka mga suga nga nagatindog sa atubang sang Ginoo nga nagagahom sang duta.

5Kon may magtinguha sa paghalit sa ila, ang kalayo magagwa sa ila mga baba kag magalaglag sang ila mga kaaway. Kag sa sini nga paagi ang bisan sin-o nga magatinguha sa paghalit sa ila pagapatyon.

6May awtoridad sila sa pagsirado sang langit, agod nga indi mag-ulan sa tion nga ginawali nila ang pulong sang Dios. May awtoridad man sila sa mga tuboran sang tubig sa paghimo sa ila nga dugo. May awtoridad man sila sa paghalit sang duta paagi sa tanan nga sahi sang kalalat-an, sa bisan ano nga tion nga luyag nila.

7Kon makatapos na sila sa pagwali sang ila mensahe, ang sapat nga magagwa halin sa buho nga tama ka dalom magapakig-away batok sa ila. Pagadag-on sila sang sapat kag pamatyon,

8kag ang ila mga bangkay magahamyang sa kalsada sang daku nga siudad, sa diin ang ila Ginoo ginlansang sa krus. Sa isa ka pulong yadto nga siudad nagarepresentar sang Sodoma, ukon Ehipto.

9Ang mga tawo halin sa tanan nga mga kapungsoran, mga tribo, mga linggwahe kag mga rasa magatan-aw sang ila mga bangkay sa sulod sang tatlo ka adlaw kag tunga, kag indi sila magtugot nga ipalubong ini sila.

10Ang mga tawo sang duta magakasadya tungod sang pagkapatay sining duha ka mga saksi. Magasaulog sila kag magaregalohay, tungod kay ining duha ka mga propeta nagdala sing tama nga mga pag-antos sa mga katawhan sang duta.

11Sa tapos ang tatlo ka adlaw kag tunga, nag-abot ang ginhawa halin sa Dios nga nagahatag sing kabuhi, nagsulod sa ila, kag nagbangon sila. Ang tanan nga nakakita sa ila hinadlukan gid.

12Dayon ang duha ka mga propeta nakabati sang mabaskog nga tingog halin sa langit nga nagsiling sa ila, “Saka kamo diri!” Samtang nagatan-aw ang ila mga kaaway, nagkayab sila sa mga panganod pakadto sa langit.

13Sa sadto gid nga tion, may mabaskog nga linog, kag ang ika-10 nga bahin sang siudad naguba kag 7,000 ka mga tawo ang nagkalamatay. Ang nabilin nga mga tawo kinulbaan gid kag nagdayaw sang pagkagamhanan sang Dios sang langit.

14Ang ikaduha nga makakulogmat nga butang tapos na. Pero tan-awa! Ang ikatlo nga makakulogmat nga butang magaabot sa labing madali.

15Dayon ang ikapito nga anghel nagpatunog sang iya trumpeta, kag may mabaskog nga mga tingog sa langit nga nagasiling, “Ang gahom sa pagdumala sang kalibutan iya na karon sang aton Ginoo kag sang iya Cristo, kag magahari sia sa walay katapusan!”

16Dayon ang baynte kwatro ka mga katigulangan nga nagapungko sa ila mga trono sa atubang sang Dios, naghapa kag nagsimba sa Dios,

17nga nagasiling: “Ginoong Dios nga Makagagahom, nga amo karon kag amo anay! Nagapasalamat kami sa imo nga imo gingamit ang imo daku nga gahom kag nagsugod ikaw sa paghari!

18Ang di-diosnon nga mga kapungsoran nagabalingaso sa kaakig, tungod kay tion na nga magaabot ang imo kaakig, kag ang mga patay pagahukman. Tion na sa paghatag sing balos sa imo mga alagad nga mga propeta, kag sa tanan mo nga mga tumoluo, dalagku kag magagmay, nga nagakahadlok sa imo. Tion na sa paglaglag sang mga nagalaglag sang duta!”

19Ang templo sang Dios sa langit gin-abrihan, kag ang Kaban nga nasudlan sang Kasugtanan nakita sa iya templo. Dayon nagpangilat, nagginahod, nagdinaguob, naglinog, nag-ulan sing madamo nga mga yelo.

← Chapter 10 Jump to: Chapter 12 →