Revelation 13

Ilonggo (Maayong Balita nga Biblia (2012))

← Chapter 12 Jump to: Chapter 14 →

1Dayon may nakita ako nga sapat nga nagbutwa halin sa dagat. May napulo ini ka mga sungay, kag pito ka mga ulo, sa tagsa ka sungay may korona, kag sa tagsa ka ulo may nasulat nga ngalan nga nagapakamalaut sa Dios.

2Ang sapat nga nakita ko daw leopardo nga may mga tiil nga daw iya sang oso, kag may baba nga daw iya sang leon. Ginhatag sang dragon sa sapat ang iya kaugalingon nga gahom, ang iya trono, kag ang iya daku nga awtoridad.

3Ang isa sang mga ulo sang sapat daw ginpatay, pero ang iya pilas nga ikamatay nag-ayo. Ang tanan nga mga tawo sa bug-os nga duta natingala gid kag nagsunod sila sa sapat.

4Tanan sila nagsimba sa dragon, tungod kay ginhatag niya ang iya awtoridad sa sapat. Nagsimba man sila sa sapat nga nagasiling, “Sin-o bala ang kaangay sa sapat? Sin-o bala ang makapakig-away batok sa iya?”

5Ang sapat gintugotan sa paghambal sang matinaastaason nga nagapasipala sa Dios, kag sa paggahom sa sulod sang kwarentay dos ka bulan.

6Nagsugod sia sa pagpasipala sa Dios, sa iya ngalan, sa lugar nga iya ginaestaran, kag sa tanan nga nagaestar sa langit.

7Gintugotan man sia sa pagpakig-away batok sa mga tumoluo kag sa pagdaog sa ila, kag ginhatagan sia sing awtoridad sa tagsa ka tribo, pungsod, linggwahe, kag rasa.

8Ang tanan nga mga tawo nga nagaestar sa duta magasimba sa sapat, luas lamang sa mga tawo nga ang ila mga ngalan nasulat sa wala pa matuga ang kalibutan sa libro sang kabuhi, nga iya sang Kordero nga ginpatay.

9“Gani, ang may mga dulonggan magpamati!

10Ang bisan sin-o nga natalana nga pagadakpon, pagadakpon gid. Ang bisan sin-o nga natalana nga pagapatyon sa espada, pagapatyon gid sa espada. Nagakinahanglan ini sang pagbatas kag pagkatutom sa bahin sang mga tumoluo.”

11Dayon nakita ko ang isa pa gid ka sapat nga naggwa halin sa duta. May duha ini ka mga sungay nga daw mga sungay sang kordero, kag naghambal ini kaangay sang dragon.

12Gingamit niya ang daku nga awtoridad sang nahauna nga sapat nga yara sa iya atubang. Ginpilit niya ang kalibutan kag ang tanan nga nagaestar sa sini sa pagsimba sa nahauna nga sapat, nga ang iya pilas nga ikamatay nag-ayo.

13Ining ikaduha nga sapat naghimo sing dalagku nga mga milagro. Ginpahulog niya ang kalayo halin sa langit pakadto sa duta, sa panulok sang tanan nga mga tawo.

14Kag gindayaan niya ang tanan nga mga tawo nga nagaestar sa duta paagi sa mga milagro nga gintugot sa iya sa paghimo sa atubang sang nahauna nga sapat. Ginsingganan sang sapat ang mga tawo sa paghimo sing imahen sa kadungganan sang sapat nga ginpilas sang espada, pero nabuhi pa.

15Ang ikaduha nga sapat gintugotan sa paghuyop sing kabuhi sa imahen sang nahauna nga sapat, agod nga ang imahen makahambal kag makapamatay sang tanan nga indi magsimba sa iya.

16Ginpilit sang sapat ang tanan nga mga tawo, dalagku kag magagmay, manggaranon kag imol, ulipon kag hilway, nga magpamarka sila sa ila tuo nga kamot ukon sa ila agtang.

17Wala sing may makabakal ukon makabaligya, kon wala sia sini nga marka, nga amo ang ngalan sang sapat ukon ang numero nga nagarepresentar sang iya ngalan.

18Nagakinahanglan ini sing kaalam. Ang bisan sin-o nga maalam makabulobanta sang kahulogan sang numero sang sapat, tungod kay ini nagarepresentar sang ngalan sang tawo. Ang numero amo ang 666.

← Chapter 12 Jump to: Chapter 14 →