Zechariah 7

Ilonggo (Maayong Balita nga Biblia (2012))

← Chapter 6 Jump to: Chapter 8 →

1Ang Ginoo naghambal sa akon sang ikap-at nga tuig sang paggahom sang hari nga si Dario. Nag-abot ini sang ikap-at nga adlaw sang ikasiyam nga bulan, nga amo ang Kislev.

2Ang mga tawo sang Betel nagpadala kay Sarezer kag kay Regemmelec kag sang ila mga tawo sa Templo sang Ginoo sang mga hangaway sa pagpangayo sang bendisyon sang Ginoo,

3kag sa pagpamangkot sa mga pari kag mga propeta sini nga pamangkot: “Magapadayon bala kami sa paglalaw tungod sang pagkalaglag sang Templo, kag sa pagpuasa sa ikalima nga bulan subong sang amon ginhimo sa sulod sang malawig na nga mga tinuig tubtob karon?”

4Amo ini ang mensahe sang Ginoo nga nag-abot sa akon.

5Nagsiling sia, “Singgana ang mga tawo sa duta, kag ang mga pari, nga sang magpuasa kag maglalaw sila sa ikalima kag ikapito nga mga bulan sa sulod sining setenta ka tuig, ginhimo nila ini indi sa akon kadungganan.

6Kag sang magkaon kag mag-inom sila, ginhimo nila ini para sa ila kaugalingon nga kabulosgan.”

7Amo man ini ang ginsiling sang Ginoo paagi sa mga propeta sang una, sa tion nga ang Jerusalem mainuswagon kag puno sang mga tawo, kag sa tion nga may mga tawo man nga nagaestar sa mga banwa sa palibot sang siudad, sa bagatnan nga lugar, kag sa katundan nga kunsaran sang mga bakulod.

8Ang Ginoo naghatag sini nga mensahe kay Zacarias:

9“Sang una ginhatag ko ini nga mga sugo sa akon mga tawo: ‘Pat-ura nga magaluntad ang katarungan kag ipakita ang kaayo kag pagkamaluloy-on sa isa kag isa.

10Indi ninyo pagpiguson ang mga balo, mga ilo, mga dumoluong nga nagaestar upod sa inyo, ukon ang bisan sin-o nga nawad-an. Kag indi kamo magplano sa paghalit sa isa kag isa.’

11“Pero ang akon mga tawo nagpabungol lang kag indi magpati. Gintakpan nila ang ila mga hunahuna

12kag ginpatig-a nila ang ila mga tagipusoon kaangay sang bato, kag tungod kay indi sila magpamati sa mga pagtudlo nga akon ginpadala paagi sa mga propeta nga nagkabuhi sang una, naakig gid ako.

13Tungod kay wala sila magpamati sang akon paghambal, wala ako magsabat sang ila mga pangamuyo.

14Kaangay sang buhawi ginpaalaplaag ko sila sa pag-estar sa iban nga mga kapungsoran. Ining maayo nga duta nahimo nga desierto nga wala sing bisan isa nga nagaestar.”

← Chapter 6 Jump to: Chapter 8 →