Zechariah 11

Ilonggo (Maayong Balita nga Biblia (2012))

← Chapter 10 Jump to: Chapter 12 →

1O Libano, buksi ang imo mga pwerta, agod ang kalayo magsunog sang imo mga kahoy nga sedro.

2Maghibi kag magpanalambiton, mga kahoy nga sipre, ang mga sedro nagkalapukan, inang magapa nga mga kahoy ginlaglag! Maghibi kag magpanalambiton, mga kahoy nga terebinto sang Basan, ang madamol nga kagulangan ginpangpulod!

3Ang mga pangulo nagahibi sa kalisod, kay ang ila kadungganan wala na! Pamatii ang ngurob sang mga leon, ang kagulangan sa Jordan nga ila ginaestaran nalaglag na!

4Ang Ginoo nga akon Dios nagsiling sa akon, “Ikaw ang magkuha sang bahin sang manugbantay sang mga karnero nga pagaihawon.

5Ang ila mga agalon nagaihaw sa ila kag wala man ginasiluti. Ginabaligya nila ang karne kag nagasiling, ‘Dayawon ang Ginoo! Manggaranon kami!’ Bisan ang ila kaugalingon nga mga manugbantay wala naluoy sa ila.”

6Ang Ginoo nagsiling, “Indi ko na pagkaluoyan ang mga nagaestar sa duta. Ako mismo ang magabutang sang tanan nga mga tawo sa idalom sang gahom sang ila mga kasimanwa kag mga hari. Ini sila magalaglag sang duta, kag indi ko ini pagluwason gikan sa ila gahom.”

7Ang mga nagbakal kag nagbaligya sang mga karnero nagsuhol sa akon kag nanginmanugbantay ako sang mga karnero nga pagaihawon. Nagkuha ako sing duha ka mga sungkod. Ang isa gintawag ko “Kaluoy” kag ang isa “Pag-ugyon.” Kag ginbantayan ko ang panong.

8Naakig ako sa tatlo ka mga manugbantay sang karnero nga nagdumot sa akon, kag ginpahalin ko sila tanan sa sulod sang isa ka bulan.

9Dayon ginsingganan ko ang panong sang karnero, “Indi na ako magbantay sa inyo. Ang mapatay pabay-i lang dira nga mapatay kag ang malaglag pabay-i lang nga malaglag. Ang mabilin magapatyanay.”

10Dayon ginkuha ko ang isa ka sungkod nga ginhingalanan “Kaluoy” kag ginbali ini, sa pagpauntat sang kasugtanan nga ginhimo sang Ginoo sa mga kapungsoran.

11Gani ang kasugtanan ginpauntat sugod sadto nga adlaw. Ang mga negosyante sang karnero nagabantay sa akon, kag nahibal-an nila nga ang Ginoo nagahambal paagi sa akon ginhimo.

12Nagsiling ako sa ila, “Kon luyag ninyo, hatagi ninyo ako sang akon suhol, pero kon indi, ti, sigi lang.” Dayon ginhatagan nila ako sing traynta ka bilog nga pilak bilang akon suhol.

13Ang Ginoo nagsiling sa akon, “Ibutang ini sa talaguan sang kwarta sang Templo.” Gani ginkuha ko ang traynta ka bilog nga pilak nga sa hunahuna nila tama na gid ka daku nga bili para sa akon, kag ginbutang ko ini sa talaguan sang kwarta sang Templo.

14Dayon ginbali ko ang ikaduha nga sungkod nga ginatawag “Pag-ugyon”, kag ang pag-isa sang Juda kag Israel naguba.

15Dayon ang Ginoo nagsiling sa akon, “Sa liwat magpakamanugbantay ka sang mga karnero, isa ka manugbantay nga wala sing pulos.

16Nagbutang ako sang isa ka manugbantay nga akon gintugyanan sang akon mga panong, pero wala niya ginatabangi ang mga karnero nga yara sa katalagman, ukon ginapangita ang mga nadula, ukon ginabulong ang mga napilas, ukon ginapahalab ang nabilin nga mga maayo. Sa baylo, nagakaon sia sang karne sang pinakatambok nga mga karnero, kag ginaukab niya ang ila mga kuko.

17Makaluluoy inang wala sing pulos nga manugbantay! Ginpatumbayaan niya ang iya panong! Ang inaway magalaglag sing bug-os sang iya gahom. Ang iya butkon maitos kag ang iya tuo nga mata mabulag.”

← Chapter 10 Jump to: Chapter 12 →