Revelation 10

Ilonggo (Maayong Balita nga Biblia (2012))

← Chapter 9 Jump to: Chapter 11 →

1Dayon nakita ko ang isa pa gid ka anghel nga gamhanan nga nagapanaog halin sa langit. Nabayuan sia sang panganod, kag ang iya ulo nalibutan sang balangaw. Ang iya guya daw kasubong sang adlaw, kag ang iya mga batiis daw mga haligi nga kalayo.

2May diutay nga tulon-an nga linukot nga nahumlad sa iya kamot. Gintapak niya ang iya tuo nga tiil sa dagat, kag ang iya wala nga tiil sa duta,

3kag nagsinggit sia sa mabaskog nga tingog nga daw ngurob sang leon. Sa tapos sia makasinggit, nagsabat ang pito ka mga daguob sa tingog nga nagadaguhob.

4Sang makahambal sila, masulat na kuntani ako, pero nabatian ko ang isa ka tingog halin sa langit nga nagasiling, “Indi pag-ipanugid ang ginhambal sang pito ka mga daguob. Indi ini pag-isulat!”

5Dayon ang anghel nga akon nakita nga nagatindog sa dagat kag sa duta, nagbayaw sang iya tuo nga kamot sa langit

6kag nagpanumpa sa ngalan sang Dios, nga nagakabuhi sa wala sing katapusan, nga nagtuga sang langit kag sang tanan nga yara sa sini, sang duta kag sang tanan nga yara sa sini, sang dagat kag sang tanan nga yara sa sini. Ang anghel nagsiling, “Indi na magdugay ang paghulat,

7kundi sa pagpatunog sang ikapito nga anghel sang iya trumpeta, pagatumanon sang Dios ang iya sekrito nga plano suno sa iya ginpahibalo sa iya mga alagad nga mga propeta.”

8Dayon ang tingog nga akon nabatian halin sa langit naghambal liwat sa akon nga nagasiling, “Lakat kag kuhaa ang linukot nga tulon-an nga nahumlad, nga yara sa kamot sang anghel nga nagatindog sa dagat kag sa duta.”

9Nagkadto ako sa anghel kag ginpangayo ko sa iya ang diutay nga linukot nga tulon-an. Nagsiling sia sa akon, “Kuhaa ini kag kauna. Magaaslom ini sa imo tiyan, pero daw dugos ini katam-is sa imo baba.”

10Ginkuha ko ang diutay nga linukot nga tulon-an sa iya kamot kag akon ini ginkaon. Daw dugos ini katam-is sa akon baba, ugaling sang matulon ko na ini, nag-aslom ini sa akon tiyan.

11Dayon ginsingganan ako, “Sa liwat dapat mo iwali ang pulong sang Dios nahanungod sa madamo nga mga pungsod, mga rasa, mga linggwahe, kag mga hari.”

← Chapter 9 Jump to: Chapter 11 →