Revelation 19

Ilonggo (Maayong Balita nga Biblia (2012))

← Chapter 18 Jump to: Chapter 20 →

1Sa tapos sini nabatian ko ang ginahod nga daw mga tingog sang madamo kaayo nga mga tawo sa langit nga nagasiling, “Dayawon ang Dios! Ang kaluwasan, ang kadungganan, kag ang gahom iya sang aton Dios!

2Matuod kag matarong ang iya mga paghukom! Ginhukman niya ang bantog nga babayi nga nagabaligya sang iya dungog, nga nagadagta sang duta paagi sa iya pagpakighilawas. Ginsilutan sia sang Dios tungod kay ginpamatay niya ang mga alagad sang Dios.”

3Sa liwat nagsinggit sila, “Dayawon ang Dios! Ang aso nga naghalin sa pagsunog sang daku nga siudad nagatub-ok nga wala sing untat!”

4Ang baynte kwatro ka mga katigulangan kag ang apat ka buhi nga mga tinuga nagluhod kag nagsimba sa Dios nga nagapungko sa trono, kag nagsiling, “Kabay pa! Dayawon ang Dios!”

5Dayon may tingog nga nabatian halin sa trono nga nagasiling, “Dayawa ninyo ang aton Dios, tanan kamo nga mga alagad niya, kag tanan nga mga tawo, dalagku kag magamay, nga nagakahadlok sa iya!”

6Dayon may nabatian ako nga ginahod nga daw tingog sang madamo kaayo nga mga tawo, subong sang daganas sang daku nga busay, subong sang mabaskog nga daguob. Nabatian ko sila nga nagasiling, “Dayawon ang Dios! Kay ang Ginoo, ang aton Dios nga Makagagahom, amo ang Hari!

7Maghinugyaw kita kag magkasadya, dayawon naton ang iya pagkagamhanan! Kay ang tion sang kasal sang Kordero nag-abot na, kag ang iya nobya nakaaman na sang iya kaugalingon.

8Ginhatagan sia sang matinlo kag nagaidlak nga lino subong iya trahe.” (Ang lino amo ang matarong nga mga binuhatan sang mga tumoluo.)

9Dayon ang anghel nagsiling sa akon, “Isulat ini: Malipayon ang mga inagda sa punsyon sang kasal sang Kordero.” Kag ang anghel nagsiling pa gid, “Amo ini ang matuod nga mga pulong sang Dios.”

10Nagluhod ako sa iya tiilan sa pagsimba sa iya, pero nagsiling sia sa akon, “Indi paghimua ina! Ako alagad man subong sa imo kag sang imo mga kautoran nga matutom sa kamatuoran nga ginpahayag ni Jesus. Magsimba ka sa Dios!” Kay ang kamatuoran nga ginpahayag ni Jesus amo ang nagpaisog sa mga propeta.

11Dayon nakita ko ang langit nga naabrihan, kag may kabayo didto nga puti. Ang nagasakay sa sini ginatawag Matutom kag Matuod. Matarong ang iya paghukom kag pagpakig-away.

12Ang iya mga mata kaangay sang nagadabdab nga kalayo, kag nagasuksok sia sang madamo nga korona sa iya ulo. May ngalan nga nasulat sa iya, ugaling wala sing may nakahibalo kon ano ini, kundi sia lamang.

13Ang malaba nga bayu nga iya ginasuksok nabulit sang dugo. Ang iya ngalan amo, “Ang Pulong sang Dios.”

14Ang mga hangaway sang langit nagsunod sa iya nga nagasakay sa puti nga mga kabayo kag nagabayo sang matinlo kag puti nga lino.

15Naggwa sa iya baba ang matalom nga espada nga iya gamiton sa pagdaog sang mga kapungsoran. Magagahom sia sa ila nga may bug-os nga awtoridad kag wala luoyluoy, kag pagapugaon niya ang bino sa pulogaan sang nagabalingaso nga kaakig sang Dios nga Makagagahom.

16Sa iya malaba nga bayu kag sa iya paa nasulat ang ngalan: “Hari sang mga hari kag Ginoo sang mga ginoo.”

17Dayon nakita ko ang isa ka anghel nga nagatindog sa adlaw. Nagsinggit sia sing mabaskog sa tanan nga mga kapispisan nga nagalupad sa kahawaan: “Dali kamo kag magtipon sing tingob para sa daku nga punsyon sang Dios!

18Dali kamo kag magkaon sang unod sang mga hari, mga heneral, mga soldado, sang mga unod sang mga kabayo kag sang mga nagasakay sa sini, sang unod sang tanan nga mga tawo, mga ulipon kag mga hilway, dalagku kag magamay!”

19Dayon nakita ko ang sapat kag ang mga hari sang duta kag ang ila mga hangaway nga nagtilipon sa pag-away batok sa nagasakay sa kabayo, kag batok sa iya mga hangaway.

20Ginbihag ang sapat upod sa di-matuod nga propeta nga naghimo sing mga milagro sa iya atubang. Paagi sadtong mga milagro, iya gindayaan ang may mga marka sang sapat, kag ang mga nagsimba sa imahen sang sapat. Ang sapat kag ang di-matuod nga propeta gintagbong nga buhi sa linaw sang kalayo nga nagadabdab upod sa asupre.

21Ang ila mga hangaway ginpamatay sang espada nga nagagwa sa baba sang nagasakay sa kabayo, kag gin-udakan sang tanan nga mga pispis ang ila unod.

← Chapter 18 Jump to: Chapter 20 →