Zechariah 8

Ilonggo (Maayong Balita nga Biblia (2012))

← Chapter 7 Jump to: Chapter 9 →

1Ang Ginoo sang mga hangaway naghatag sini nga mensahe kay Zacarias:

2“Daku gid ang akon handom sa pagbulig sa Jerusalem tungod sang akon daku nga gugma para sa iya mga tawo, kag tungod sini nga gugma nagkaakig ako sa iya mga kaaway.

3Magabalik ako sa Jerusalem, ang akon balaan nga siudad, kag magaestar ako didto. Pagakilalahon ini nga isa ka siudad nga matutom, kag ang bukid sang Ginoo sang mga hangaway pagatawgon nga balaan nga bukid.

4Sa liwat may mga tigulang naman didto nga lalaki kag babayi nga maluya na kag nagagamit na sing baston sa ila paglakat. Nagapungko sila sa mga kalsada kag mga plasa sang Jerusalem.

5Kag ang mga kalsada mapuno liwat sing mga kabataan nga lalaki kag babayi nga nagahinampang didto.

6“Daw indi ini mahimo sa ila nga mga nabilin nga buhi sini nga pungsod, pero mahimo ko ini.

7Luwason ko ang akon mga tawo halin sa mga kadutaan sa diin sila ginbihag

8kag dalhon ko sila pabalik halin sa sidlangan kag nakatundan sa pag-estar sa Jerusalem. Sila mangin-akon mga tawo, kag ako mangin-ila Dios nga nagagahom sa ila sing matutom kag matarong.

9“Magpakaisog kamo! Ginapamatian ninyo subong ang amo man nga mga pulong nga ginhambal sang mga propeta sang tion nga ang sadsaran ginapahamtang para sa pagpatindog liwat sang akon Templo.

10Sang una wala sing isa nga makasarang sa pagsuhol sang mga tawo ukon mga sapat, kag wala sing isa nga hilway sa katalagman sa iya mga kaaway. Ginpaaway ko ang mga tawo,

11pero karon lain na ang pagtratar ko sa mga nabilin nga buhi sini nga pungsod.

12Magapanguma sila nga wala sing may magatublag sa ila. Ang ila mga ubas magapamunga, ang duta magapatubas, may bugana nga ulan, kag ihatag ko tanan ini nga mga kaayuhan sa mga pumoluyo nga mabilin sang akon pungsod.

13Mga pumoluyo sang Juda kag Israel, sang una ang mga dumoluong nagpakamalaut sa isa kag isa nga nagasiling, ‘Kabay nga ang nag-abot nga mga kalalat-an sa Juda kag Israel, mag-abot man sa inyo!’ Pero pagaluwason ko kamo kag yadto nga mga dumoluong magasiling sa isa kag isa, ‘Kabay nga bendisyunan kamo kaangay sang Juda kag Israel.’ Gani magpakaisog kamo kag indi magkahadlok.”

14Ang Ginoo sang mga hangaway nagasiling, “Sang ginpaakig ako sang inyo mga katigulangan, nagplano ako sa paglaglag sa ila, kag wala ko pagbayluhi ang akon plano, kundi gintuman ko gid ini.

15Pero karon luyag ko bendisyunan ang mga pumoluyo sang Jerusalem kag Juda. Gani indi kamo magkahadlok.

16Amo ini nga mga butang ang dapat ninyo himuon: Maghambal kamo sing matuod sa isa kag isa. Himua ninyo ang matarong nga paghukom sa mga korte agod magluntad ang paghidait.

17Indi maghimo sang mga butang nga makahalit sa isa kag isa. Indi kamo magsaksi sing binutig nga nagapanumpa. Kontra ko ang binutig, ang di-matarong kag pagpamintas.”

18Ang Ginoo sang mga hangaway naghatag kay Zacarias sini nga mensahe:

19“Ang mga pagpuasa nga ginahimo sa ikap-at, ikalima, ikapito, kag ika-10 nga mga bulan manginpiesta sang pagkinalipay kag pagkinasadya para sa mga tawo sang Juda. Dapat ninyo pakamahalon ang kamatuoran kag paghidait.”

20Ang Ginoo sang mga hangaway nagasiling, “Ang tion magaabot nga ang mga tawo gikan sa madamo nga mga siudad magaabot sa Jerusalem.

21Ang mga tawo sang isa ka siudad magasiling sa mga tawo sang isa ka siudad, ‘Magasimba kami sa Ginoo sang mga hangaway kag magpangayo sang iya pagbendisyon. Upod kamo sa amon!’

22Madamo nga mga tawo kag gamhanan nga mga pungsod ang magakadto sa Jerusalem sa pagsimba sa Ginoo sang mga hangaway, kag magapangayo sang iya mga kaayuhan.

23Sa sadto nga mga inadlaw, ang napulo ka mga dumoluong magabuyot sa bayu sang isa ka Judio kag magasiling, ‘Luyag kami mag-upod sa imo, tungod kay nakabati kami nga ang Dios kaupod nimo.’”

← Chapter 7 Jump to: Chapter 9 →