Revelation 18

Ilonggo (Maayong Balita nga Biblia (2012))

← Chapter 17 Jump to: Chapter 19 →

1Sa tapos sini nakita ko ang isa pa gid ka anghel nga nagapanaog halin sa langit. May daku sia nga awtoridad, kag ang iya silak nagpasanag sang bug-os nga duta.

2Nagsinggit sia sing mabaskog: “Napukan sia! Ang daku nga Babilonia napukan! Karon nangin-ilistaran na sia sang mga demonyo kag malaut nga mga espiritu. Ang tanan nga sahi sang mahigko kag makangilil-ad nga mga pispis nagaestar sa iya.

3Kay ginpainom niya ang tanan nga mga katawhan sang maisog nga bino sang iya pagpakighilawas. Ang mga hari sang duta nagpakighilawas sa iya, kag ang mga negosyante sang kalibutan nagmanggaranon halin sa iya wala pugongpugong nga kailigbon.”

4Dayon nakabati ako sang isa naman ka tingog halin sa langit nga nagasiling: “Gwa kamo, mga tawo ko! Gwa kamo sa iya! Indi kamo dapat magpakigbahin sa iya mga sala, indi kamo dapat mag-ambit sang iya mga silot!

5Kay ang iya mga sala nagtangkas kaangay kataas sa langit, kag ang Dios nagdumdom sang iya mga kalautan.

6Himua man sa iya ang iya ginhimo sa inyo, balusi sia sing pilo sang iya tanan nga mga ginhimo. Pun-a ang iya kupa sang ilimnon nga doble sa kaisog sang sa ilimnon nga iya gin-aman para sa inyo.

7Hatagi sia sing tuman nga pag-antos kag kasubo nga tumbas sang pagpasidungog kag pagpatuyang nga ginhatag niya sa iya kaugalingon. Kay nagsagad sia siling sa iya kaugalingon: ‘Ako isa ka rayna nga nagapungko diri! Indi ako balo, indi gid ako magkalisod!’

8Tungod sini magaabot sa iya ang tanan niya nga mga kalalat-an sa sulod sang isa ka adlaw: balatian, kalisod, kag gutom. Kag pagasunogon sia sa kalayo, tungod kay ang Ginoong Dios nga nagahukom sa iya gamhanan.”

9Ang mga hari sang duta nga nag-ambit sang iya pagpakighilawas kag pagpatuyang, magahibi kag magatangis tungod sa siudad, kon makita nila ang aso sang iya pagkasunog.

10Magatindog sila sa malayo, tungod kay hinadlukan sila sa pagpakig-ambit sang iya pag-antos, kag magasiling sila, “Daw ano ka makakulogmat! Daw ano ka makaluluoy ining daku kag gamhanan nga siudad sang Babilonia! Sa isa lang ka oras nasilutan ka na!”

11Ang mga negosyante sang duta nagahibi man kag nagapanalambiton tungod sa iya, tungod kay wala na sing may nagabakal sang ila mga baligya.

12Wala na sing may nagabakal sang ila bulawan, pilak, malahalon nga mga bato, kag mga perlas; mga hinero nga nahimo sa lino kag seda kag mga hinero nga granate kag pula; ang tanan nga sahi sang tumalagsahon nga kahoy, kag ang tanan nga mga butang nga nahimo sa marpil kag sa malahalon nga kahoy, saway, salsalon, kag marmol;

13kanela, panakot, insyenso, mira kag puraw nga insyenso; bino kag lana, harina kag trigo, mga baka kag mga karnero, mga kabayo kag mga karwahi, mga ulipon kag bisan mga tawo nga nabihag sa gira.

14Ang mga negosyante nagasiling sa iya, “Ang tanan nga maayo nga mga butang nga imo ginahandom nga angkunon nadula kag ang tanan mo nga manggad kag pagpadayaw nawala, kag indi mo na sila makita liwat!”

15Ang mga negosyante nga nagmanggaranon sa ila negosyo sa sina nga siudad, magatindog sa malayo, tungod kay nahadlok sila sa pagpakig-ambit sang iya pag-antos. Magahibi sila kag magapanalambiton,

16kag magasiling, “Daw ano ka makakulogmat! Daw ano ka makaluluoy sinang daku nga siudad! Nagabayo sia anay sang lino kag granate kag pula, kag nagapangalahas sang bulawan, malahalon nga mga bato, kag mga perlas!

17Kag sa isa lang ka oras nadula niya ini tanan nga manggad!” Ang tanan nga mga kapitan sang mga bapor kag mga pasahero, ang mga tripulante kag ang tanan nga ang ila palangitan-an yara sa dagat, nagtindog sa malayo,

18kag nagsinggit sila sing mabaskog sang makita nila ang aso sang iya pagkasunog: “Wala na gid sing isa pa ka siudad nga subong sining daku nga siudad!”

19Ginsabwagan nila sing yab-ok ang ila mga ulo, naghinibi sila kag naghaya nga nagasiling, “Daw ano ka makakulogmat! Daw ano ka makaluluoy sinang daku nga siudad! Sia amo ang siudad sa diin nagmanggaranon halin sa iya manggad ang tanan nga may mga sakayan nga nagabiyahe sa kadagatan! Kag sa isa lang ka oras nadula niya ang tanan!”

20Magkalipay ka, O langit, tungod sang pagkalaglag sini nga siudad! Magkalipay kamo, mga tumoluo, mga apostoles kag mga propeta! Kay sia ginhukman sang Dios tungod sang iya ginhimo sa inyo!

21Dayon ang isa ka gamhanan nga anghel nagpulot sing bato nga subong kadako sang daku nga galingan, kag ginhaboy ini sa dagat. Nagsiling sia, “Subong sini kabaskog ang pagtagbong sang daku nga siudad sang Babilonia kag indi na gid ini makita liwat.

22Ang mga tukar sang mga manug-arpa kag mga manug-amba, mga manugplawta kag mga manugtrumpeta, indi na gid mabatian liwat sa imo! Wala na sing panday sa bisan ano nga bulohaton nga makita liwat sa imo, kag ang gahod sang galingan indi na gid mabatian liwat!

23Wala na gid sing siga sang suga nga makita liwat sa imo, kag ang tingog sang nobya kag nobyo indi na mabatian sa imo. Ang imo mga negosyante amo anay ang labing gamhanan sa bug-os nga kalibutan, kag paagi sa imo pagpangbabaylan gindayaan mo ang tanan nga mga tawo sang kalibutan!”

24Ginsilutan ang Babilonia tungod kay ang dugo sang mga propeta kag sang mga tumoluo nasapwan sa siudad, kag ang dugo sadtong tanan nga ginpamatay diri sa duta.

← Chapter 17 Jump to: Chapter 19 →