Revelation 6

Ilonggo (Maayong Balita nga Biblia (2012))

← Chapter 5 Jump to: Chapter 7 →

1Dayon nakita ko ang Kordero nga nagahukas sang nahauna sang pito ka mga selyo, kag nabatian ko ang isa sang apat ka buhi nga mga tinuga nga nagahambal sa tingog nga daw daguob, “Dali!”

2Nagtan-aw ako kag nakita ko ang isa ka kabayo nga puti. Ang nagasakay sini nagauyat sang pana, kag ginhatagan sia sing isa ka korona. Naglakat sia subong isa ka mandadaog sa pagpangdaog.

3Dayon ginhukas sang Kordero ang ikaduha nga selyo, kag nabatian ko ang ikaduha nga buhi nga tinuga nga nagasiling, “Dali!”

4May isa pa gid ka kabayo nga pula nga naggwa. Ang nagasakay sini ginhatagan sing gahom sa pagdala sang gira sa duta agod ang mga tawo magpinatyanay. Ginhatagan sia sing isa ka daku nga espada.

5Dayon ginhukas sang Kordero ang ikatlo nga selyo, kag nabatian ko ang ikatlo nga buhi nga tinuga nga nagasiling, “Dali!” Nagtan-aw ako, kag nakita ko ang isa ka itom nga kabayo. Ang nagasakay sini may ginauyatan nga timbangan sa iya kamot.

6Nabatian ko ang daw tingog nga nagahalin sa apat ka buhi nga mga tinuga. Nagsiling ini, “Ang isa ka salmon nga trigo para sa isa ka adlaw nga suhol, kag tatlo ka salmon nga sebada para sa isa ka adlaw nga suhol. Pero indi paghaliti ang lana sang olivo kag ang bino!”

7Dayon ginhukas sang Kordero ang ikap-at nga selyo, kag nabatian ko ang ikap-at nga buhi nga tinuga nga nagasiling, “Dali!”

8Nagtan-aw ako, kag nakita ko ang isa ka kabayo nga malapsi. Ang nagasakay sini ginahingalanan nga Kamatayon, kag ang Hades nagasunod sa likod gid niya. Ginhatagan sila sing awtoridad sa pagpamatay sang isa sa apat ka mga bahin sang mga tawo sang duta paagi sa gira, sa tiggulotom, sa mga balatian, kag sa mapintas nga mga kasapatan.

9Dayon ginhukas sang Kordero ang ikalima nga selyo. Nakita ko sa idalom sang altar ang mga kalag sadtong mga ginpamatay tungod sang ila pagwali sang pulong sang Dios, kag nagmatutom sa ila pagpanaksi.

10Nagsinggit sila sing mabaskog, “Ginoo nga Makagagahom, balaan kag matuod! San-o pa bala nimo hukman ang mga tawo sang duta, kag silutan tungod sang ila pagpamatay sa amon?”

11Ang tagsatagsa sa ila ginhatagan sing malaba nga bayu nga puti, kag ginsingganan sila nga magpahuway sa malip-ot nga tion tubtob malambot ang kadamuon sang ila kapareho nga mga alagad kag mga kautoran nga pagapamatyon subong man sang pagpamatay sa ila.

12Kag nakita ko ang paghukas sang Kordero sang ikan-om nga selyo. Dayon naglinog sing mabaskog kag nag-itom ang adlaw kasubong sang panapton nga itom, kag ang bulan nagpula kasubong sang dugo.

13Nagkalahulog sa duta ang mga bituon sa langit, kasubong sang hilaw nga mga higos nga nagakadagdag sa higera nga kahoy, kon huypon ini sang mabaskog nga hangin.

14Ang langit nadula kasubong sang paglukot sang nalukot nga tulon-an, kag ang tagsa ka bukid kag isla ginpanghalin sa ila lugar.

15Dayon ang mga hari sang duta, ang mga manugdumala kag ang mga pangulo sang mga hangaway, ang mga manggaranon kag ang mga gamhanan, kag ang tanan nga mga tawo nga hilway ukon ulipon, nagpalanago sa mga kweba, kag sa idalom sang dalagku nga mga bato sa mga bukid.

16Nagpanawag sila sa mga bukid kag sa mga bato nga nagasiling, “Tumbahi kag lipdi kami gikan sa mga mata sang nagapungko sa trono, kag sa kaakig sang Kordero!

17Kay ang daku nga adlaw nga ipakita sang Dios kag sang kordero ang ila kaakig yari na, kag sin-o bala ang makabatas sini?”

← Chapter 5 Jump to: Chapter 7 →